Meng bruk hu 2 urang ruak camereip di abih, nan lac 2 anek ame urang Trung Quốc njom virus Corona daok ndih iek ruak di Sang iek ruak Chợ Rẫy - TPHCM, Việt Nam brei peih Pasak samar chip pacang caga jit ruak. Dom jalan pacang cakak, ngak hacih labik ruak hu brei ngak drah samar. Rajaei tacei pato dom mentri, jakar dom palei peih ngak dom jalan pacang caga catang jang duk saong bruk daok rah tabiak jeng yau duk saong bruk kakei kayua Gah Y tế dunya ba tabiak. Tui ong Trần Đắc Phu, dahlau diah lac akaok Cục Y tế pacang caga, meng ilamu bac megru hu meng bruk pacang caga jit ruak SARS thun 2003 brei mboh, meng tuk mboh hu urang ruak camereip ye jit ruak biak mbuan pambak tame dalam bhap bini: “ Bruk duah thau jit ruak brei tui iek kajap meng urang camereip mbiah tal tuk thau lac urang nan nao  labik halei daok. Meyah oh tui hu ye oh pacang hu ruka njom pambak. Kadua lac tuk tame sang iek ruak brei pacang idung pabah meng siuk khẩu trang. Ka klau lac duk ndih iek ruak di urang njom ruak virus Corona oh peih mac điều hòa. Tapa bruk pacang jit ruak SARS hu mboh Sang iek ruak Việt Pháp kayua peih điều hòa duk ndik iek ruak nan ye hu 5 urang metai, dalam tuk nan Sang iek ruak Nhiệt đới Trung ương brei peih pabah mbang tho ye oh thei metai.”

  Việt Nam hu tabiak bruk pacang caga jit ruak meng bilan 12 thun 2019 saong meng tuk mboh 2 urang ruak akok meti, Rajaei tacei pato dom mentri dom gah chức năng brei dauh thau ka jit ruak gam gam, tuk halei jeng hu jalan pacang caga meyah hu ruak rah tabiak. Thủ tướng Rajaei hu công điện tacei pato Mentri Giao thông Vận tải brei padeih brei adat par dom kapal haok meng Viet Nam nao labik hu jit ruak di Trung Quốc saong brei padeih abih dom jalan pan meng labik hu jit ruak mai Viet Nam, kakei brei takik mbang pan nao tal dom labin hu jit ruak di negar Trung Quốc.

Gam tui nan lac dom jalan pacang caga karei hu peih ngak sumu gauk. Viet Nam lac taneh ia akaok meti peih bruk ngak lac tuk tuai damuai ngak harak gar di dom pabah mbang negar pakat dunya njauk brei thau prein yawa saong tukvak hu daok di labik hu jit ruak. Kayua tukvak pabam ruak virus Corona suai lavik, labaih 14 harei, mac duk nhiet di rup pabhap hu mboh tuk urang pandiak tagok, oh duah mboh dom urang medil lac njom ruak yau nan ye Mentri Y tế hu khan brei thau talei phone drah samar 19003228 piah bhap bini khan brei thau saong hu tacei pato meyah mboh dalam rup nyu karei. Tui nan, mek mẫu duk iek darah dom urang ruak viem phoi cap daok ndih iek ruak piah samar thau ruak virus Corona. Ông Lương Ngọc Khuê, Cục trưởng Cục khik iek jru ruak,  Mentri Y tế brei thau: “Bruk duk iek ruak hu caga bloh saong paglaong bruk pacang caga dahlau. Urang ruak hu ba tame tui sa jalan karei, plaika njiak ruak njom mbak meng urang ini tapa urang diah dalam sang iek ruak. Dom labik y tế jeng brei caga hu blaoh laneng gaiy ndih iek ruak, labiak daok karei, jru, pandap y tế piah taduan tuk hu urang ruak.”

  Mbiah tal urak ini, hadei di 1 adit duah mboh 2 urang ruak akok meti, taneh ia drei oh ka mboh bruk njom mbak di virus tabiak bhap bini. Piah ka bruk khau tin hu njauk saong cambaih laih, Rajaei, Ban Tuyên giáo Trung ương brei panuac ka Metri Y tế khan brei thau ka  jit ruak di dunya jeng yau dalam taneh ia piah samar hu tal jabat thông tin ka bhap bini. Ong Nguyễn Thanh Long, Phó Trưởng ban Tuyên giáo Trung ương lac, bruk  praong nan lac oh ngak brei urang haduh hatai min oh iek biar bruk pacang caga jit ruak.

“Khol drei brei kakei cambaic laic ka bhap bini oh nao tal labik hu jit ruak. Khol drei oh nduac tui kein laba kinh tế bo iek lap bruk kakei pato nan. Bruk pacang caga  dalam negar ye brei khik iek catang. Dom palei njauk brei tui iek dom urang ruak viem phoi trak. Dom urang daok labik hu jit mai Viet Nam bo njauk brei ba tame sang iek ruak, brei daok karei iek ruak.”

  Tapa nan mboh lac, Viet Nam pacang caga jit ruak catang glaong jang bruk kakei ba tabiak nan lac bruk njauk ngak kayua anek ruak birau virus Corona biak kan si thau. Thủ tướng Rajaei Nguyễn Xuân Phúc kakei lac, pacang jir ruak yau meruh saong kol khamang. Abih he thong chinh trị brei tame bruk, oh iek lap, brei khik pcang prein yawa ka bhap bini, oh luai ka jir ruak pambak praong, takik di abih urang metai. Saong abih gah pacang caga jit ruak ngak bruk lauac tuk Têt yau brei mboh bruk kham merat nan./.

Urang lang: Aí Nghiêm -30/1