Bier harei kabroi, Mintri Ngoại giao peih bruk taduan 1,5 triệu mbang vaccine Pfizer/BioNTech pacang COVID-19 kayua danak dak  COVAX pabak brei ngan song bruk dong brei di rajaei Hoa Kỳ. Brei panuac di tuk taduan mek, Thứ trưởng Đặng Hoàng Giang dar phol song tong yaom glong bruk dong brei di danak dak  COVAX saong di rajaei, bhap bini  Hoa Kỳ dalam tuk vak Việt Nam dok jhul pakhang  bruk klauk vaccine ka rahra. Bruk dong brei ni dok rik dong ka  Việt Nam pasang iek hu siam jit ruak, khik salamad, ba taneh ia tapa tuk vak  siam mekre bahrau.

Hadei di 3 harei pacadu bruk pa-atah di gauk, hu yaok rabau doanh nghiệp di TP.HCM tut angan ngak bruk veik. Tui kuhria, bruk caong hu urang ngak di dom doanh nghiệp tukvak anak tal lac biak rilo. Mban tacei jalan pacang caga jit COVID-19 TP.HCM brei thau, urak ini abih tih dom urang ngak daok ngak bruk di labik chế xuất, labik ngak kong kuhria tal urak ini, lac 135.000 menuac. Dom menuac ngak ini, bahrau samu 46% abih tih dom menuac ngak, nan ye dom doanh nghiệp daok duah pabak tame.

Di Đồng Nai, rilo sang mac mac, labik ngak pandap, pablei salih jeng oh ka peih ngak atau ngak bruk meteh dhi  kayua kurang menuac ngak. Urang pal akaok tỉnh Đồng Nai brei thau, tỉnh dok jhul samar bruk klauk  vaccine ka rahra , dalam nan brei klauk jru dahlau ka urang ngak  piah ba bruk ngak mbang gilac veik, piah pasiam veik kinh tế samar di abih. Tỉnh jeng brei padeih bruk brei harak nao jalan.

  Tổng Cty Đầu tư patagok jalan nduac samar Việt Nam (VEC) peih bruk mek jien phí gilac veik di Bilai jalan roya 51 labik jalan nduac samar TP. Hồ Chí Minh – Long Thành – Dầu Giây meng mon 12 melam 05/10/2021.  Dom radaih nduac gah Dầu Giây - TP. Hồ Chí Minh, di labik dhar B bilai mek jien phí Jalan roya 51 (labik tabiak), po radaih bayar jien pandar jalan tui labik jalan Dầu Giây - Roya 51. Di dhar A bilai mek jien phí Roya 51 (labik tame), phát thẻ pasang iek radaih tame, mek jien  di bilai Long Phước. Di bilai mek jien Long Phước (labik tabiak), po radaih bayar jien pandar jalan tui labik jalan Dầu Giây – Long Phước.

Meng 5 tuk harei ni, 4 jalan radaih buýt hu peih veik di huyện Cần Giờ, TPHCM, nan lac jalan Đồng Hòa - Cần Thạnh (mã jalan 77), jalan phà Bình Khánh - Cần Thạnh (90), jalan An Thái Đông – Canah klau Bà Xán (127) song jalan Tân Điền - An Nghĩa (128), song brei peih ngak meteh dut song tuk dahlau meng hu jit ruak.

  Prein pacang ruak Covid-19 di vaccine Phai-dơ Bai-ô-en-tếch (Pfizer Inc/BioNTech SE) meng 90% trun daok 47% hadei di 6 bilan klauk mbang klauk vaccine ka 2. Ini lac panuac di Gah khik ramik pandap mbang huak saong jru tavao Mỹ (FDA) khan brei thau angaok Tạp chí Y khoa Lancet di harei kabroi, dalam tuk daok pasang iek brei klauk vaccine mbang klauk ka 3 ka rahra taneh ia ini. Bruk nan hu khan brei thau hadei di tuk dom urang ilamu roh duah harak gar prein yava di jaik 3 triệu 400 rabau menuac daok di bhum gah meraong California hu klauk vaccine meng bilan 12 thun 2020 tal bilan 8 thun ini.

Kayua jit COVID-19 tamuh veik, jabat  chức năng Nga brei padeih dim bruk ngak rilo menuac dalam negar piah patrun patakik bruk njom mbak di  vi-rút. Dahlau di nan, dalam harei 4/10, Thủ tướng Nga Mikhail Mishustin hu panuac lac  jit ruak dalam dom harei jiak di ni dok ngak ka urang mboh biak suh sah, dom menuac ruak dok patagok di tong abih dom labik di  Liên bang Nga. Dom menuac metai jeng glong, jiak  900 urang dalam 24tuk tapa

Cty Công nghệ rilo taneh ia di Mỹ Facebook Inc harei ini khan brei thau dom labaih kurang dalam tuk salih cấu hình lac makna ba tal padeih abih dalam jaik 6 tuk, ngak brei labaih 3 tỷ 500 triệu menuac di dunya oh tame hu facebook. Bruk ini hu pasiam veik di mon 5 dah page ini (tui mon Việt Nam). Hadei di tuk pasiam veik hu bruk khut ini, tỷ phú Mark Zuckerberg – lac po Phây-búc hu panuac likau ma-ah ampuan angaok blah facebook di ong./.

Urang lang: M.P & H.Pha – 05/10/2021