
Lơh jăt jơnau sồr bơh Thủ tướng Cíñ phủ dê bè broă pơn jăt tai lơh pràn broă tơn jơh hìu ing, hìu ồm sèt ñhăt dà mìu tàm gùt lơgar, tus ngai 6 nhai 2 nam 2025 càr Kon Tum geh 369 nơm hìu ing, hìu ồm sèt ñhăt dà mìu, tàm hơ̆ kờñ lơh pa 2 rơbô 186 nơm hìu mờ lơh niam wơl 566 nơm hìu.

Kờp jơh khà priă nàng càr Kon Tum tơn jơh hìu ing, hìu ồm sèt ñhăt dà mìu là rơlao 141 tơmàn 500 tơlăk đong mờ tŭ do càr gam ờ tơl rơlao 54 tơmàn 700 tơlăk đong. Geh bơta lơh gơtìp broă càr Kon Tum ờ tơl priă nàng tơn jơh hìu ing, hìu ồm sèt ñhăt dà mìu tài khà hìu làng bol kờñ tơn jơh hìu ing, hìu ồm sèt ñhăt dà mìu gơguh 1 rơbô 214 hìu pơn drờm mờ cồng nha sền wơl dơ̆ sơnrờp. Mùl màl cồng nha sền wơl dơ̆ sơnrờp là 1 rơbô 538 hìu mờ dơ̆ tơnơ̆ là 2 rơbô 752 hìu geh hìu ing, hìu ồm sèt ñhăt dà mìu kờñ geh lơh pa mờ lơh niam wơl. Jăt Mpồl sồr lơh tơn jơh hìu ing, hìu ồm sèt ñhăt dà mìu càr Kon Tum đơs, tŭ do priă dong kờl bơh Dà lơgar bal mờ priă bơh càr dê mìng rơ̆p geh tơl 61% khà priă kờñ nàng càr tơn jơh hìu ing, hìu ồm sèt ñhăt dà mìu.
Viết bình luận