Tàm Mpồl atbồ rơndăp broă lơh Bơcri priă bơ̆t bơtàu kơnhoàl Cư̆ Mgar, nùs nhơm lơh broă tàm ală ngai do jal mhar ngan. Ồng Bùi Châu Lĩnh, Kwang Lam bồ Mpồl pà git, ală kwang bàng pal lơh broă bơdìh mờ tŭ jiơ pal lơh, geh bal ngai dơ̆ poh, ngai rơlô nàng di tŭ jào sră nggal: “Bơh ală nam lơh jăt broă bơ̆t bơtàu rơndăp broă lơh den khà sră nggal uă ngan, pơndờm pơnđiang lam oh mi lơh ngan jơh pràn nàng lơh gơs kơnòl broă bal”.

Tàm mpồl lơh broă dùl mpồng bơh Anih duh broă Làng bol kơnhoàl Cư̆ Mgar, do là anih dờp mờ bơsong ală sră nggal gơnoar ătbồ dê, khà sră nggal gơguh uă tŭ làng bol lơh ngan lơh gơs ală sră nggal lài mờ tŭ gơnoar atbồ kấp kơnhoàl tơn jơh lơh broă. Bal mờ broă lơh gơs mơ ală sră pơ-àr  tus tơngai bơsong, bơnah lơh broă dùl mpồng kơnhoàl dê gam bơto sồr mùl màl bè broă lơh ală sră nggal tơngai pa in, tŭ ală sàh pa mŭt lơh broă. Anih duh broă Làng bol kơnhoàl Cư̆ Mgar kung rơcang lơh wơl hìu lơh broă bal mờ tam pà gơnoar broă loh làng ai ală cơldŭ mpồl lơh broă in nàng bañ gơtìp gơrềng tus mờ broă drơng làng bol in. Ồng Nguyễn Công Văn, Phó Củ tịc Anih duh broă Làng bol kơnhoàl Cư̆ Mgar đơs sùm: “Gơwèt mờ ờ uă broă gơcèng bơta sră nggal gơnoar ătbồ den bol hi sồr ală anih lơh broă, ală cơldŭ lơh broă tờm git ală broă kal ke kờñ bơsong mờ ală jơnau dan, jơnau sồr. Ală broă lơi gơtùi bơsong mơ den bơsong tơn, ală broă ờ hềt geh bơsong den kung là tơngu me tờm nàng pơn jăt tai ai mpồl lơh broă sră nggal pa in, nàng pơn jăt tai lơh jăt kơnòl hơ̆. Gơwèt mờ ală broă, sră nggal gơrềng tus ù tiah, phan geh is tàm tiah kis mờ ờ hềt geh sră nggal bơto sồr pa mờ tŭ do ờ hềt lơh gơtùi den rơ̆p hơ mờ sră nggal ai làng bol, ală mpồl lơh broă in nàng git nàng tam pà bal ală bơta kal ke kơnhoàl dê tàm tơngai tŭ do”.

Gam tàm Ƀòn drà dờng Buôn Hồ, broă rơndăp wơl ală gơnoar atbồ gơ sồr ƀòn lơgar pal bơsong ndrờm bal uă broă dờng tàm tơngai ờ jŏ. Ồng Đặng Gia Duẩn, Củ tịc Anih duh broă Làng bol ƀòn drà dờng Buôn Hồ pà git, đơng lam ƀòn drà dờng rơcang kơnòl broă tàm sàh pa tiah he lơh broă, mờ rơcang mŭt lơh broă ală sàh, sơnah ƀòn tàm ƀòn drà dờng tŭ do tai, mơkung pal drơng lơh ală kơnòl broă dŭt ndơl tàm kấp kơnhoàl tai: “Lài mờ tŭ tơn jơh Gơnoar atbồ kấp kơnhoàl den uă ngan là broă priă jền, broă ntrờn sồr kwang bàng lơh broă. Dơ̆ bàr bol hi gam ai tơl bơta niam ngan nàng ală sàh, sơnah ƀòn pa bơh ƀòn drà dờng Buôn Hồ dê lài mờ tŭ tơmŭt bal khi rơ̆p geh ală bơta ƀuơn ngan bè phan bơna anih lơh broă, bè kòn bơnus mờ kwơ màng là bè tơngu me nàng gơtùi lơh broă tơrlòng mờ mùl màl lơh broă bơh ngai 1 nhai 7 tus”.

Jăt broă rơndăp lơh, ngai 25 mờ ngai 26 nhai 6, ală mpồl lơh broă sră nggal pa tàm càr Dăk Lăk neh dùl ròt lơh broă tơrlòng lài. Ngai 30 ngai 6, càr rơ̆p bơyai lơh yal crơng gơs càr Dăk Lăk pa mờ 102 mpồl lơh broă sră nggal kấp sàh, sơnah ƀòn. Jăt ồng Nguyễn Đình Trung, Kwang bàng Đảng Dà lơgar, Ƀí thư Tỉñ ủy càr Dăk Lăk đơs, tam gơl pa bơta kơlôi mờ tơnguh uă kơnòl là jơnau sồr jal mhar gơ tơlik tus mờ kwang bàng kông cứk tàm bơta pa: “Bol he bơh tơl anih lơh broă mùl màl pal tam gơl mơ nàng gơdờp mờ jơnau sồr gơ tơlik bè tŭ tơngai broă lơh. Kwang bàng kông cứk sàh pa tàm tơrbŏ bal mờ càr, tàm tơrbŏ bal mờ Dà lơgar den tàng  bè hơ̆ git wă kơnòl gơ pal krơi. Jơnau sồr kơnòl broă cíñ trị gơ tơlik gơwèt mờ kwang bàng kông cứk, ngan là đơng lam tờm kấp sàh, sơnah ƀòn pa pal rềp làng bol, wă wờng làng bol mờ pal drơng niam ngan rơlao jơh jơnau kờñ bơh làng bol dê”.