Gơ kờñ ngan mờ sap uh điñ buốt gơguh gơmù rơlĕ rơlùn, Y Puen Niê ngan ngồn là dùl nă cau chài kòn cau tơnơ̆ gơnoar broă là kwang bàng drơng broă Anih pờ tơlik jơnau đơs sàh Cư̆ Pui, kơnhoàl Krông Bông, càr Dăk Lăk. Ơm ngkời rùp să jan đềt mềr là dùl huềng nùs sùm gơ kờñ mờ sap ntas cing mồng mờ ală bơta đờng goòng bơh yau kòn cau Rơđê dê.

Lik klờng Hìu bơsram Trung kâp Đam San, bi Y Puen Niê neh geh dùl khà jơnau git wă nàng git mờ ki ngàm ală bơta kuơ niam chài mờ mò pàng neh lời wơl. Bi Y Puen pà git, kờñ niam chài kòn cau, tŭ 15 sơnam, bi neh mòn is kơ wào điñ buôt sơn rờp he dê: “Đơs bè niam chài cau Rơđê dê bè dròng cing lơngô, uh điñ năm, điñ buôt, đơs Eirei neh gơmut tàm huềng nùs he dê bơh tŭ gam dềt. Añ git bơh ală ồng mò, ală wa, mơi lŏ… Tus tŭ dờng, bơta kơp kờñ geh bơsram uh, teh ală bơta đờng goòng kòn cau sơlơ dờng rlau. Añ neh lơh ngan, pơnđơl pràn uă ngan nàng gơtùi mòn mờ ngui đờng goòng. Đờng goòng sơn rờp añ dê mòn là kơ wào điñ buôt, tơnơ̆ hơ̆ là gông, brô̆, điñ tút,.. Bơta kuơmàng ngan rlau kơh là bơta kờñ gơboh să tờm he dê”.

Bi Y Puen Niê neh lời tŭ tơngai nàng jòi git jơnau bơh lơi geh, bơta gơtha bơh tơl bơta đờng goòng dê, bơh sap cing mồng mpong ntas tus sap đờng t’rưng, sap kơ wào kòn cau Rơđê niam ngan mờ gùng đơs Kưt rơlĕ rơlùn halà sap kơm buat Điñ năm mờ gùng đơs eiri chờ hờp. Mờ bi pơn jat tai mblàng wơl bơta kờñ gơboh hơ̆ tàm rơnàng cau kơnòm să: “Tŭ añ neh lơh gơtùi, añ mblàng wơl kòn sau tàm ƀòn, tàm sàh mờ kơnhoàl in. Añ geh jà lòt bơto ală kơnòm dềt tàm uă tiah krơi is in. Tàm nhai 4 pa do, añ bơtuah ngan geh tŭ lòt bơto đờng goòng bơh yau bè cing lơngô, cing gle, kơ wàu, bơnung, điñ brô̆, gông mờ ală bơta đờng goòng ndai tàm Hà Nội. Ală oh dềt git mhar ngan mơya rài kis mpồl bơtiàn tam gơl uă, ală oh sền gŏ uă niam chài tàm ală pang mạng sàh hội bè faceboọ, tiktok kung lơh gơ rềng uă ngan sơl tus bơta kờñ bơsram ală oh dê”.

Ală ơdŭ bơsram cing mồng, đờng t’rưng bơh bi Y Puen pơlam neh gơ gơs dùl anih nhơl geh kuơ ngan gơ wèt mờ ală oh dềt tàm uă ƀòn. Oh H’Tra Byă (10 sơnam) pa ai geh khà 2 tàm dơ̆ pơrlòng đơs pơnđik kơnhoàl Krông Bông yal: “Bol oh kờñ ngan đơs crih, tamya bơh jŏ. Tus tŭ tìp wa Y Puên, bol oh geh bơsram bơta chài dròng cing lơngô, cing gle, đơs pơnđik eirei, uh điñ tut… Oh mờ ală bơyô tàm jà gơp lòt bơsram. Bol oh geh tus bal ală dơ̆ pơrlòng mờ bol oh kờñ ngan”.

Bi Y Puen Niên neh gơ gơs là dùl nă cau jơh nùs ngan tàm ală mpồl cing mồng, nhơl đờng goòng bơh sàh Cư̆ Pui dê, pơgồp bơnah lơh gơ rề uă niam chài kòn cau Rơđê tus uă ù tiah krơi is. Bi Y Phin Byă, pơgru Hìu bơsram kâp 1 Dang Kang 1, sàh Dang Kang, kơnhoàl Krông Bông đơs: “Iat bơh ngài gơ lơh bè sềm nrau gờm chờ wă rò àng mat tơngai, iat rềp gơ lơh bè sap cing mồng tàm kàl duh. Añ kờñ ngan iat bi Y Puen nhơl đờng goòng, niam ngan. Ală đờng goòng bi dê ndrờm geh mòn bơh gle, kơrla, đềt mềr mờ brê bơnơm, đềt mềr mờ làng bol bơh oh dềt tus cau kra. Kơp kờñ bi Y Puen sùm pràn kơldang nàng lơh gơ rề uă bơta niam đờng goòng bơh yau kòn cau dê, tài gơ niam ngan”.

Mờ bơta chài bal mờ bơta joh nùs, Y Puen Niê neh lơh geh uă cồng nha tàm ală dơ̆ pơrlòng nhơl đờng goòng kâp kơnhoàl, kâp càr. Pơn rơ bè gai lòng biàng dơ̆ pơrlòng bơta chài làng bol kâp càr mờ khà B niam chài mpồl phàu crong càr Dăk Lăk. Tàm ngai chờ niam chài ală jơi bơtiàn càr Dăk Lăk nam 2023, mpồl cing Kram bơh bi pơlam neh jak ngan ai geh khà B mờ jơnau pơrlòng Cing kram mờ tamya xoang jà ñô tơrnờm gờm chờ kàl tơnhàu phan.

Jơnau yal bè bi Y Puen Niê – dùl nă cau kờñ niam chài bơh yau là cơng tàng ai bơta kis pràn ngan bơh niam chài ù tiah Tây Nguyên dê. Tàm rài kis tam gơl pa tŭ do, kung gam geh ală cau kơnòm să ngềt ngơt tă pơgồp, sền gàr mờ lơh gơ rề uă ală bơta niam chài nùs nhơm kuơmàng. Cau chài kơnòm să bi Y Puen Niê ngan ngồn là krơh àng, là bơta pơn yờ să bơh làng bol kòn cau Rơđê tàm càr Dăk Lăk dê.