Tàm dơ̆ cribơyai, ală cau gĭt wă jrô broă lơh, cau jak chài, cau atbồ, bal mờ đơng lam bồ ală tiah tơrgùm sền sơwì bơta geh ngan, tam pà mờng chài rơ̆ ru lơh broă, đơs ală gùng dà pơlam mờ broă bơsong geh ngan nàng tă pơgồp bồ tơngoh kơlôi sơng, jơnau sồr đơs gùng dà broă lơh bơtàu tơnguh càr Lâm Đồng (pa) mờ jơnau kờñ: “Bơt bơtàu mờ bơtàu tơnguh tơl làm càr Lâm Đồng, ai bơta kơ̆ kơl jăp lơh bơnàng jă nàng bơtàu tơnguh; ai bơtàu tơnguh lơh sa là kơnòl broă tờm; ai bơta chờ hờp mờ hờm ram bơh Làng  bol dê là jơnau kờñ pơnđơl pràn lơh ngan; tus nam 2030 càr Lâm Đồng gơ gơs càr bơtàu tơnguh uă đau, priă lơh geh kờp bal uă, di pal mờ pơlam gùng dà, sền sơnơng bơtàu tơnguh Dà lơgar”. Jat kiến trúc sư ồng Trần Ngọc Chính, Củ tịc Mpồl Rơndăp ù tiah bơtàu tơnguh tiah drà Việt Nam, pơlam gùng dà bơtàu tơnguh càr Lâm Đồng pa pal gàr niam 3 jơnau pal jat tờm ngan là dồ ròt bal- kơ̆ kơl jăp jŏ jòng- lơh bal kơnhoàl u tiah, tàm hơ̆ pal sền gĭt ai loh làng ngan gah lơi là kwơ màng ngan rlau jơh: “Tŭ tơmŭt bal wơl den bol he pal wèt tus tàm lơh sa lơi là kwơ màng ngan rlau jơh. Lơh sa dà lềng bơh càr Lâm Đồng pa dê là ai lơh lài ngan, pơn jat hơ̆ là măi mok pa bơh tiah Dà Làc mờ Dăk Nông dê là lơh sa mờ măi mok tơnhào bauxite. Den tàng broă tàm tơrbŏ bal đah 3 càr do mờ broă bơtàu tơnguh hơ̆ den rơ̆p gơrềng tus ală broă lơh bơh tiah drà dê. Añ kơlôi geh 3 tiah drà tờm ngan rlai jơh kung gam là Dà Làc, Gia Nghĩa mờ Phan Thiết, mờ tơl tiah drà den geh dùl mpồl tiah drà mờ bol he tàm tơrbŏ bal gơ nàng geh bơta bơtàu tơnguh”.

Cribơyai đơs nền, tơnơ̆ tơmut bal, Lâm Đồng pa geh brê, dà lềng, mpồng tiah nhàr lơgar, anih ơhò ơm, gơ gơs “tiah tờm” bơh bàr pe tờm chi tam jŏ nam, tờm chi sa plai mờ lơh sa mờ măi mok bauxite. Do là ù tiah, bơta ƀuơn bơta pràn dờng mờ là tŭ tơngai kwơ màng ngan nàng càr Lâm Đồng in lơh geh tiah gơguh lơh sa pa, geh lơh tơl dờng, bơta gơn kơnờm tơl pràn mờ bơta gơrềng tơl jrô ơnàng làm uă, gàr niam geh bơta tam gơl pràn mờ tơl làm, pơgồp bơnah lơh geh jơnau kờñ gơguh lơh sa 2 nơm sồ tàm tơngai lơh broă  2026 – 2030.

Jat ồng Trần Hồng Thái, Củ tịc Anih duh broă Làng bol càr Lâm Đồng, cribơyai kung sơñio ală bơta ƀuơn, bơta pràn ờ hềt geh tơnhào geh cồng nha, bal mờ ală bơta ờ pràn gam kơryan bơta bơtàu tơnguh, dong sền loh rlau tai rùp rài bơtàu tơnguh bơh càr Lâm Đồng pa dê tàm ù tiah pa. Do là ală jơnau đơs tă pơgồp kwơ màng ngan nàng càr Lâm Đồng in gĭt ală kơnòl broă tờm tàm sră nggal Pơrjum dờng Đảng ƀộ càr mờr tus. Ồng Trần Hồng Thái, đơs nền:“Bơtàu tơnguh lơh sa- mpồl bơtiàn bơh Lâm Đồng dê pal pơgồp bal mờ jơnau kờñ gơguh lơh sa tơlir, kơ̆ kơl jăp jŏ jòng mờ tơl làm tàm bơnàng jă lơh sa tơlir, lơh sa sồ mờ tam gơl pa bơceh lơh. Broă bơtàu tơnguh hơ̆ pal ơn tàm ù tiah lơh bal uă kơnhoàl ù tiah, uă gah. Lơh jat uă ngan rlau jơh bơta ƀuơn, bơta pràn bơh dùl càr geh tơl kơh bơnơm, jat kềng gah dà lềng, tiah nhàr lơgar, rơndăp lơh wơl ù tiah bơtàu tơnguh jat gùng dà tơrgùm bal, uă anih tờm mờ lơh bal geh cồng nha đah ală bơta gơn kơnờm. Bơtàu tơnguh glòm jơh mờ ai kòn bơnus lơh tờm pal là bơnàng jă, pal ơn làng bol tàm tiah cau tờm, mpồl lơh sa kă bro là bơta gơn kơnờm mờ gơnoar atbồ là bơceh lơh mờ drơng broă. Añ sồr Mpồl sền sơwi Sră nggal Pơrjum dờng cau ala mat Đảng ƀộ càr Lâm Đồng pa iăt kơno uă ngan rlau jơh ală jơnau đơs tă pơgồp bơh ală cau gĭt wă jrô broă lơh dê”.

Pa do, tàm dơ̆ lơh broă mờ 3 càr lài mờ tŭ tơnggơs càr Lâm Đồng pa, Tổng Ƀí thư ồng Tô Lam neh sồr mờ đơs sùm: “Lâm Đồng, Bình Thuận mờ Dăk Nông là ală ù tiah bềng bơhiàn kăc màng, bềng bơhiàn niam chài jơi bơtiàn, gam lơh ngan bơtàu tơnguh, tam gơl pa tơl làm mờ đơs nền tiah do ngai sơlơ kwơ màng tàm ù tiah bơtàu tơnguh lơh sa- mpồl bơtiàn tàm tiah tàm gùl lơgar mờ Tây Nguyên. Tơl càr ndrờm cèng tàm să he dê ală bơhiàn niam chài is, dùl bơta pràn pơn rơ ngan, pơgồp bơnah lơh geh ù tiah bơtàu tơnguh li la uă, uă bơta mờ bềng bơta ƀuơn bơta pràn.

Tổng Ƀí thư is ồn đơs sùm: Kah yau gam jàu ai càr Lâm Đồng pa in ală bơta ƀuơn bơta pràn, priă jền mờ tŭ tơngai niam ờ hềt tŭ lơi geh nàng bơtàu tơnguh, den tàng pal lơh jat niam, geh broă lơh di ngan nàng lơh tŭ tơngai niam, bơta pràn mờ bơta ƀuơn gơ gơs cồng nha bơtàu tơnguh geh ngan, tam gơl rài kis bơh làng bol dê.