Lime rituh ribau mbang vaccine Vero-Cell của Sinopharm haong 502.400 jrum klauk pandar sa mbang blaoh klaak, kayau negar Cộng hòa bhap bini Trung Hoa alin hadiah ka Việt Nam hu mai tal mblang kapal haoh Nội Bài tuk biar harei 20-6. Tui kuhria, 500 rabau mbang vaccine Vero-Cell bo Việt Nam taduan mbang ini hu klauk brei 3 kapul urang nan lac: urang negar Cộng hòa bhap bini Trung Hoa daok ngak bruk di Việt Nam; urang Việt Nam caong khin nao bac megru, ngak bruk, pablei salih di negar Cộng hòa bhap bini Trung Hoa; urang caong khin klauk vaccine ini, abih di nyu lac dom puk palei daok jaik taphia negar Cộng hòa bhap bini Trung Hoa.

Tui adat, urak ni rilo rahra di negar langiu meda nao tal Nga piah pachreih pacacah caoh blaong Giải vô địch caoh blaong châu Âu - Euro 2020 tapa "Fan ID". Min, rilo rahra Việt Nam mek bruk nao pachreih caoh blaong piah tame negar suan bruk ba tabiak njauk Nga pa-teok tabiak. Cục Lãnh sự - Bộ Ngoại giao kakei lac dom cổ động viên Việt Nam pandar Fan ID piah nao tal Liên bang Nga njauk duah thau cambaih dom adat ka bruk tame tabiak negar, tut angan daok veik, harak vé kapal ahaoh, dom bruk oh brei ngak, saong brei ngak njauk tui dom adat di pak ni piak plaih dom bruk oh siam gah adat hukum saong oh mai veik taneh ia hu kayua njauk gar veik di dom mblang kapal haoh dunya dalam tuk jit ruak COVID-19.

UB bhap bini Quận 8 bahrau hu harak caong UB bhap bini ban raya HCM brei pacang veik tui Sarak 16 di Thủ tướng Rajaei meng mon 12 jala pandiak harei ini 21/6 di labik Khu phố 2, Phường 16 dalam 14 harei. Labik Quận 8 khin pacang nan nyu daok jaik labik daok hu pacang di quận Bình Tân. Khu phố 2 di phường 16 praong 89 ha, dalam nan hu gam Cảng Phú Định, hu 2.049 menuac, hu 6 sang trọ hu 1.400 menuac. Quận jeng hu jalan pabak pandap mbang menyum ka bhap bini; peih bruk duah thau saong mek mẫu dut iek, brei daok karei saong langyah dom bruk y tế karei tamuh tabiak...

Mon 12 melam 21-6, kapul radaih ka 4 ( di jalan metro ka 1-TPHCM ) hu 3 radaih biak atah, biak trak hu pajeng mai depot Long Bình. Kapul radaih nao dalam melam Sài Gòn joa lange di dom harei paatah di gauk. Hadei di tuk dua kapul radaih ka 4 saong ka 5 mai tal depot Long Bình (ban Thủ Đức) meda hu ba tagok jalan pasei T1 di harei 21 saong harei 23-6.  Yau nan, tal urak ni hu 5 dalam 17 kapul radaih metro ka 1 hu ba tame taneh ia. 3 kapul radaih dahlau di nan hu pajeng mai depot Long Bình piah caga nduac iek. Tal urak ni, metro ka 1 ngak hu 86% dom bruk di danak dak.

Harei ini, njauk di tuk pahadar harei báo chí cách mạng Việt Nam,  gah y tế Sang iek ruak Nguyễn Tri Phương hu peih bruk klauk vaccin  pacang COVID-19 ka dom urang ngak báo di jabat Hội Nhà báo ban raya HCM. Dalam luac sa thun meteh tapa, meng tuk jit praong COVID-19 tamuh tabiak, dom urang vak, urang quay phim di rilo jabat báo chí oh huac bala ka rup drei, hu mbaok di dom labik pacang jit di bhum tapen negar, dom labik brei daok karei saong dom labik daok tamuh jit… piah samar brei thau ka bruk jit ruak. Kayua yau nan ye, urang ngak báo lac sa dalam dom menuac brei hu klauk dahlau jru vaccine pacang caga.

Bruk ia sua di bhum Đông Bắc saong gah maraong di Trung Quốc biak mbuan si rah tabiak tuk mbaok ia di 21 kraong praong di dom labik ni yam tapa tanut brei thau dahlau lac hu ia sua. Jabat kuhria mboh dahlau bruk langik tasik Trung Quốc jeng kuhria mboh lac, meng harei 21 tal harei 24/6, bhum Giang Nam, Hoa Nam saong Tây Nam di Trung Quốc meda hu hajan praong ngak ka mbaok ia di dom kraong mbiah saong sit di pak ni yam tapa tanut brei thau lac mbuan hu ia sua. Dahlau di nan, mintri Thủy lợi Trung Quốc jeng hu peih ginum biai ka bruk pacang caga hajan ia sua di bhum Đông Bắc saong gah maraong Trung Quốc. Urak ni, mintri ni jeng hu brei 2 kapul nao tal Hắc Long Giang saong Nội Mông Cổ piah daong ka dom bhum palei ngak siam bruk pacang caga ia sua.

Dom Cty haong sang bac ĐH di negar Japon daok peih bruk klauk vaccin pacang COVID-19 meng harei ini piah ngak salah bruk klauk abih menuac dalam negar di bilan 10 atau bilan 11 thun ini. labaih 2.300 doanh nghiệp Japon pachreih tui panuac ieu di rajaei hu mbaok tame bruk kham merat haong gauk ini. Bruk klauk jru ini hu peih tabiak ngak hadei di tuk dom urang hu kauk dahlau lac dom y bác sĩ pacang jit saong urang taha hu klauk blaoh vaccin.

Dom roh duah jaik di ini jeng brei mboh bruk pambuak gauk di bruk klauk jru vacxin saong bruk dak harei dak hu takik urang njauk ruak saong metai kayua COVID-19. Tui yaok pataom di Blum-boớc (Bloomberg), di negar Anh, meng labaih 46% rahra di negar ni hu klauk ginup, dom urang metai kayua COVID-19 jeng trun daok di tanut bier abih kuhria meng bilan pandiak thun blaoh. Dalam tuk nan, sa roh duah langyah karei di CNN jeng brei mboh, dalam dom bang di Mỹ hu klauk ginup ka labaih 1 mateh rahra, dom urang njom ruak tui kuhria bier jang labaih 24%. Ngan haong dom biến thể Đen-ta daok ngak duh hatai di urak ni, dom chuyên gia y tế jeng brei thau lac, meyah biến thể ni meda plaih hu meneing prein khik pacang di vaccin ye dak harei dak hu rilo urang hu klauk vaccin ye vi-rút dak harei dak takik hu prein njom mbak./.

Urang lang: M.Phuong & Thu Thao - 21/6/2021