Lŏ Phạm Thị Phương Đông, lơh broă gah atbồ priă jề Hìu bơsram kấp I Y Ngông, ƀòn drà dờng Buôn Hồ, càr Dăk Lăk neh 5 nam do kis bal mờ kòp ờ pràn leh. Lơh broă tàm hìu bơsram ndang, pah poh lŏ tus Hìu sơnơm ƀòn drà dờng Buôn Hồ nàng jồr mhàm, lŏ là cau lơh broă tờm tàm hìu nhă dê, tŭ bơklao lŏ lơh broă suơn sre mờ lòt lơh broă ơpah ngài hìu. Dờp geh pang sră tềm pềr priă 5 tơlăk đong bơh broă lơh “Mŭt mơ̆ rơmit”, lŏ Đông chờ hờp ngan mờ ngoh rơngăc đơs: “Sră tềm pềr priă mŭt mơ̆ rơmit do dong kờl añ uă ngan, añ geh tơl priă nàng blơi sơnơm den tàng añ ưn ngài uă ngan. Kơnờm mờ hơ̆, lơh să tờm añ ờ hoan kal ke rơlao, geh bơta pràn tam dră mờ kòp tê jê să”.

Jơnau hìu nhă đảng viên Y K’ Lơn Niê kis tàm ƀòn H’ Né, sàh Ea Yông kung là cơng tàng niam bơnĕ ngan sơl tàm cồng nha mùl màl bơh broă lơh “Sră tềm pềr priă Mŭt mơ̆ rơmit”. Mờ 2 nă kòn gam tàm sơnam lòt bơsram, ùr bơklao bi mìng geh 2 sào ù sre mờ dùl bă ù tam kơphe. Bơta kal ke lơh sa neh lơh bi Y K’ Lơn pal lòt lơh broă ơpah tàm tiah ngài, gam lŏ H’ Puê Niê, pơ-ùr bi lơh broă tàm anih lơh sa suơn dờng ngài mờ hìu 10 kơi sồ. nam 2024, hìu nhă bi geh Thị ủy ƀòn drà dờng Buôn Hồ jào pà pang sră tềm pềr priă geh 12 tơlăk đong. Bơh tàm pang sră tềm pềr do, lŏ H’ Ruê blơi 4 nơm sur nàng ròng. Tơnơ̆ mờ 4 nhai ròng, sur sơnrờp ngan tăc geh 24 tơlăk đong. Kơnờm mờ hơ̆, hìu nhă geh priă nàng pơn jăt tai ròng sur, kơl jăp rài kis. “Añ ưn ngài ală kwang bàng neh dong kờl añ tàm broă ròng sur. Mùl màl là Thị ủy neh dong kờl pang sră tềm pềr priă “Mŭt mơ̆ rơmit” mờ khà 12 tơlăk đong nàng hìu nhă añ blơi sur ròng. Broă ròng sur do di pal ngan mờ rài kis hìu nhă añ dê. Tơnơ̆ do, hìu nhă añ rơ̆p pơn jăt tai bơtàu tơnguh ròng sur nàng rài kis kơl jăp rơlao”.

Bơdìh mờ ală pang sră tềm pềr priă do là broă tus bal sùm bơh tơl nă kwang bàng, đảng viên dê. Lŏ Nguyễn Thị Trúc gam lơh broă tàm Mpồl Mblàng yal bơto bơtê mờ Hòi jà làng bol Thị ủy ƀòn drà dờng Buôn Hồ pà git, tơl nă cau tàm anih lơh broă ndrờm tềm pềr is, geh tŭ 5 tơlăk đong, 3 tơlăk đong, ha là mìng 2, 3 rơhiang đong jăt tàm bơta geh bơh tơl nă cau dê nàng gơtùi tus bal dong kờl ală cau gơtìp kal ke in. “Añ gŏ là broă lơh do geh kwơ màng uă ngan, geh niam ngan. Tàm broă bol añ tă pơgồp priă bŭ lah ờ uă, mơya geh uă bơta kwơ gơwèt mờ ală đảng viên geh rài kis gơtìp kal ke in, mờ kung bơh broă lơh do, ală đảng viên geh rài kis kal ke gơtùi lơh sa jăk, lik klàs rơƀah mờ brồ guh”.

Ồng Nguyễn Văn Út, Kwang lam bồ Mpồl Mblàng yal bơto bơtê mờ Hòi jà làng bol Thị ủy ƀòn drà dờng Buôn Hồ pà git, broă lơh “Sră tềm pềr Mŭt mơ̆ rơmit” geh lam lơh bơh nam 2023, tàm nùs nhơm bơsram mờ đòm jăt jơnau bơto bơh Wa Hồ dê, kis tềm pềr mờ tam pà bal. Kwang bàng, đảng viên tă pơgồp is nàng lơh geh kes priă, dong kờl ală đảng viên gơtìp kal ke, tàm hơ̆ uă ngan là đảng viên jơi bơtiàn ờ gal cau, kis tàm tiah ngài. Ồng Nguyễn Văn Út pà git: “Bơta kwơ màng tàm broă jào priă den geh 3 ƀòn là ƀòn Tring, 1, 2, 3 sơnah ƀòn An Lạc dê, tàm hơ̆ kung geh đảng viên là cau làng bol jơi bơtiàn ờ gal cau gơtìp kal ke, mơya ală cau do ờ bài dờp pang sră tềm pềr do mờ sồr jào ai đảng viên là cau jơi bơtiàn ờ gal cau tàm ală sàh geh rài kis gơtìp kal ke rơlao. Bơh broă bơsram mờ đòm jăt Wa Hồ, mờ nùs nhơm bơh kwang bàng đảng viên kờñ gơboh bal, dong kờl bal neh lơh neh uă tàm kwang bàng, đảng viên bơh jơh gùt ƀòn drà dờng dê”.

Mìng tơnơ̆ 2 nam lơh, gùt ƀòn drà dờng Buôn Hồ neh jào geh 175 sră tềm pềr priă Mŭt mơ̆ rơmit mờ kờp jơh geh 769 tơlăk đong. Ală pang sră tềm pềr do neh dong kờl đảng viên bơcri priă lơh sa, blơi sơntìl phan tam phan ròng, sơm kòp mờ kơl jăp rài kis. Tơl sră ờ mìng cèng geh bơta kwơ bè phan bơna, mờ gam là bơta pơlam nùs nhơm kwơ màng, pơn jăt tai bơta pràn nàng brồ guh tàm bơta kal ke. Mò H’ Blă Mlô, Phó Ƀí thư duh broă sùm Thị ủy ƀòn drà dờng Buôn Hồ pà git: “Broă lơh do neh lơh geh uă tus cau geh dờp kung bè mpồl đảng, đảng viên tàm broă bơsram mờ đòm jăt nùs nhơm niam, ơnà jăk, broă lơh Hồ Chí Minh dê. Tơnơ̆ mờ tŭ rơndăp tăp sèng mpồl lơh broă sră nggal, ală broă lơi Mpồl lơh kơnòl broă sùm Thị ủy dê tàm tơngai pa do lơh niam den tơnơ̆ do rơ̆p geh ală sàh, sơnah ƀòn pơn jăt tai lơh jăt, lơh bè lơi broă lơh do tus mờ ală đảng viên gơtìp rơƀah in”.

Tơl pang “Sră tềm pềr priă Mŭt mơ̆ rơmit” là dùl cơng tàng tơngŏ loh làng nùs nhơm tam klăc bal, tam pà bal mờ geh kơnòl tàm mpồl kwang bàng, đảng viên Thị ủy ƀòn drà dờng Buôn Hồ dê. Ờ mìng dong kờl bè phan bơna, broă lơh do gam lơh geh nùs nhơm pin dờn, bồ tơngoh ngăc ngar brồ guh mờ kơ̆p kờñ sơrlèt mờ kal ke tàm tơl nă đảng viên dê. Bơh ală broă lơh mùl màl mờ niam bơnĕ do, nùs nhơm niam, ơnà jăk, broă lơh Hồ Chí Minh dê neh mờ gam lơh geh uă pràn kơl dang, gơs gùng dà broă pơlam tàm lơh broă, pơgồp bal bơ̆t bơtàu mpồl Đảng ngai sơlơ kloh niam, pràn kơl dang bơh tàm ƀòn lơgar dê tơn.