Ală ngai bồ nhai 6 do, khà nac tus Dà Làc, Lâm Đồng gơguh uă. Tàm ală gơl gùng tàm gùl ƀòn dờng bè Trần Phú halà gùt dar tiah tơnau dà Xuân Hương… tus ală wàng dờng lơh broă sa suơn sre kềng gah ƀòn dờng tàm Lạc Dương, Tà Nung, ndrờm geh gal ngan nac lòt nhơl. Bi Nguyễn Khắc Hoàng Lâm, cau ơm kis jŏ nam tàm sơnah ƀòn 4 pà git: “Tàm kàl rlô bơkang, ƀòn dờng Dà Làc gal cau, chờ hờp rlau. Làng bol Dà Làc bol hi tŭ lơi kung rơcang wă nac lòt nhơl mờ mbùng ñŏ đềt mềr, plai chi sàng goh mờ ală jơnau yal bè ƀòn dờng kơh bơnơm. Să tờm añ kung kờñ ngan geh tìp mat, tơm boh bơr mờ nac tiah ngài, yal khi in ală tiah tus ờ huan geh cau git mờ ală tiah lòt nhơl pa bơh ƀòn dờng dê”.

Tơnơ̆ dơ̆ pơrlòng mut ơdŭ 10, uă ngan kơnòm bơsram neh jơh bơta kơlôi rơcang pơrlòng, Dà Làc ngai sơlơ uă rò uă hìu bơnhă, tàm hơ̆ uă ngan rlau jơh là bơh Hà Nội, ƀòn dờng Hồ Chí Minh, Vũng Tàu mờ ală càr đah mat tơngai mut dà lơgar. Bi Thùy Dương nac lòt nhơl bơh ƀòn dờng Hồ Chí Minh pà git: “Dơ̆ lòt nhơl do bol hi rơ wah ơm bic wơl tàm dùl anih ơm rlô să, kềng gah tơnau dà Tuyền Lâm, tiah geh ù tiah brê bơnơm niam ngan. Kuơmàng, phan sa Dà Làc sùm lơh bol hi gŏ niam ngan tài bơta ƀô bơkah krơi is. Bơdìh hơ̆ tai, bơta niam broă drơng ala ờs mờng bal mờ giă tac dipal sơlơ lơh dơ̆ ơm rlô să gơ gơs wil tơl mờ pal kah ngan”.

Bơta niam bơh lòt nhơl Dà Làc dê gam geh tơnguh kơnờm tàm bơta lơh ngan bơh ală mpồl lơh sa kă bro ƀòn dờng dê tàm broă lơh pa broă drơng ala mờ tơnguh bơta niam sền git. Bi Bùi Lê Giáng Tiên, Atbồ đơng lam Dalat Edensee Lake Resort & Spa pà git: “Bol hi neh lam lơh uă bơnah broă drơng ala pơgồp bal mờ ơm rlô să mờ ală bơta kuơ gơ jat bal bè spa, phan sa tàm anih tus halà ală tour lòt sền lơyah ngai tàm Dà Làc. Bơdìh mờ ơm rlô să, nac lòt nhơl gam gơtùi lòt sền jơh ală broă drơng ala bơh càr Lâm Đồng dê mờ giă priă dipal”.

Ai ồng Đinh Văn Dôn, Kwang lam bồ Kông ty TNHH Lòt nhơl Happy Day den pà git: “Bol hi gam lam lơh uă phan lòt nhơl lời ai nac lòt nhơl in, wèt tus sền git lơh broă sa suơn sre ngui măi mok pa, tài tŭ do nac lòt nhơl sền gròi ngan tus ală phan lơh gơs bơh suơn sre, ngan là kơphe, ơm rlô să, massage lơh prài să jan mờ ală broă drơng ala lòt nhơl niam ndai”.

Mờ trồ tiah lơngờm, ù tiah brê bơnơm niam bơnĕ, broă drơng ala lòt nhơl niam, ƀòn dờng Dà Làc, càr Lâm Đồng ờ mìng gơ hòi gơ jà nac lòt nhơl tàm lơgar mờ gam là anih tus gơ kờñ ngan bơh nac lòt nhơl ală lơgar dê. Bồ kàl rlô bơkang do, tàm Dà Làc geh lơh broă lơh tìp mat, lơh kwèng “Tàm tơrbŏ bal niam chài, lơh broă bal lòt nhơl đah càr Lâm Đồng mờ lơgar lơh broă bal Hàn Quôk”. Ồng Nguyễn Tiến Hải, Phó Kwang lam bồ Sờh Niam chài, Tàp pràn să jan mờ Lòt nhơl càr Lâm Đồng pà git, bơta niam nàng gơ hòi gơ jà nac lòt nhơl Hàn Quôk tus mờ Lâm Đồng gam uă ngan nàng lơh jat jơnau kờñ neh ai tơlik: “Dà Làc – Lâm Đồng geh trồ tiah lơngờm, geh uă ngan bơta broă lơh nhơl ñŏ, lơh prài bồ tơngoh, niam chài bơh jŏ niam ngan mờ uă bơta tàp pràn să jan lòt nhơl bè golf, hàu kơh bơnơm ai nac Hàn Quôk in lòt sền, ơm rlô să”.

Ai ồng Trần Hải Linh, Củ tịc Mpồl cau lơh sa kă bro mờ Bơcri priă Việt Nam – Hàn Quôk đơs là, broă tàm tơrbŏ bal niam chài mờ lơh broă bal lòt nhơl đah càr Lâm Đồng mờ ală mpồl lơh broă bal bơh lơgar Hàn Quôk ờ mìng geh kuơ bè lơh sa, mờ gam pơgồp bơnah sơlơ tơrbŏ kơ̆ bơta git gơp lơh bơyô, đềt mềr jŏ jòng đah làng bol 2 lơgar: “Tơngai tus, Lâm Đồng rơp tơmut bal 3 càr, gơtùi đơs do là dùl tàm ală broă dong Lâm Đồng lơh broă bal mờ bơtàu tơnguh pa mờ ală mpồl lơh broă bal bơh Hàn Quôk. Kuơmàng tàm 2 gah tờm là lòt nhơl mờ kă bro phan. Ngai do, geh 35 mpồl lơh sa kă bro lơh broă tàm gah lòt nhơl mờ bơyai lơh lòt nhơl geh bol hi tơmut tàm broă lơh tìp mat lơh kwèng nàng kờñ lơh bè lơi lam lơh ală broă lơh lòt nhơl tàm Lâm Đồng bơtàu tơnguh pràn rlau”.

Di dơ̆ do, ala mat ală mpồl lơh broă bơh Hàn Quôk mờ Việt Nam neh kĭ sră cih kah lơh broă bal, lơh gơlik tŭ niam bơcri priă tàm ală gah bè lòt nhơl ơm rlô să, lơh broă sa suơn sre hữu kơ, lơh mờ măi mok lơh gơlik phan tơlir mờ logistics lòt nhơl… Ală mpồl lơh sa kă bro Hàn Quôk kơp kơnờm rơp pơn jat tai geh dong kờl uă ngan rlau jơh bè broă lơh, phan bơna, cau lơh broă mờ anih bơcri priă niam. Mpồl cau lơh sa kă bro mờ Bơcri priă Việt Nam – Hàn Quôk hơ pơrgon geh gơnoar broă là rbàng tơrbŏ, pơgồp bal bơyai lơh hòi jà kă bro phan, niam chài mờ lòt nhơl jat tơngai pơrgon, ai Lâm Đồng gơ gơs là anih tờm tơrbŏ bal Việt Nam – Hàn Quôk.