
Dùl tàm ală kơnòm bơsram lơh geh cồng nha jơnhoa tàm dơ̆ pơrlòng jơh bơsram kâp pe nam do là oh Bùi Thanh Lâm, oh là kơnòm bơsram bơh Hìu bơsram Kâp pe Cuyên Hùng Vương, oh ơm kis tàm sơnah ƀòn Diên Hồng, càr Gia Lai. Lâm là dùl là dồ êt nă kơnòm pơrlòng tàm ù tiah càr lơh geh điềm jơnhoa ngan rlau jơh môn dà Mỹ. Yal bè cồng nha lơh geh do, Lâm tơnggŏ bơta chờ hờp mờ gơlơh nisơna ngan. Bè mờng chài bơsram, Lâm đơs sùm bơta kwơmàng bơh broă gĭt nền jơnau gĭt wă bơta rơndăp jơnau mờ akhar bơh uă nam. Is ồn, oh gam rơcăng lài pơgồp bal mờ ală broă lơh bơsram bơceh pa, bè pờ sền ală gah youtube mờ dà Mỹ mìng bè jak chài nàng lơh bơtơl tai bơta chài iăt mờ lơh rơ̆ ru akhar, jơnau. Lùp bơh điện thoại, Lâm yal: “Nàng săc rwah kơnòm bơsram loh làng ngan, tài bơh jơnau lùp ƀươn den ƀươn ngan, mờ kal ke den kal ke ngan tơn. Oh kơlôi kờñ geh điềm 10 den kờñ pal geh nggu bơh tŭ gam dềt tus tŭ do, bơh akhar đơs; dilah gĭt bơta rơndăp akhar mờ gĭt jơh ală den rơ̆p geh lơh bàr pe bơnah. Oh sùm mờng pờ sền ală gah youtube geh uă akhar, đơs ƀươn wă bè Bsport, halà Mini Earth mờ uă gah ndai tai”.

Oh Bành Gia Huân, kơnòm bơsram Hìu bơsram Kâp pe Cuyên Lê Quý Đôn (Quy Nhơn) là dùl tàm ală kơnòm pơrlòng pơneh ngan rlau jơh bal mờ bàr điềm 10 jak ngan tàm môn Dà Mỹ mờ Vật lý. Cồng nha lơh geh do ờ mìng là bơta chờ hờp bơh nă să oh dê lơm mờ gam là bơta chờ hờp bal bơh hìu bơsram mờ hìu bơnhă dê. Nàng lơh geh cồng nha do, Bành Gia Huân neh geh dùl tŭ tơngai bơsram sền wơl jơnau neh bơsram jơh nùs jơh tồr mờ broă bơsram jak chài ngan. Gơ wèt mờ môn Vật lý, bơta kờñ ngan jak chài neh dong Huân bơsram môn bơsram do dùl bă rơcăng lài. Oh sùm lơh ală jơnau lùp kal ke, bơsram sơnơng nền ală jơnau tàm sră nggal mờ tàp lơh jơnau ai pơrlòng pơnyơu gời nàng bơtơl tai jơnau gĭt wă mờ lơh kwèng mờ bơta kơn jơ̆ cơldŭ pơrlòng. Gơ wèt mờ môn dà Mỹ, bulah geh dồ êt bơta nrơ̆t ndơl bè điềm khà lơh geh mơya oh kung gam pin dờn lơh geh cồng nha niam tài bơh là môn he dê kờñ.
“Oh kung gơlơh nisơna sơl tài bơh môn dà Mỹ neh ai wơl jơh jơnau ai pơrlòng mờ pơ àr cih gời den tàng oh ờ gơtùi ai geh điềm. Tàm hìu bơsram oh bơsram ơdŭ mìng dà Mỹ lơm bal mờ kung ơm tàm mpồl lòt pơrlòng kơnòm bơsram jak dà lơgar den tàng geh hìu bơsram tề lam uă. Ai ơm tàm hìu den oh sùm sền ală video mờ dà Mỹ nàng lơh pơrài bồ tơngoh mờ lùp bơsram uă bơta”.

Mò Nguyễn Thị Bé, mè oh Bành Gia Huân dê ờ gơtùi mpồn geh bơta chờ hờp mờ bơta hừh nùs. Mò Bé yal, hìu bơnhă sùm là anih pơndờm pơnđiang uă ngan, ai tơl bơta niam ngan rlau jơh nàng Huân in tơrgùm tàm broă bơsram. Mờ bơnàng jă kơ̆ kơl jăp mờ pơlam gùng loh làng, Huân gam crăp rơcăng ngan ai gùng lòt mŭt tàm hìu bơsram đại họk mờ jòi jăt bơta kơ̆ kờñ bơh he dê.
“Bơta kơ̆p kờñ bơh sau dê là pơrlòng gơkờn Đại họk Ƀak khoa ƀòn dờng Hồ Chí Minh, Gah Jak chài Măy mŏk den hìu bơnhă sùm pơndờm pơnđiang, gah bơsram hơ̆ den sền bal bòl glar ngan den tàng pal lơh ngan pơnđơl pràn nàng gơtùi wă wờng jơnau bơto”.
Tàm khà 327 nă kơnòm pơrlòng tàm Gia Lai lơh geh điềm 10 tàm dơ̆ pơrlòng jơh bơsram kâp pe nam 2025 uă ngan là tàm ală môn tơrgùm bal Jak chài mpồl bơtiàn mờ Jak chài geh is. Bơta do pà gŏ bơta ndrờm bal tàm cồng nha bơto bơtê mờ jơnau tơl pràn bơh kơnòm bơsram tàm ù tiah càr dê.
Viết bình luận