Sơ lơŭ wơl mờ rùp hin să jan dềt mìng kàr kơnòm bơsram kâp 1 mờ să jan mờ wil tơl bè cau ndai, Chương Đình Phúc deh nam 2005, cau bơsram dờng nam 2 ơdŭ lơh pơgru dà Mỹ, Khoa dà đơs lơgar ndai, Hìu bơsram Đại họk Tây Nguyên cèng wơl cau sền in bơta pràn niam ngan tài bơta chài tơm boh bơr mblàng wơl bơta kờñ gơboh mờ jơnau yal sơrlèt gan rài kis kal ke crih crài ngan. Phúc gơtìp gơ krồn 2 đah tê bơh pa deh, să jan ờ sô, sơnam gam dềt ờ wil tơl tài mè bàp tàm sang bau bơh tŭ gam dềt, lơh să tờm bi bàs sìl. Mờ bơta dong kờl bơh ală cau gùt dar dê, Phúc neh sơrlèt gan bơta bàl sìl, lơh ngan bơsram sră mờ tus bal ală srơh đoàn, mpồl, gơ gơs là cau geh pơn rơ gơguh jak tàm uă ngan broă lơh tàm 3 kâp bơsram mờ đại họk. Phúc kung là dùl tàm 2 nă cau geh pơn rơ gơguh jak kơnòm să ngan rlau jơh tàm broă lơh “Sòl àng bơta pràn brồ guh Việt Nam” nam 2024.

Phúc yal, 5 bơta Wa Hồ bơto neh bơsram git bơh tŭ gam dềt gơ gơs là bơta tờm ngan nàng bi lơh ngan pơnđơl pràn bơsram sră mờ pơlam tàp pah ngai. Bulah geh ală kal ke bè să jan, bi kung gam kờñ gơ gơs là cau lam jơnau đơs mờng chài mờ là dùl nă pơgru gơtùi mblàng wơl bơta kờñ gơboh kơnòm bơsram in: “Oh kơp kờñ tŭ lik klờng den oh kung gam bơsram, đòm jat Wa Hồ, hơ̆ là tŭ he neh bơsram geh bơta lơi den he rơp sơñio cau ndai in. Oh kơp kờñ rơp là dùl nă pơgru, ờ mìng bơto ală bơyô in bè jơnau git wă mờ gam là dùl anih kơldìng bè nùs nhơm nàng ală bơyô geh rài kis kal ke, ală cau geh bơta ờ niam tàm nùs nhơm in geh anih nàng gơn kơnờm, nàng ờ duh pal lòt gan ală bơta kal ke hơ̆ dồl nă să ndrờm bè oh neh geh tŭ lòt gan tŭ gam dềt”.

Kung kah jơnau bơto Wa Hồ dê “tiah lơi kờñ den ơruh pơnu geh, broă lơi kal ke den geh ơruh pơnu”, bi Trần Tiến deh nam 1992, cau lơh broă mờng chài Cơldŭ atbồ lùp – sră pơ àr, sền gàr rềs àr mpồl bơtiàn càr Dăk Lăk neh tă pơgồp jơnau đơs, lam lơh ală broă lơh ơruh pơnu wèt tus ală ù tiah krơi is tàm càr. Bi neh uă dơ̆ lơh bal, bơyai lơh ală broă lơh pơgồp bơnah sền gàr, lơh gơ rề uă ală bơta kuơ niam chài bơh cau jơi bơtiàn dồ êt nă cau dê bè lơh niam wơl, pơs wàs dà mbòr, tơnguh jơnau git wă sền gàr kloh niam tiah ơm kis ai làng bol in; pà phan, dong kờl priă bơto dròng cing ai tiah nhàr lơgar in. Bal mờ hơ̆, bi Tiến neh jòi git, chồl pràn broă ngui tam gơl sồ tàm broă lam lơh kơnòl broă ờs mờng, geh uă broă lơh pa, broă bơceh lơh nàng dong kờl làng bol tơmut, ngui ală phan tàm internet, lơh gơlik bơta ƀuơn tŭ lơh broă mờ ngui ală broă drơng ala bè sền gàr rềs àr mpồl bơtiàn. Bi đơs: “Añ là đảng viên kơnòm să, kung geh ci ƀộ lơh gơlik tŭ niam sùm dờp lơh bàr pe tơngume mìng dùl lơm tŭ pơrjum, geh bơta niam nàng jòi git jrô rlau bè bàr pe tơngume mìng dùl mùl màl bơh broă bơsram mờ lơh jat Wa Hồ. Añ sùm lơh ngan, pơnđơl jơh pràn tài broă lơh bal, tàm broă lam lơh kơnòl broă ờs mờng den añ bơsram tàm Wa Hồ uă ngan rlau jơh là bè nùs nhơm bơsram is, ngai sơlơ bơsram nàng tơnguh bơta chài git wă să tờm dê”.

Gơ wèt mờ bi Nguyễn Thùy Trang deh nam 1992, Ƀí thư Đoàn sơnah ƀòn Ea Tam, ƀòn dờng Buôn Ma Thuột, bulah tàm sơnam lơi, tàm gơnoar broă lơi, bi kung git loh gơnoar broă, kơnòl broă bơh cau kwang bàng dê. 23 sơnam neh là Phó Củ tịc Mặt trận dà lơgar sơnah ƀòn kơnòm să ngan rlau jơh càr Dăk Lăk, bi Trang neh pơgồp bal bơsram mờ lơh jat bồ tơngoh, nùs nhơm, rài kis Hồ Chí Minh tàm kơnòl broă ờs mờng. Bơh tŭ ntrờn lơh broă gah đoàn, bi neh lam lơh lơh 7 broă lơh ơruh pơnu, lam lơh uă broă lơh gàr lơngăp lơngai rài kis mpồl bơtiàn, jơh nùs tus bal hòi jà ơruh pơnu lòt ling, dong kờl ơruh pơnu sơn đờm mut lơh broă, tơrbŏ bal ơruh pơnu tus bal ală broă lơh sền gàr mờ prap gàr niam chài ờs mờng ală jơi bơtiàn. Bơh hơ̆, lơh gơlik bơta tàm bơrkuăt, tơnguh gơnoar broă bơh ơruh pơnu dê tàm ƀòn lơgar. Bi Trang pà git: “Bơh ală dơ̆ hòi jà kung bè jòi git bè Wa Hồ den să tờm añ bơsram tàm Wa Hồ ală bơta pơn dềt să, tryăng tryồng, ờ ngòt bòl glar mờ pal sùm tơnguh nùs nhơm geh kơnòl să tờm dê tàm broă lơh kơnòl broă geh jàu bơh ală kâp dê. Dòn song, lơh broă jat jơnau sồr mờ di jơnau pal jat bơh mpồl lơh broă dê nàng lơh gơlik bơta gơ rềng đềt mềr ngan rlau jơh đah Đảng mờ làng bol mờ tàm kwang bàng mờ đoàn viên, ơruh pơnu”.

Mờ ală broă lơh ngan ngồn, di mờ gơnoar broă lơh mờ bơsram sră, cau kơnòm să Dăk Lăk neh Bơsram mờ lơh jat krơh niam Hồ Chí Minh dồ bă niam ngan. Ală cau geh pơn rơ jak tàm dơ̆ hòi jà do neh lơh gơlik bơta gơ rề pràn ngan tàm đoàn viên, ơruh pơnu, pơgồp bơnah kuơmàng tàm broă lơh gơs kơnòl broă, bơsram sră tàm ală anih lơh broă, mpồl lơh broă, hìu bơsram tàm Dăk Lăk.