Dŭm hruê anei, sang êpul êya ƀuôn Ea Kjoh A, să Ea Drông, wăl krah Ƀuôn Hô mơak mñai kyua ênai čing hlăm klei bi tuôm, bi kƀĭn ƀuôn. Y Bon Niê (Aê H’Luin), Khua dlăng bruă Đảng ƀuôn Ea Kjoh A brei thâo, leh giăm 3 thŭn hmăi kyua klei ruă tưp, ară anei ƀuôn mrâo mâo gưl bi tuôm ênŭm ênap. Y Bon lŏ hdơr, wưng anei thŭn êlâo ai êwa hlăm ƀuôn ênguôt êưn. Hlăm gưl klei ruă Covid-19 thŭn 2021-2022, ƀuôn hmăi kjham, bi ktlah hjăn, kwang dar lu hruê. Kyua mâo klei đru mơ̆ng dŭm êpul mâo ao tie kmah, klei đru mơ̆ng dŭm anôk mjĕ mjing hŏng ƀuôn anăn mnuih ƀuôn sang mâo mnơ̆ng ƀơ̆ng huă, braih huă čiăng hgao wưng dleh dlan.

 Ktrâo kngan hlăm tač bê tông ti anăp sang kƀĭn ƀuôn, Y Bon hơ̆k mơak brei thâo, anei jing hdră bruă kyua dŭm anôk bruă mjĕ mjing đru rŭ mdơ̆ng hŏng prăl bi liê 15 êklăki prăk, mnuih ƀuôn sang hlăm ƀuôn đru mguôp hruê ai čiăng bi leh. Dŭm anôk bruă mjĕ mjing lŏ đru ana mjeh, mnơ̆ng rông čiăng mđĭ kyar bruă duh mkra. Kyua anăn klei hdĭp mnuih ƀuôn sang hlăm ƀuôn mâo lu klei bi mlih. Y Bon lŏ brei thâo:

            Leh boh klei ruă tưp dưi mkhư̆ snăn ƀuôn sang mơak snăk, dưi nao tinei ti dih, mnia blei ti dŭm krĭng, duah thiăm prăk hrui wĭt čiăng mkra mđĭ klei hdĭp mda. Msĕ si thŭn anei snăn ăt mâo lu klei bi mlih hĭn, kphê snăn mâo ênoh hĭn, mnuih ƀuôn sang hnêč nao pĕ khpê mưn snăn mâo thiăm prăk hrui wĭt, mnuih ƀuôn sang mơak kyua mâo thiăm klei găl čiăng kriê dlăng kơ gŏ sang.

 Hlue si hdră bi mjĕ mjing plah wah dŭm anôk bruă hŏng dŭm boh ƀuôn mnuih ƀuôn sang djuê ƀiă, mơ̆ng thŭn 2006 truh ară anei, ƀuôn Ea Kjoh A bi mjĕ mjing hŏng 4 anôk bruă ti wăl krah Ƀuôn Hồ jing Kahan ksiêm wăl krah, Anôk phat kđi yang ƀuôn wăl krah leh anăn 2 sang hră gưl 1. Grăp thŭn dŭm anôk bruă khăng mkŏ mjing nao čuă, mđup brei mnơ̆ng, đru kơ mnuih ƀuôn sang mdĭ kyar mkra mjing, mkŏ mkra dŭm hdră bruă êpul êya, sang dôk, mkŏ mjing klei hlăp lêñ. Thiếu tá Phan Thị Thúy Hằng, Khua Êpul kđi čar nah tluôn, Kahan ksiêm wăl krah Buôn Hô brei thâo, hŏng bruă klam khua êpul bi mjing, anôk bruă tiŏ nao knuă druh nao ti anôk mjĕ mjing čiăng bi hgŭm hŏng gưl bruă đảng, anôk bruă kriê dlăng leh anăn mnuih ƀuôn sang hlăm ƀuôn.

            Anôk bruă kriê dlăng, Khua dlăng bruă Đảng leh anăn phung hlăm ƀuôn snăn mâo klei blŭ hrăm jêñ jêñ hŏng Khua gĭt gai kahan ksiêm wăl krah, bi trông, mkăp klei hâo hưn jêñ jên. Mơ̆ng anăn snăn khua gĭt gai dŭm anôk bruă ăt păn kjăp klei hâo hưn kơ boh klei ti alŭ wăl čiăng đru ăt msĕ mơh pŏk ngă bruă djŏ tuôm kơ klei êđăp ê nang. Boh klei êđăp ênang dưi rơ̆ng jăk, ka mâo ôh klei amâo jăk.”

 Klei êđăp ênang dưi krơ̆ng, klei hdĭp mnuih ƀuôn sang dưi kjăp. Hŏng klei mđing dlăng đru mơ̆ng dŭm anôk bruă, mnuih ƀuôn sang hlăm ƀuôn Ea Kjoh A ƀrư̆ mơak tĭng kơ klei buh ƀơ̆ng, mđĭ kyar bruă duh mkra hlăm thŭn mrâo. Ayŏng Y Đam Niê, ti ƀuôn Ea Kjoh A brei thâo:

Hgao klei dleh dlan mơ̆ng Covid-19 snăn hmei lŏ gĭr ktưn mă bruă knuă, kriê dlăng đang pla mjing, pưk hma čiăng kơrŭ wĭt bruă duh mkra, hơĭt klei hdĭp mda. Hlăm thŭn mrâo snăn ăt gĭr ktưn, čang hmăng mâo sa thŭn mrâo mă bruă jăk hĭn, pŏk mlar mkra mjing, pla thiăm dŭm mta ana mâo ênoh yuôm mđĭ prăk hrui wĭt kơ gŏ sang, rông ba anak čô hriăm hră.

 Ti wăl krah Ƀuôn Hô ară anei mâo 111 anôk bruă dưi mbha 28 êpul bi mjĕ mjing hŏng 28 alŭ, ƀuôn, Mơ̆ng bruă mjĕ mjing đru mđĭ bruă mtrŭt mjhar mnuih ƀuôn sang, hâo hưn kơ mnuih ƀuôn sang ti dŭm alŭ, ƀuôn. Nguyễn Thị Khánh Hồng, K’iăng Khua Anôk bruă čung ba mnuih ƀuôn sang wăl krah Ƀuôn Hô brei thâo, čiăng bi mjĕ mjing mâo klei tŭ dưn, hlăm thŭn êgao, wăl krah mâo leh hdră kčah klă klơ̆ng, jao hnơ̆ng lvvah kơ dŭm êpul mjĕ mjing hŏng bruă klam msĕ si đru kriê dlăng kơ hđeh sang hră ƀun hgao klei dleh dlan, đru gŏ sang dleh dlan mđĭ kyar bruă duh mkra, iêô jak mnuih ƀuôn sang hgŭm blei hră ênua mdrao mgŭn, blei hră ênua mdrao mgŭn mđup kơ phung dleh dlan.

Bruă mjĕ mjing anei dưi mjing tal sa jing klei bi mguôp plah wah gưl bruă Đảng hŏng bruă sang čư̆ êa alŭ wăl ăt msĕ mơh mnuih ƀuôn sang ti alŭ wăl, si ngă čiăng kơ mnuih ƀuôn sang thâo săng Đảng, Knŭk kna pô mđing dlăng kơ mnuih ƀuôn sang. Ênao anăn snăn pô mđing thiăm kơ bruă đru kơ mnuih ƀuôn sang mđĭ kyar bruă duh mkra. Đăo sĭt tơdah pŏk ngă bruă anei sa wưng anăp truh snăn srăng mâo thiăm lu gŏ êsei ƀun srăng tlaih ƀun, pô dưi bi mguôp snăn bruă hâo hưn, mtô mblang, mtrŭt mnuih ƀuôn sang mkŏ mkra krĭng ƀuôn sang mrâo snăn jăk hĭn, ênưih hĭn.

 Bruă mjĕ mjing hŏng dŭm ƀuôn sang ti Dak Lak ba leh klei tŭ dưn jăk, đru mkra mđĭ bruă kđi čar, hyuă kjăp klei bi hgŭm plah wah dŭm alŭ, ƀuôn hŏng dŭm anôk bruă. Mơ̆ng anăn đru yuôm bhăn hlăm bruă răng kriê kjăp kơ klei êđăp ênang kđi čar, ala ƀuôn, mkra mđĭ klei bi hgŭm jih jang djuê ana./.