Dom urang pal akaok Đảng song karja dok ginum biai 

Yau khol dahlak hu khan brei thau bloh, dah page ini 20/10,  Mbang nyaom ka 2, Quốc hội mbang XV hu peih tabiak praong prang tui jalan ginum biai online tapa  Rayo papar bingukmeng Hội trường Diên Hồng, Sang Quốc hội tal 62 Kapul urang QH dom tinh, bal di Trung ương. Di mbang peih mbaok, dom urang daok par akaok,  urang dahlau daih par akaok Đảng, Kanja, urang Quốc hội, dom tuai da-a hu caik tabiak sa minit hadar tal bhap bini, urang jakar, urang lin metai lahik kayua jit praong COVID-19. Dalam panuac ndom puac peih mbaok mbang nyaom, akaok Quốc hội Vương Đình Huệ  pok mayaom, taong yaom glaong bruk kham marat, tacei pato biak catang di Rajaei; iek praong, thau dhar phol dom kham marat, rik daong praong, dom bruk ngak siam gheih di bhap bini, urang jakar, urang lin saong doanh nghiệp;  dhar phol bruk pachreih tui,  daong ba hu siam makre di bhap bini drei daok di taneh ia langiu saong ayut sahabat dalam bruk pacang caga jit praong COVID-19. Tapa kan kandah, hatai jumpataom gaok, anit ranam taneh ia, anit ranam bhap bini, hatung hatian khang kadang oh huac glaih glar di bhap bini drei, taneh ia drei dak cak rok patagok glaong jang tuk halei karei.

Sở Công thương ban raya .HCM hu harak payua UBND ban raya cong brei adat  dom  labik  pablei pandap mbang menyum di ban raya hu peih pabah mbang  yau dahlau daih. Tui nan, Sở Công thương ban raya cong brei ka dom kuan hu pablei veik meteh prein di nyu, kreih pabah mbang dahlau di  mon 9 melam; dom bàn mbang menyum oh tapa  2 urang, saong brei atah di gauk  takik di abih  2m. Dom labik pablei salih brei pabak ginup bruk pacang caga jit di gah  y tế song tui  bruk tong yaom pacang caga jit di dom labik pablei pandap mbang menyum, labik pablei pandap panda di ban raya. Daok dom labik pablei mbia,  alak  oh ka hu adat peih pablei.

Anak bruk hu rilo tinh, bal brei pacadu bruk patakik nao mai, piah pabak bruk caong nao mai di tuai damuai, Vietnam Airlines Group hu: Vietnam Airlines, Pacific Airlines saong VASCO daok kham marat ngak pasiam jaik abih gah par dalam taneh ia hadei di harei 20/10. Tui nan, meng harei 21/10 - 30/11, Vietnam Airlines Group kuhria peih jaik 40 jalan par di dalam taneh ia, jaik samu abih jalan par dahlau di tuk jit COVID-19 tamuh tabiak dalam thun 2021. Dom hãng kapal haoh meda peih pambang pablei ve ka rilo manuac, tui kuhria lac dalam harei ini, hadei di tuk hu adat di jabat chức năng. Tui kuhria, Vietnam Airlines Group meda peih labaih 90 mbang par sa harei meng harei 21/10, hadei di nan tagok jaik 120 mbang par  sa harei meng puac bilan 10 tal bilan 11.

Mesup ni  20/10, Pasak pasang iek ruak kik tỉnh Bạc Liêu brei thau, dalam 24 tuk tapa, tỉnh hu 100 urang tapa duh iek  RT-PCR mboh lac  dương tính song vi rút SARS-CoV-2, dalam nan hu tal  50 urang jeng lac urang ngak di  Công ty TNHH Thủy sản Tấn Khởi daok di khóm 2, phường 1 ban sit  Giá Rai.   Tui kuhria mboh di gah chức năng, sruh jit di Công ty TNHH kaya ikan  Tấn Khởi biak srau kadau, urak ni oh ka thau cambaih ruak njaom mbak meng halei mai.  UBND ban sit Giá Rai brei pacang veik, brei dok karei  di Công ty TNHH kaya ikan Tấn Khởi. Urak ni, gah chức năng dok pasang iek, mek  mẫu duh iek dom urang taom gaok song dom  F0 di công ty kaya ikan ni.

Jeng dalam dah page harei ini, 244 anek saih tal bac 1, 2, 6, 9, 12 di xã đảo Thạnh An, huyện Cần Giờ, Ban raya HCM hu mai veik sang bac hadei di sa tukvak biak suai lavik padieh bac saong bac online kayua jit ruak. Ini lac dom anek saih camriep di Ban raya HCM hu nao bac tapak di sang bac tuk Ban raya daok pasang iek hu jit ruak.

Rajaei Indonesia bahrau patabiak sarak hu pandar meng harei  19/10 tal harei  2/11, tui nan tuai nao kapan haoh  njauk pasang iek  PCR mboh lac âm tính song COVID-19 hu duh iek dalam 48 tuk dahlau di tuk par, dalam nan hu gam dom urang hu klauk vaccine ginup. Dalam dom adit jiak di ni, urang njom bahrau COVID-19 di Indonesia trun khang dok ala  1.000 urang yaok harei, rilo labik oh dok urang halei metai . Min, Rajaei  Indonesia dok huac lac jit ruak sa mbang tra tamuh khang hadei di tuk Noel song uan raok thun bahrau anak tal, tuk menuac urang nao mai dalam taneh ia tagok rilo.

Rajaei Anh brei thau daok tui iek sa biến thể phụ di chủng Delta mboh yau daok tagok dalam dom urang njom COVID-19. Urang brei panuac di Thủ tướng Boris Johnson brei thau, Rajaei Anh daok tui iek catang biến thể hu angan AY.4.2 saong daok caga ngak bruk mayah njauk ngak, min ndem viek lac ka oh mboh bruk hagait brei mboh biến thể ni njom mbak mbuan jang. Bruk njom mbak jit ruak COVID-19 di Anh jeng daok rahtabiak sarau kadhau, yaom lac hu biak rilo urang hu klauk vaccine blaoh. Harei 19/10, Anh mboh 43.738 urang njom bahrau. Dom urang metai dalam harei tagok tal 223 urang, lac glaong di abih meng di bilan 3 tal urak ini.

83 boh sang chung cư pakat glaong  njauk pui khuah ralai dalam mbang khuah praong di saboh mesup  harei 19/10 (tui tukvak pak ni) di ban  Boulder, bang Colorado (Mỹ), atah di pasak Denver di bang labaih 48 km nao gah  Tây Bắc. Yaom lac oh hu urang halei metai, min pui khuah bak dom boh sang rah tui  phố Pearl dane angan di Boulder, dok jiak labik hu angan je abih di ban kaya meda  Pearl Street Mall, sa pasak pablei salih brei ka urang nao takai  gar prong 4 boh sang. /. 

Urang lang: Hanipha- Thu Thảo -20/10