Tàm pơrjum, ală cau ala măt tơrgùm cri bơyai, pơgồp bal jơnau đơs tàm mùl màl bơtàu tơnguh lòt nhơl tàm tơl tiah bal mờ jơnau bè tơnguh bơta pràn bơh tơl tiah dê nàng lơh geh uă phan lòt nhơl niam bơnĕ, uă bơta. Tàm hơ̆, càr Phú Yên geh tiah jăt gah dà lềng jòng 189 kơi sồ, uă ƀlàng um, tiah pòt dà lềng, geh tiah tềl kah yau Dà lơgar, kwơ màng tiah Lŭ Preng rơndăp mờ uă tiah tềl kah yau niam chài rài lài do jŏ jòng. Càr Dăk Lăk geh bơta krơi is mờ lòt nhơl tiah brê bơnơm, niam chài, ală suơn kơphe dờng ơnàng, ñrùh dà dờng mờ tiah niam chài cing mồng Tây Nguyên.

Tŭ tơrgùm càr Phú Yên mờ càr Dăk Lăk gơs dùl, broă tơrbŏ bal bơta pràn “dà lềng-brê”sơlơ gơs kwơ màng. Ồng Đặng Hoàng Vũ, lơh broă tàm Kông ty Sao Mai Beach Resort, tàm càr Phú Yên đơs là, broă kă bro phan đah 2 càr gam kal ke, tơrbŏ bal gùng kă bro phan ờ hềt di pal mờ jơnau kờñ lòt rê, pơn diang phan kă bro mờ pơn diang cau năc, là bơta gơkòl pal geh bơsong nàng ală bơta pràn geh mhar tơrbŏ bal: “Pal lơh niam wơl mờ rề ơnàng rơlao nàng gùng bơh càr Dăk Lăk tus mờ càr Phú Yên bal mờ bơh càr Phú Yên tus mờ càr Dăk Lăk rơ̆p ƀuơn ngan rơlao jơh, gàr niam broă lơh drơng ala pơn diang phan tàm tơngai mhar ngan. Mờ pal geh broă tơrbŏ bal mờ lơh geh ală bơta phan krơi is, nền nòn bè lòt nhơl, pơnrơ ngan, krơi is bơh bàr mpồl pơgồp bal nàng lơh geh dùl pang rùp tơrgùm bal bè lòt nhơl, cèng geh bơta nhơl sền geh cồng nha uă ngan”.

Cau ala măt kung geh jơnau đơs gơrềng tus mờ broă bơ̆t bơtàu ală dơ̆, gơl gùng lòt nhơl, broă pơgồp bal đah bàr tiah dê; broă dong kờl bal nàng lơh pràn lòt nhơl bơtàu tơnguh. Ồng Hồ Văn Tiến, Củ tịc Tơrgùm mpồl Lòt nhơl càr Phú Yên pà git, tàm bơta càr Phú Yên mờ càr Dăk Lăk rơcang tơrgùm bal, gah lòt nhơl bàr càr ngai sơlơ pal lơh ngan uă rơlao tai nàng ai broă lòt nhơl gơs gah lơh sa tờm. “Bol añ rơ̆p bơyai lơh ală broă pơgồp bal nền nòn rơlao, tơnguh broă tam gơl bal ală mpồl cau năc đah càr Phú Yên mờ càr Dăk Lăk pal uă rơlao mờ lài, lơh ngan geh uă rơlao bàr dơ̆. Geh broă dong kờl bal bè ală broă tơrmù khà priă di pal, dong kờl yal phan geh lơh bal, pơgồp bal mblàng yal, yal mờ hòi jà lòt nhơl, ờ mìng tàm lơgar mờ rơ̆p bơyai lơh bal mờ lơgar bơdìh, lài jơh là càr tiah lơgar Lo mờ Hàn Quốk, do là bàr tiah geh uă bơta pràn cau năc tus mờ càr uă rơlao”.

Dùl tơngu me kwơ màng kung geh 2 mpồl cri bơyai, ring bal tàm dơ̆ do sơl, hơ̆ là gùng dà broă tơrgùm bal mpồl lơh broă mờ broă lơh bơh mpồl dê tơnơ̆ tŭ tơrgùm bal càr. Jăt mờ hơ̆, kờp dŭ mpồl rơ̆p tơrgùm bal bè ờs bè broă lơh, mpồl đơng lam bồ, cau geh jơng bal mờ ală mpồl lơh broă gơrềng bal, gàr niam broă tơrgùm bal di mờ broă sồr bơh kwang bàng đơng lam bồ bàr càr dê.

Mò Nguyễn Thụy Phương Hiếu, Phó Kwang lam bồ Sờh Niam chài chài, Tàp pràn să jan mờ Lòt nhơl càr Dăk Lăk đơs loh: “Kung kơ̆p kờñ là bàr mpồl bơ̆t bơtàu geh gùng dà broă tơrgùm bal, tài tŭ bàr càr tơrgùm bal, bàr sờh tơrgùm bal den bàr mpồl kung rơ̆p tơrgùm bal mờ lơh broă tơn. Mpồl lòt nhơl bơh bàr càr rơ̆p bơ̆t bơtàu geh ală bơta phan bal mờ sền kwơ phan lòt nhơl bè trồ mang. Geh ală jơnau pơgồp bal bè broă dong kờl nàng ală mpồl lơh sa kă bro bơtàu tơnguh”

Bè gùng dà broă lơh pơlam lòt nhơl, Tơrgùm mpồl Lòt nhơl càr Dăk Lăk mờ Phú Yên ring bal lơh phan lòt nhơl krơi is, lòt nhơl bè trồ mang, ai geh jơnau dong kờl mpồl lơh sa kă bro; broă dong kờl priă ai mpồl lơh sa kă bro bàr tiah in nàng pơgồp bal yal tus bàr drà kă bro dờng Hà Nội, ƀòn dờng Hồ Chí Minh mờ lơgar bơdìh… Lài mờ hơ̆, Tơrgùm mpồl lòt nhơl càr Phú Yên neh geh bàr ngai lòt sền phan lòt nhơl, anih tus càr Dăk Lăk dê nàng tus do lơh geh phan lòt nhơl tơrbŏ bal “dà lềng tơlir mờ brê bơnơm”. Tơrgùm mpồl lòt nhơl càr Dăk Lăk kung neh ring bal broă rơndăp lơh lòt sền phan lòt nhơl tàm càr Phú Yên tàm nhai 7 tus nàng rơcang ală tơngu me lơh gơs phan lòt nhơl tàm dơlam càr tơnơ̆ mờ tŭ tơrgùm bal. Mờ ală jơnau hơ bal mờ ai geh jơnau pơgồp bal lơh broă bal geh uă bơta hơ pơrgon niam, broă lơh do ai tơngŏ dùl broă tơnguh kwơ màng tàm broă lơh pràn lòt nhơl càr Phú Yên mờ càr Dăk Lăk bơtàu tơnguh pràn kơl dang mờ kơl jăp, ai geh dùl mpồl lòt nhơl krơi is ngan tiah tàm Gùl lơgar mờ Tây Nguyên dê, mờ tàm pang sră rùp ù tiah lòt nhơl lơgar Việt Nam dê tàm tơngai tus.