Tàm anih lơh broă dùl mpồng sơnah ƀòn Ea Kao, tơmŭt bal bơh sàh Ea Kao mờ sơnah ƀòn Ea Tam, càr Dăk Lăk, tàm ngai lơh broă tơrlòng lài, làng bol tus lơh ală sră nggal geh drơng mhar, niam, jăk.

Mò H’ Đinh BKrông (Aduôn Y Sam), kis tàm ƀòn Alê A yal bè broă lơh mhar, sơrbăc tơnơ̆ mờ tŭ lơh gơs sră nggal ai ơpah hìu ơm ing: “Broă bơsong sră nggal tơnơ̆ mờ tŭ tơmŭt bal añ gŏ ală kwang bàng lơh broă tàm do kung wă rò chờ hờp, dong kờl làng bol jơh nùs tàm broă dan lơh tàm broă lơh drơng ala dà lơgar dê. Sră pơ-àr bơsong kung mhar, añ gŏ geh uă ngan bơta tam gơl”.

Mùl màl lơh jăt broă lơh tơrlòng tàm ală càr Dăk Lăk, Lâm Đồng, Gia Lai, mpồl lơh broă sră pơ àr neh drơng làng bol in niam bơnĕ ngan. Tus sền nàng kờñ git ală bơta, ồng Nguyễn Đình Trung, Ƀí thư Tỉñ ủy càr Dăk Lăk sồr: “He đơs lơh broă tơrlòng mơya tơngu me broă lơh den lơh ngan. Do là broă lơh lài nàng ngai 01 nhai 7 tus he lơh broă mùl màl ờ gơtìp kwi kwơ. Den tàng, ală kwang bàng tàm tơl anih lơh broă, ală kwang bàng pal rơcang lài lơh broă bơh să tờm dê, nàng di tŭ pơrjum mpồl sền wơl broă lơh mờng chài, geh tơrgùm nàng tam gơl bal”.

Tàm càr Gia Lai, broă rơndăp tăp sèng, tơrmù di pal mpồl lơh broă, lơh jăt broă lơh gơnoar atbồ ƀòn lơgar 2 kấp neh geh lơh nền nòn. Ồng Hồ Văn Niên, Ƀí thư Tỉñ ủy càr Gia Lai đơs loh: “Gùt mpồl lơh broă cíñ trị càr dê gam tơrgùm lơh jăt broă lơh gơnoar atbồ ƀòn lơgar 2 kấp geh lơh broă ndrờm bal bơh ngai 01 nhai 7 tus. Bơdìh hơ̆ tai càr kung gam lơh pràn uă gùng dà broă lơh dờng bè tơnguh broă tam gơl sồ, ngui măi mok pa, bơsong bơta gơkòl tàm broă tơm ntrờn ù tiah, lơh mhar broă bơcri priă dà lơgar mờ lơh jăt ală rơndăp broă lơh tờm nàng gàr niam khà gơguh lơh sa tàm nam 2025 mờ ai geh bơnàng jă kơl jăp ai tơngai lơh broă pa in”.

Tàm càr Dăk Nông, tŭ broă tơrlòng lơh gơnoar atbồ sàh pa geh bơyai lơh geh cồng nha, làng bol pin dờn tàm broă rơndăp tăp sèng, tơmŭt bal mpồl lơh broă sră nggal. Mò H’ Thương, kis tàm sàh Nâm Nung tơlik nùs nhơm bè do: “Tơmŭt bal càr Bình Thuận, Dăk Nông mờ Lâm Đồng jăt añ kơlôi là di pal ngan. He geh tơl bơta pràn nàng bơtàu tơnguh lơh sa tơl ală bơta, geh brê, geh dà lềng; bè càr Dăk Nông geh bosit trà; càr Lâm Đồng geh tiah lòt nhơl niam geh pơnrơ ngan Dà Làc dê nàng bơtàu tơnguh. Càr Bình Thuận bơtàu tơnguh dà lềng, geh bơta pràn bè phan tàm dà bè: kati, tàm, ka, mừk… Bè hơ̆, 3 càr tơrgùm bal den broă lơh sa mpồl bơtiàn ngai sơlơ bơtàu tơnguh”.

Tàm càr Lâm Đồng pa, jơh ală broă lơh tơrlòng lài geh jăt sền nền nòn. Ồng Y Thanh Hà Niê Kdăm, Ƀí thư Tỉñ ủy càr Lâm Đồng đơs nền, ală bơta gơkòl, kwi kwơ geh bơsong mhar lài mờ tŭ jơh 124 sàh, sơnah ƀòn, tiah krơi is mùl màl mŭt lơh broă: “Lơh gơs broă ai kwang bàng, kông cứk, viên cứk, cau lơh broă ờ lơh broă jăk kơnòl bè hìu lơh broă nàng lơh broă mpồl lơh broă pa. Đảng ủy Anih duh broă Làng bol càr, kwang đơng lam Anih duh broă Làng bol càr sồr lơh gơs niam broă nàng rơcang bè phan bơna anih lơh broă, phan ngui lơh broă, măi mok, gùng che, phần mềm drơng broă lơh, hìu lơh broă, gàr niam broă lơh jăt kơnòl broă bơh càr tus sàh, sơnah ƀòn, tiah is ồn ndrờm bal bơh ngai 01 nhai 7 nam 2025”.