Dalam dom thun tapa, Sarak 30a thun 2008 di Rajaei, Quyết định 71 thun 2009, Nghị định 61 thun 2015 saong Quyết định 1722 thun 2016… hu tame dalam raidiuk, hu langyah meneing dom kan kandah bo urang kan kathaot daok tavak angaok jalan kham merat yam tagok tabiak truh kan kathaot. Oh lac daong ngak brei salih bahrau jalan sahneng dalam bac bruk, pabak ilamu, tác phong ngak bruk công nghiệp di bhap bini bhum kan kandah, bo dom sarak ini daok peih tabiak jalan ka mikva hu tabiak negar lingiu ngak bruk dalam môi trường bahrau, tabiak truh bruk ngak mbang sit sot meng livik mai di puk palei. Yau ye bruk di urang likei dam bangsa Mông angan Giàng A Tắc daok di xã Sín Chén, huyện Si Ma Cai, tỉnh Lào Cai nao Japon tui Quyết định 71 di Thủ tướng Rajaei: 

          Adei hu karja daong nan ye adei oh mesraiy jien di gilang pariak. Adei nao tui gah padang ngak sang danaok, jien bilan meng 25 tal 30 triệu sa bilan. Kuhria abih tih jeng hu 5-600 triệu. Tuk nai sang adei blei radaih tải piah peih saong ngak sang.

Oh lac padang hu sang, raong anek bhik nao mbang bac, rilo urang sang kan kathaot, urang bangsa takik nao ngak bruk di negar lingiu tuk mai veik jeng salih jalan sahneng, jalan ngak, meng nan salih jalan diukrai. Rilo urang hadei di tuk mai veik hu bac megru paglaong ilamu piah ngak dom bruk yau ye kỹ sư, urang jakar quản lý. Ngan saong sang sa-ai Trần Thị Huyền haong sa-ai Trần Xuân Dương, daok di xã Khang Ninh, huyện Ba Bể, tỉnh Bắc Kạn ye nao ngak bruk di negar lingiu hu daong ka sang di dua sa-ai tabiak truh kathaot bo daok peih tabiak jalan ngak kaya meda meng jien patak pataom di dua sa-ai hadei di 4 thun nao ngak bruk di Đài Loan (Trung Quốc). Sa-ai Trần Thị Huyền khan lac:

Nao ngak bruk di negar lingiu yaom lac glaih glar min drei bac megru hu rilo janih ka jalan ndom puac daok dang atau jalan ngak mbang di urang, ba mai ka drei ilamu diukrai piah tuk mai sang ngak nyu mbuan lagaih jang.

Tui pathau khan di Mintri Lao động Thương binh saong Xã hội, tal urak ini hu yaok pluh ribau urang di sang kan kathaot, urang bangsa takik nao ngak bruk di negar lingiu. Urang di dom huyện kan kathaot nao ngak bruk di negar lingiu rilo meng ngak dom bruk lac: Sản xuất chế tạo, padang ngak sang danaok, pala drak, ngak ikan saong daong bruk sang…..haong jien bilan tani tanat. Meng bruk daong jien di Karja, urang dalam sang sarak karja nao ngak bruk di negar lingiu oh bayar jien hagait piah ngak harak gar, piah hu pato pakai dahlau di tuk nao, tok bayar jien dịch vụ tui yaok darak pasar, Hadei di tuk salah hợp đồng mai veik taneh ia (tukvak 3 thun, urang patak pataom hu takik di abih lac labaih 100 triệu đồng. Meng hu yau nan, jaik 60 tal 70% sdom sang hu urang nao ngak bruk di negar lingiu hu tabiak truh kan kathaot.

 Ong Nguyễn Gia Liêm, phó cục trưởng Cục Khik iek urang ngak lingiu negar (Mintri Lao động thương binh saong Xã hội) brei thau: Dalam dom thun jaik di ini, darak pasar urang ngak hu peih praong ka urang ngak di dom huyện kan kathaot, urang dalam sang sarak karja. Dahlau daih, urang ngak di dom bhum kan kandah rilo meng nao ngak di Trung Đông saong Malaixia, min jaik di ini, Japon saong Hàn Quốc hu taduan rilo urang ngak daok dalam huyện kan kathaot di Vệt Nam. Tukvak nao oh lac hợp đồng 3 thun atau 5 thun, bo urang ngak meda nao ngak dalam tukvak katut panak, saong yaom jien bilan siam. Ong Nguyễn Gia Liêm brei thau:Urak ini, Japon lac darak pasar praong, taduan rilo menuac ngak saong daok taduan urang nao ngak gah pala drak, oh caong hu ilamu glaong, jien chi phí nao jeng oh rilo. Tukvak tapa, rilo urang nao ngak tui danak dak ini jeng mboh hu siam mekre.

Maong iek veik bruk ba urang nao ngak di negar lingiu, ba urang di huyện kan kathaot nao ngak bruk di negar lingiu dalam dom thun tapa brei mboh lac daok hu dom tavak tavaiy. Min bruk siam mekre hu mboh di anak meta lac rilo sang praong, mekre hu padang tagok di dom puk, palei kan kathaot. Rilo sang hu jien peih praong bruk ngak mbang, pablei salih. Rilo urang dauh hu bruk ngak tani tanat, tabiak truh kan kathaot khang kajap meng ilamu saong trình độ tay nghề hadei di tuk nao ngak bruk di negar lingiu mai veik./.