Ồng Nguyễn Đức Lực, cau dờp lơh hìu tàm sàh Ia Ko, càr Gia Lai gam lơh 10 nơm hìu ai hìu rơƀah in mờ khà priă 60 tơlăk đong tàm 1 nơm hìu. Ală hìu gam tàm tơngai mờr lơh gơs, mơya ồng mìng rơ̆p dờp khà priă ơpah gời. Ồng Nguyễn Đức Lực pà git, tơn jơh hìu sèt là broă lơh dờng ngan, den tàng ồng ờ kơlôi tus mờ bơta hoàc huơr ha là geh kwơ: “Gùt làng bol tus bal tơn jơh hìu sèt, hơ̆ là añ dờp bal lơh mơ. Añ ngui dùl khà priă bơcri nàng làng bol càn priă blơi phan lơh hìu in mờ tơm rơhời. An rơ̆p ai geh broă lơh nàng làng bol tus bal lơh hìu, jì ñhơ̆t ha là pic plai kơphe tàm suơn hìu añ, kờp priă ơpah lơh nàng làng bol tơm rơhời jăt nam. Làng bol tơm rơhời 2, 3 nam den jơh sơl”.

Kis đềt mềr mờ ƀòn lơgar, lơh broă bal mờ làng bol sơrlèt mờ kal ke, Viettel Kon Tum uă nam do sùm tus bal ală broă lơh rài kis broă lơh broă sa mpồl bơtiàn, tàm hơ̆ uă ngan là broă lơh tơn jơh hìu sèt, hìu ồm ñhăt dà mìu – do là dùl broă lơh dờng geh nùs nhơm dong kờl uă geh Thủ tướng Cíñ phủ lam lơh. Ồng Diệp Trung Kiên, Phó Kwang lam bồ Viettel Kon Tum lài do pà git: “Dờp bal jơnau hòi jà, tàm nam 2025, Viettel Kon Tum neh rơcang dan mờ Tập đoàn dong kờl càr 5 tơmàn đong nàng lơh broă lơh tơn jơh hìu sèt, hìu ồm ñhăt dà mìu mờ lơh niam hìu ơm ai ală hìu làng bol geh rài kis gơtìp kal ke tàm ƀòn lơgar in”.

Ală mpồl lơh sa kă bro tus bal geh kơnòl mờ broă lơh tơn jơh hìu sèt, hìu ồm ñhăt dà mìu, den broă lơh geh kơnòl gơwèt mờ mpồl lơh broă cíñ trị bơh ală càr Tây Nguyên ngai sơlơ pràn kơl dang. Bŭ lah pal bơsong ală bơta kal ke bè priă jền bal mờ sră nggal ù tiah ai broă lơh hìu pa-tơn jơh hìu sèt, mơya càr Gia Lai mờ Dăk Lăk ndrờm sền wơl nền nòn mờ tơl càr ndrờm lơh rơndăp broă lơh rơlao 8 rơbô 100 nơm hìu. Khà uă ngan, mpồl lơh broă dờng ngan, mờ di bal tàm tơngai tơrmŭt bal mpồl lơh broă sră pơ-àr gơnoar atbồ lơgar, ală càr kung gam lơh ngan lơh broă lơh hìu, hìu jà tơrgùm jơh bơh Dà lơgar tus tàm ală sàh. Ồng Siu Trung, Phó Củ tịc Anih duh broă Mặt trận Dà lơgar Việt Nam càr Gia Lai pà git: “Mpồl Sồr lơh bè broă lơh jăt tơn jơh hìu sèt càr neh geh sră hòi jà ală mpồl lơh sa kă bro, cau dùl nă să tàm càr mờ càr bơdìh lam nàng tus bal tă pơgồp tai bơdìh mờ priă dong kờl geh bơh Dà lơgar. Bơh tŭ hơ̆, lơh gơs khà broă geh jào geh tai priă nàng lơh gơs broă lơh. Geh ờ uă ƀòn lơgar neh rơcang lài tàm broă càn priă di tŭ nàng lơh. Bơdìh hơ̆ tai, mpồl ling kung geh hòi jà, tă ngai lơh broă nàng gàr niam tơngai broă lơh”.

Bơh ngai 01 nhai 7, gơnoar atbồ 2 kấp mùl màl lơh broă, ală càr Dăk Lăk, Gia Lai, Lâm Đồng ndrờm sền wơl jơh broă lơh tơn jơh hìu sèt, ai tơngŏ neh lơh mờr 20 rơbô nơm mờ rơlao 1 rơbô 900 nơm gam gơtìp gơkòl. Ală sàh, sơnah ƀòn pa neh geh jào kơnòl pal lơh, tơngai mùl màl ai broă lơh gơs ală hìu dŭt ndơl nàng lơh broă tơn jơh hìu sèt ingơs di mờ tơngai geh ai.

Mò Nguyễn Thị Hồng Hạnh, Lam bồ Cơl dŭ Lơh sa sàh Cuôr Dăng, càr Dăk Lăk pà git, tàm nam 2025, gùt sàh geh 31 hìu geh dong kờl lơh pa den ndrờm gơtìp gơkòl tài gơrềng tus mờ ù tiah bal mờ sră nggal lơh. Tŭ tam gơl broă lơh gơnoar atbồ ƀòn lơgar 2 kấp mờ geh jào kơnòl mùl màl bè Broă lơh tơn jơh hìu sèt, sàh neh lơh pràn ală bơnah broă bơh să tờm dê: “Kal ke uă ngan bơh làng bol dê bè ù tiah là tài broă mè bèp, oh mi pà ha là gơnoar ngui ù mơya ờ hềt tam gơl măt, tam cah is bă ù; geh ờ uă cau gam ơm tàm bă ù lơh sa suơn sre mơya ờ hềt tam gơl. Den tàng, bol añ neh dong kờl làng bol lơh sră nggal tam gơl, tơnơ̆ mờ hơ̆ tam cah is, hơ̆ sồng bơyai lơh ală broă tam pà, tam gơl măt ha là pà ha là lơh gơs bă ù lơh hìu. Gam gơwèt mờ ală sră nggal lơh, kông cứk geh lơh sră, ală khà dia gơrềng tus mờ broă lơh hìu bơh cau dùl nă să ndrờm geh lơh gơs mờ ờ sa priă”.

Ală broă lơh ngan bơh gơnoar atbồ, làng bol bal mờ mpồl lơh sa kă bro, broă tơn jơh hìu sèt tàm Tây Nguyên neh geh lơh ndrờm bal. Ƀí thư Tỉñ ủy ală càr là cau lam bồ mpồl sồr lơh, pal tơrgùm uă ngan ai broă bơsong ală gơkòl in, lơh mhar broă lơh. Ồng Nguyễn Đình Trung, Ƀí thư Tỉñ ủy càr Dăk Lăk pà git, neh geh ală tŭ gơlơh bè ờ gơtùi lơh gơs di jăt tơngai geh ai broă lơh tơn jơh hìu sèt, tài làng bol mìng geh bă ù lơh sa suơn sre ha là ù gam geh cau tàm jơi nòi atbồ. Mơya mờ broă ring bal lài kung bè tơnơ̆ bơh dà lơgar tus sàh bal mờ broă sồr lơh di tŭ, ală gơkòl sùm pal geh bơsong: “Duh kơnòl broă sùm Tỉñ ủy sùm sền gròi tus mờ broă do. Ai bơh tàm bơta mùl màl bơh ƀòn lơgar dê, Tỉñ ủy neh lơh geh Mpồl Sồr lơh hìu ai hìu rơƀah mờ ală hìu geh sră dong kờl bơh mpồl bơtiàn dê. Tỉñ ủy neh sồr Anih duh broă Làng bol càr, ală sớh gah lơh broă lơh pràn tàm broă lơh do, lơh bè lơi geh cồng nha, di tơngai geh ai, di cau”.

Tơl rơkàng hìu pa kơl jăp gam geh lơh tàm ală ƀòn tiah Tây Nguyên, ờ mìng dong kờl làng bol lơngăp lơngai rài kis, mờ gam bơ̆t bơtàu nùs nhơm pin dờn tàm ală gùng dà broă lơh di pal, rềp làng bol, tài làng bol. Bơdìh mờ tơl nơm hìu là broă pơgồp bal nền nòn đah Dà lơgar mờ ƀòn lơgar, là bơta pràn bơh mpồl Kwang àng, Ling klàng, gơnoar atbồ ƀòn lơgar, mpồl lơh sa kă bro bal mờ làng bol tă bal bơta pràn nàng lơh gơs.

Sền jơnau cih dơ̆ I tềng do: https://vov4.vov.vn/kho/cing-sac-mo-rai-kis-chinh-sach-va-cuoc-song/ton-joh-hiu-ing-hiu-om-set-nhat-da-miu-bot-botau-bota-pin-don-tam-ala-bon-tay-nguyen-492151.vov4