Tàm dơ̆ lơh broă, Tổng Ƀí thư ồng Tô Lâm sồr, Đảng ủy Mặt trận Dà lơgar Việt Nam, ală mpồl cau Dà lơgar, Mpồl Củ tịc Anih duh broă Mặt trận Dà lơgar Việt Nam bal mờ ală mpồl cau tàm mpồl pơn jat tai lơh jat niam gơnoar broă tờm cíñ trị, sơlơ tơnguh tai broă lơh mblàng yal, tơrgùm wơl, hòi jà ală rơnàng làng bol tàm lơgar mờ cau Việt Nam kis tàm lơgar ndai.

Hòi jà tă pơgồp tơl bơta pràn, lơh kah wơl pràn kơl dang bơta bơceh lơh bơh tơl nă làng bol dê, dồ nùs bal, tàm sơm bat bal dà kơl hề lơh tus geh “4 Jơnau lơh nền tàm pơrjum tờm” bơh Ƀộ Cíñ trị dê ( Jơnau lơh nền tàm pơrjum sồ 57, 59, 66, 68). Pơndờm pơnđiang, kwang bàng, kông cứk, viên cứk, cau lơh broă mờ ală rơnàng làng bol dồ nùs bal, tă pơgồp bal lơh tus geh broă lơh kăc màng rơndăp tăp sèng mpồl lơh broă bơh Dà lơgar tus ƀòn lơgar tơrmù di pal, pràn, gơtùi cèng wơl cồng nha, gơtùi lơh broă, geh cồng nha, tam gơl bơta atbồ tus bơceh lơh bơtàu tơnguh, drơng broă mpồl lơh sa kă bro mờ làng bol, ai mpồl lơh sa kă bro, làng bol lơh tờm.