Menek tabiak oh hu dua plak tangin, min Y Julye di palei Kon Đrei, xã Đăk Blà,  ban sit Kon Tum, tỉnh Kon Tum kham merat yam tagok. 3 thun, thau mek takai saok lisei huak, 5 thun ndok tame bac mẫu giáo… Bloh bruk crah tagei, rao mbaok, cuk khan ao, pilih njam, tuh ia… Y Julye jeng eng drei ngak meng dua gah takai.

Meng tal 1 tal tal 3 bac di palei, Y Julye daok di palei Kon Đrei, xã Đăk Blà, ban sit Kon Tum, tỉnh Kon Tum.  Tagok tal 4, tal 5 bac di sang bac Tiểu học Bế Văn Đàn, tame tal 6 njauk tabiak tal sang bac Trung học cơ sở Lê Đình Chinh daok di pasak xã…Jalan nao tal tal bac atah tui thun bilan, bruk bac da-a jeng dak harei dak glaih glar jang kayua tukvak daok di tal bac dak rilo jang, bac megru rilo jang… min kamuan jeng chreih chrai, tari taring nao bac. Amaik Y DJoan di Y Julye khan lac: “Tuk halei ruak trak, oh daok la hu, nyu meng padeih bac. Abih ruak ye nyu nao bac chip. Mboh anek takre bac lô, nan ye glaih glar yau habar amaik ame jeng kham merat brei anek nao bac…”-

Thun bac 2016 -2017, Y Julye daok bac tal 9, Sang bac Trung học cơ sở Lê Đình Chinh mboh glaong tabiak saong hu ralo darah jang. Mbaok meta gheih mekre. Hu brei daok la  bàn anak abih dalam tal bac, Y Julye  biak sangka pang gru pato tacei.  Y Mu, daok la tapen Y Julye khan lac:  “Julye taring bac lô, bài halei jeng thuộc, jeng kanal. Tuk khin ndom hagait, pandar adei lac haongh anai gru”

Nguyễn Thị Kim Anh- anai gru chủ nhiệm tal 9C, Sang bac Trung học cơ sở Lê Đình Chinh brei thau, lac anek saih đặc biệt, Y Julye  hu gru saong ayut anek saih anit ranam.  Piah ba mbuan lagaih ka adei, dom gru hu ngak brei ka adei sa bộ bàn ghế karei, min Julye oh khin. Adei khin daok la bac yau dom ayut. Vak meng takai, yaom lac suai jang, min adei vak biak cambaih laih, harak, tapuk tuk halei jeng hu khik siam, hacih. Y Julye  lac: adei oh ka joi yau ayut, min adei kham merat bac da-a, piah tapa thun hu tagok tal 10, hu nao bac haong ayut sahabat.

Harei hadei siam mekre daok cang raok Y Julye , adei hu takai thau vak, yam tagok meng kham merat di drei. Angaok jalan nao nan, daok hu oh takik kan kandah, min jia lac, daok hu rilo menuac klah rabha dom kan kandah haong adei./