Yaom menuk di Dong Nai trun dalam kayua duh hatai jit kum 

      Hadei di yaom patei, yaom pabui laik khang, urang nong Đồng Nai daok khat lihik praong kayua yaom menuk trun biar di abih kuhria dalam 4 thun mai ini. Anak bruk mehit lac, yaom menuk trun kayua menuk dalam taneh ia oh meriak gauk hu saong menuk đông lạnh blei tame di taneh ia langiu, lambaok Hiệp hội raong glang Đồng Nai brei thau : makna praong oh njauk lac kayua menuk Mỹ, bo kayua darak pasal anak bruk mehit lac hu jit kum. Kadha vak di Xuân Lượng, urang vak di rayo sap ndom VN daok di ban raya HCM.

      Meng hadei tết Nguyên đán tal ini, yaom menuk ralo di Đồng Nai trun hamiet. Urak ini, menuk balau mbong daok di tanut 12.000 đồng tal 14.000 đồng/sa kg, menuk tam hoàng jeng daok di tanut 19.000 tal 20.000 đồng/sa kg. Dreih yau nan, yaom baoh menuk jeng trun biar, tok daok meng 800 đồng tal 1.100 đồng/ sa baoh. Yaom ada jeng daok jaik 26.000 duk saong 46.000 đồng sa kg dahlau thiah.

     Di huyện Thống Nhất, libik raong menuk ada praong abih Đồng Nai ngan saong tapol abih tih jaik 2 triệu drei, dom harei tapa, urang raong tuk halei jeng duh hatai yau daok angaok apui, kayua yaom menuk trun biar bo oh hu menuac mai blei. Saai Nguyễn Sơn Lâm daok di ấp Nguyễn Huệ, xã Quang Trung, huyện Thống Nhất raong labaih 10.000 drei menuk tam hoàng, saai hu nao ieu urang mai blei min oh hu menuac blei. Raong veik ye jien blei pandap mbang, pren pasang iek jeng tagok dalam tuk menuk praong abih, kan si tagok kilo. Piah trun takik khat lihik, saai Lâm njauk pablei lẻ. Saai Nguyễn Sơn Lâm lac : Tui yaom menuk yau urak ini, urang raong khat trak, kayua phun jien drei raong meng tuk menuk sit tal praongabih jaik 50 ribau. Pablei nao oh ginup jien drei blei cám raong nyu, meyah bruk ini daok rah tabiak, urang raong rambah lô, oh daok jien piah raong veik”.

     Min tapol menuk tal labaih 10.000 drei, ba nao pablei lẻ, meyah pablei hu ye saai Lâm abih rilo tukvak. Jien ka yaok kg menuk urak ini jaik 30.000 đồng, dalam tuk pablei tabiak tok 20.000 đồng. Khat jaik 10.000 đồng yaok kg, tapa nan brei mboh bruk kan kandah bo urang raong glang daok gaok njauk. 

      Anak bruk mehit lac, yaom meuk trun biar lac kayua menuk đông lạnh blei meng Mỹ mai biak lap, jaik 7.000 đồng/sa kg, ông Nguyễn Kim Đoán, Phó akaok Hiệp hội raong glang Đồng Nai brei thau : panuac nan oh njauk abih.  Ông Đoán lac, makna praong nan lac mehit  jit kum menuk ada ngak ka urang blei mbaiy mbaok saong ralo menuk. Anak meta mboh lac, tok sa harei hadei di tuk mehit lac hu jit kum menuk ada saong mbuan pambak khang dalam tneh ia, tuk nan yaom menuk trun, meng 36.000 đồng trun daok 26.000 đồng/sa kg saong daok trun tal tanut biar di abih yau urak ini (20.000 đồng/sa kg). Ông Nguyễn Kim Đoán lac : “Meng harei nan tal ini, dom phương tiện thông tin đại chúng jeng ndom lac H7N9 độc lực glaong yau nan, ye yaom menuk nyu trun biak biar. Lac kayua mehit hu jit kum nyu ngak ka  menuk ada jeng trun abih.”

     Jeng tui Phó akaok Hiệp hội raong glang Đồng Nai Nguyễn Kim Đoán, piah plaih bruk trun yaom menuk biak biar yau urak ini, sui livik, urang raong glang njauk padang ngak hu jalan ngak mbang an toàn, oh brei rah tabiak jit. Gah khik ramik njauk patagok bruk daong urang raong glang, khik caga hu chuỗi blei pandap tabiak darak pasal an toàn, padang hatai jia di urang blei; langyah catang pandap blei tame lậu, pandap oh siam oh khik hu chất lượng. Tuk nan, hatai jia tame menuk Việt meda hu pasiam veik, taphia nan pasiam hu gam gah raong glang dalam taneh ia daok bấp bênh yau urak ini./.

 Thúy Linh