Dom harei ini, bein mai di sa-ai Nguyen Thanh Hà daok di phường Hiệp Bình Chánh, quận Thủ Đức, Ban raya HCM lac sa dalam dom  bein bingu hu rilo urang vaih tame rivang di abih, kayua mai labik ini hu biak rilo baoh bingu jaik pachoh, bo tui dom urang pala bingu lavik thun lac bingu ini meda pachoh njauk harei 1 bingun Tết piah raok thun bahrau. Meng ilamu 20 thun pala bingu, thun ini saai Hà pala jaik 1.000 phun mai piah pablei Tết, ralo meng lac mai ghép giảo Thủ Đức. Kayua langik pandiak hajan oh lagiah, rilo po bein daok huac mai chroh bingu dahlau Tết. Min meng bruk kuhria caga tani tanat saong hu jalan langyah sumu nan ye bein bingu mai di sa-ai Hà oh njauk hagit, daok cang pablei tuk Tết ba mai rilo kein laba. Sa-ai Nguyễn Thanh Hà khan lac:“ Biak glaih glar kayua phun mai harei halei jeng brei pruh ia tui yaok phun nyu. Phun halei praong, khang kajap ye  pruh rilo, phun halei lavang ye takik pruh. Pruh jru, buh khak. Meyah kuhria tal tukvak ini langik yau nan, lac lagaih, thun ini phun mai biak mekre, bingu chroh nerang mekre. Caong pablei hu yaom glaong.”

 Ngan saong bhap bini gah Meraong, taphia phein bingu mai kanyik katam ye bingu phong lan jeng lac sa janih bingu mekre dalam dom harei me-in xuân. Dom janih lan yau Hồ Điệp, Mokara, Đen rô, Ngọc Điểm tuk halei jeng hu urang ban raya takre  abih, kayua lan Hồ Điệp gam mere gam khik hu lavik; lan Ngọc Điểm pahe rilo; Đen rô saong Mokara ye biak rilo sambo mau.

Meng ilamu pala bingu lavik thun, saong daok lac sa urang nong pala lan naih joi di Ban raya HCM, ong Nguyễn Văn Hoàn, po bein lan praong labih 5.000 met vuong di huyen Bình Chánh brei thau: “Dahlak bhian pala bingu lan Đen rô, bein di dahlak bhian pablei phein bingu oh pablei dhar bingu saong ba nao pablei ka dom tỉnh karei dalam taneh ia, urang tame tal bein blei. Darak pasar tết thun ini dahlak mboh hu rilo janih lan, bingu lan di khol dahlak pablei ka dom tỉnh bhum Pei negar y eurang biak takre blei bingu lan Bình Chánh, bingu nyu biak siam. 

 Langiu phun mai saong dom janih bingu lan, darak bingu tet di Ban raya HCM daok hu rilo janih bingu karei hadah tanyak yau: bingu cúc, vạn thọ, sống đời, mồng gà…Tui yaok janih pajaih bingu bo dom po bein kuhria brei trun pajaih, iek glang ka nyu lagaih piah tabiak bingu njauk tuk Tết. Sang sa-ai Văn Thành Sỹ daok di palei 5, xã Đông Thạnh, huyện Hóc Môn urak ini pala labaih yaok pluh ribau phein bingu sap janih piah pablei Tết thun ini. Dut saong thun blaoh, thun ini sa-ai pala tagok dom rituh phein tra, ralo lac bingu sống đời, vạn thọ, cúc, hướng dương…Piah bingu chroh nerang njauk tuk Tết, sa-ai Sỹ brei uk bau ging, khak dahlau meng 2, 3 bilan piah buh tame giỏ, phein meng pala phun. Daok bingu van thọ, meyah pala  bau ging birau ye phun bingu kanjik saong suai chroh bingu dui atah tal tuk tapa Tết. Sa-ai khan lac:“ Thun ini suai  hajan langik oh hu lagaih hadom, suai jang dom thun. Min thun ni  bingu hu yaom jang dom thun dahlau kayua pluh urang ye hu 6, 7 urang hu bingu pablei njauk tukvak, daok veik bingu khut kayhua lingik tasik

          Tuk ban raya daok pamaong tal bruk ngak nong đô thị, ye biak caong hu bruk pambuak gauk di dom po ngak bein jeng yau dom sarak  daong  piah ba phun lan di Ban raya hu angan je, oh lac dalam taneh ia bo daok par atah tal gah langiu. Nan jeng lac bruk caong khin akok thun di dom urang pala  bingu saong gah ngak nong Ban raya HCM. Ong Nguyễn Văn Trực, Pho akok Sở Ngak nong saong patagok palei pala Ban raya HCM lac: “Ban raya HCM jeng mboh lac, bingu lac sa dalam dom kaya pandap praong nan ye bruk daong ka urang pala bingu, ngak bingu di Ban raya HCM ye Sở Ngak nong saong patagok palei pala lac sa dalam dom gah meda daong gah sarak piah ka urang ngak siam bruk pala lan jeng yau urang pala bingu dalm tuk tết atau dalam thun.”

Meng tari tarieng, oh huac glaih glar gam saong hu tangin gheih ngak, akok hadah krah, dom po bein daok ba pren yawa kham nagk ka yaok phein bingu kiểng, saong hatai caong hajan siam hangin lagaih, phun chroh bingu njuak tuk tết, ngak brei bilan bingu mek hu rilo jien laba jeng yau bilan xuân hu rilo sambo màu mekre hadah. Meng yaok dhar bingu lan, mai saong dom janih bingu karei yau: vạn thọ, cúc… meng dom palei pala bingu hu ngan je di ban raya daok pakacah gauk rak tabiak sambo mau, par pahe ba mai ka urang dom tukvak bui sambai dalm sa bilan xuân thun birau./