Nghệ sĩ Ưu tú Thanh Điền brei thau, tuk thể hiện rup binguk Wa, ong jeng suh sah biak rilo. Mbang ini, brei mboh veik bruk Wa Hồ daok jaik bhap bini, ong njauk sahneng duah cambaih laih, Wa caik tangin yau habar, tacei tangin atau puak bilau kang yau habar, tuk Wa daok kandang sahneng kuhria..yau habar…Tui ong, kan di abih lac ngak brei mboh hu rup binguk, hatung hatian di Wa ngan saong bhap bini. Tuk diễn, nghệ sỹ  var abih rup drei bo tuk nan lac Wa ndom, Wa tacei pato. Piah hu yau nan, ong njauk maong rilo phim tư liệu, puac biak rilo dalikan ka Wa tuk nan. Tui Nghệ sĩ Ưu tú Thanh Điền, asal kadha praong abih di vở diễn lac bruk jaik taphia bhap bini di Wa. Kayua yau nan ye, ong sahneng kuhria, ngak habar ka nyu bình dị, brei mboh hatai anit ka bhap bini, kuhria ka bhap bini di Wa. Ong khan lac, tapa vở kịch Dấu xưa, ong bac hu meng Wa bruk jum pataom bangsa, mek bhap bini ngak got dalam yaok bruk ngak, pahadah tagok hatung hatian siam mekre di Wa:

     "Nhân vật ini oh lac kanal panuac bloh tagok diễn hu. Nyu daok dalam baoh hatai, dalam darah meng brei mboh hu binah halei bo kịch bản khin ndom ka Wa. Tapa tukvak pasram ka vở diễn ini, dahlak meng mboh lac hu Wa dalam dahlak. Yaok panuac ndom, yaok động tác… Abih di nyu nan lac dalam vở kịch ini nyu ndom ka bruk jaik taphia bhap bini di Wa."

            "Dấu xưa" oh laik tame jalan thần tượng hóa. Bo Wa Hồ mboh biak anit, biak jaik bhap bin, meng ndom puac tal daok dang, brei mboh jalan sahneng, jalan diukrai siam hatung hatai di Wa. Pagap yau tuk Wa brei baoh kam ka urang cận vệ, hu sa-ai oh mbang kayua daok ngak nhiệm vụ. Wa lac brei Wa nym mbaik phao bloh lac: “Nan, Wa khik brei nan, kamuan mbang baoh kam nao!”...

            Nghệ sỹ Ưu tú Mỹ Uyên dalam vai urang ngak mbang huak, brei thau: Rup binguk Wa Hồ hu tame dalam hatung hatai di rilo rai urang Việt Nam. Bruk bac megru saong ngak tui Wa brei mboh hatai iek praong di abh bangsa ngan saong urang pan akaok ba jalan di drei. Kayua yau nan ye, tuk taduan kịch bản, sa-ai biak iek praong saong anit nhân vật Bác Hồ. Kịch bản biak jaik haong dom kadha bac megru ka jalan sahneng, jalan diukrai di Chủ tịch Hồ Chí Minh. Nghệ sỹ Ưu tú Mỹ Uyên drut drui lac:

             " Hatai anit Wa di dahlak hu meng tuk daok nao bac, meng tuk daok sit. Praong tagok, puac biak rilo harak, tapuk ndom ka Wa, maong rilo tài liệu… ye dak mboh anit Wa jang. Taphia di nan, Nghệ sỹ Ưu tú Thanh Điền tame vai Wa biak siam. Ngak ka dahlak mboh yau drei oh daok di sân khấu, bo yau hu taom gaok Wa biak biai."  

            Tabung glaong di vở diễn lac labik brei mboh veik bruk urang jakar huyện quan liêu, thu hồi taneh ngak thủy lợi mn jalan ngak oh gheih, oh siam, ngak ka bhap bini pandik hatai. Tapa nan, urang maong sahneng tal dom kadha daok duh hata diharei ini, rilo urang jakar nao suan jalan, ngak suan jalan di Wa Bác. Nghệ sỹ Chánh Trực, urang tame vai Chủ tịch huyện – lac menuac phản diện dalam vở diễn brei thau: vai diễn brei mboh hatai jhak dom dom urang jakar nan lac, tuk ba dom sarak di Đảng tame raidiuk tui jalan cứng nhắc, quan liêu hách dịch nan ye bhap bini pandik hatai. Ong chủ tịch huyện nan daok lac menuac hình thức, lãng phí, xu nịnh tuk ba tabiak bruk raok Hồ Chủ tịch mai rivang… Nghệ sỹ Chánh Trực lac:

             "Wa Hồ tapa ndom puac, daok dang hu pato ka urang jakar oh siam ini dom kadha biak đích đáng. Lac tuk ba jalan ngak njauk di Đảng, Karja, Rajaei tame raidiuk ye brei ngak ka nyu njauk, ka nyu siam, lagaih piah hu bhap bini pachreih tui. Ngan saong urang jakar, praong di abih lac daok jaik bhap bini, hu bhap bini jia, anit, saong nan lac urang hacih, patih."     

            Taong abih dom nghệ sỹ hu mbaok dalam vở diễn "Dấu xưa", meng dom nghệ sỹ praong thun yau đạo diễn Nghệ sỹ Ưu tú Trần Minh Ngọc, diễn viên chính Nghệ sỹ Ưu tú Thanh Điền, Nghệ sỹ Ưu tú Mỹ Uyên... tal dom diễn viên daok ranaih jeng caik rilo hatung hatian biak biai ka vai diễn di drei. Nan ye vở diễn nyu ngak megei tal baoh hatai urang maong, daong ngak brei paglaong chất lượng bruk jak ba bac megru saong ngak tui jalan hadah krah siam mekre di Chủ tịch Hồ Chí Minh tui jalan di Chỉ thị 05 di Mintri Chính trị urak ini./.