Pthau mikva saong taong abih gauk!

Gam saong bruk peih ngak siam bruk pathau khan meng dom sap bangsa takik di bhum Tây Nguyên, labaih 10 thun tpa, jabat rayo sap ndom VN daok di bhum Tây Nguyên daok hu kết nghĩa saong palei B’Hốk, xã Yang Tao, huyện Lắk, tỉnh Đắc Lắc,piah pachreih mikva peih ngak siam dom sarak, jalan ngak di đảng saong karja, yam tapa kan kandah, yam tagok dalam rai diuk. Abih di nyu nan lac, barau ini, jabat hu jak ba doanh nghiệp lac công ty TNHH đầu tư dự án Mễ Trì, hu jabat di HN daong labaih 400 triệu đồng piah padang ngak sang anit ranam alin brei 5 baoh sang biak kan kandah.

Meng dahlau tết nguyên đán anek sak kara 2016, palei B’Hốk, xã Yang Tao, huyện Lắk, tỉnh Đắc Lắc taduan hu bruk bui sambai lac; hu 5 baoh sang urang bangsa takik hu alin sang tanit ranam, jabat rayo sap ndom VN daok di bhum Tây Nguyên hu pambuak bruk saong Đảng ủy, karja xã Yang Tao gam saong urang jakar palei B’Hôk pasang iek cambaih, palih ruah 5 baoh sang biak kan kandah ka sang daok piah daong. Dalam nan, baoh sang saai H’Bac The lac sa dalam dom baoh sang hu rai diuk kan kandah di abih. Dalam baoh sang sit taik tahak,huan anak, huan likuk,  3 urang anek kayua kurang mbang, ruak kik, saai H’Bac The oh tự tin tuk ndom meyai saong kapul nao pasang iek, min dalam hatai mboh bui sambai kayua jiak hu sang barau.

“Hadei di tuk mehit lac baoh sang dahlak hu angan dalam danh sách hu padang ngak sang, dalam sang uan tabuan lo. Baoh sang taik tahak dahlau daih, oh pacang hu pandiak oh caga hu hajan rambah lo. Urak ini hu sang barau siam mekre, ahcih saat piah daok baoh sang sambai lo, 2 diuk pasang ndua dhar phon rayo sap ndom VN hu ngak sang brei kol dahlak, salah sang, 2 diuk pasang hu tani tanat kham emrat ngak mbang piah raong anek nao bac, iek ruak ka anek, drei sambai lo oh thau ndom hagait”.

Lac urang joh jo, nao mai kan kandah, saai H’Hoa Bkrông daok di palei B’Hôk daok laik tame bruk lac “diuk oh hu pasang, anek oh hu ame”. Pasang metai, anek daok sit, saai galih glar nao ngak mbang pah meng hu ginup mbang, drum daok sang taik tahak. Tuk mehit kaok palei khan lac hu padang ngak brei baoh sang anit ranam, hatai saai biak chreih chrai, kayua meng ini nao oh daok dalam baoh sang taik tahak. Tranh thủ bilan pandiak, dom jang samar padang ngak, saai jeng hu daong takaong kaik, rik pren padang ngak sang di drei. Saai H’hoa Bkrông lac:

“Nao ngak dahlak tok caong abih tuk piah mai sang daong dom cei padang ngak brei salah. Sang klak taik tahak bilan hajan ye pasah abih, daok bilan pandiak ye thur mur  pandiak lo anek oh ndih hu, dua anek amaik rambah lo. Dahlak thau dhar phon rayo sap ndom VN lo, kết nghĩa thun halei jeng ba mai ka anek dahlak har kẹo, urak ini ngak sang ka dua ameik anek dahlak, 2 amiak anek mboh hanem phon lo”.

Palei B’Hốk urak ini hu 229 baoh sang gam saong jaik 900 menuac, ralo meng lac mikva bangsa M’nông. Dalam dom thun tapa, yaom lac hu bruk sangka di đảng, karja  dom pakat  mjin tal urak ini baoh sang kan kathaot dalam palei jeng daok labaih 50%. Labaih 10 thun dahlau, peih ngak sarak di Tỉnh ủy Đắc Lắc, palei B’Hôk hu dua đơn vị kết nghĩa, nan lac jabat rayo sap ndom VN daok di tây Nguyên saong sang bac Cao đẳng iamu Nghệ thuật tỉnh Đắc Lắc. Yaok thun, dua đơn vị bhian nao rivang, taom gaok, alin hadiah pandap, pachreih mikva palei kết nghĩa. Tapa nan hu daong pakhang bruk jum pataom, kham merat yam tapa kan kandah, yam tagok dalam rai diuk. Ong Y Grôn Buôn Krông - Bí thư Đảng ủy xã Yang Tao, huyện Lăk lac: 

“Đảng, karja drei hu sarak lac brei  dom đơn vị kết nghĩa mai  daong ka mikva bangsa takik cadu kan kandah. Tukvak tapa, dom đơn vị kết nghĩa saong palei  brei mboh hu labik dang di drei meng bruk harei tết, harei lễ, dom harei lễ praong ye nao rivang alin hadiah pandap, rik daong khik kajap an ninh trật tự dalam puk palei”

Tui mban jak ba tỉnh ủy Đắc Lắc, urak ini hu labaih 170 jabat, đơn vị doanh nghiệp di tỉnh saong TƯ kết nghĩa saong jaik 150 palei bhap bini bangsa takik dalam tỉnh. Dom đơn vị ini hu ralo bruk ngak daong dom puk palei patagok bruk jum pataom, tani tanat chính trị, patagok kinh tế - XH, khik ramik saong patagok dom yaom glaong ilamu hadah krah. Oh lac doanh nghiệp ngak bruk gah kinh tế bo dom đơn vị sự nghiệp jeng daong gah cơ sở vật chất meng bruk rik daong di urang jakar, nhân viên saong jak ba meng dom urang ngak pahala. Abih di nyu nan lac, meng hadei di tuk tết anek sak kara 2016 tal urak ini, jabat rayo sap ndom VN di Tây Nguyên hu padang ngak 5 baoh sang meng jien rik pataom di công ty TNHH đầu tư Mễ trì ka dom baoh sang kan kathaot daok di palei B’Hôk, xã Yang Tao, huyện Lăk lac bruk ngak biak hu makna. Amuk H’Kim Hoa Buôn Giá, akaok mban Ban Dân vận, Tỉnh ủy Đắc Lắc lac:

“Bruk daong ka mikva sang daok ngan saong dom baoh sang oh hu sang daok ye biak cần thiết, bruk ngak ini brei pambak praong tal dom jabat, đơn vị saong dom doanh nghiệp. Brei hu rilo bruk ngak piah daong ka dom urang kan kathaot ka sang daok. Dalam dom thun tapa, rayo sap ndom VN hu rilo danak dak bruk ngak bo tui taong yaom di mban dân vận tỉnh meng thun 2004 tal urak ini ye biak siam”.

 Urak ini mikva dom bangsa daok di palei B’Hôk, xã Yang Tao, huyện Lăk hu bak bui sambai jang. Kayua meng ini, hu gilac 5 baoh sang dalam palei hu daok dalam sang barau khang kajap. Dom baoh sang ini daok hu sang bac cao đẳng ilamu nghệ thuật tỉnh Đắc Lắc alih tivi tuk mai sang barau. Ini lac dom pandap bak hatai anit ranam di jabat rayo sap ndom VN daok di Tây Nguyên saong urang ngak pahala lac công ty TNHH đầu tư dự án Mễ Trì payua alin hadiah mikva, brei mboh bruk tri ân saong kak kajap haong bhap bini dom bangsa dalam luac dom pluh thun di bhum taneh ini./.