Mang òr (24/11), tàm Ƀòn Niam chài – Lòt nhơl ală jơi bơtiàn Việt Nam, Thủ tướng ồng Phạm Minh Chính tus bal Dơ̆ bơyai lơh sơnđờm Tơngleh “Tam klăc ală jơi bơtiàn – Phan lời wơl niam chài Việt Nam” nam 2025 bal mờ tơngume “Tam klăc dùl nùs – Kah hờ tiah tàm gùl lơgar” mờ hòi jà mpồl bơtiàn mpồl lơh sa kă bro, làng bol tơrgùm bal pràn dong kờl làng bol tiah tàm gùl lơgar mờ Tây Nguyên bơsong jơnau gơlời wơl tài bơh dà liù dà kŏ. Broă lơh sơnđờm bơh jơnau cih sền gŏ ngan yal wơl ală hoàc hươr kơn jơ̆ kơn jŭt ngan tài bơh mìu dà lìu lơh gơbàn. Thủ tướng Cíñ phủ hòi jà ală mpồl “tàm dong tàm kờl bal, tam pà bal kal ke”, pin dờn bơta pràn tam klăc dờng jơh gùt jơi bơtiàn rơ̆p dong dà lơgar sơrlèt bơta lòng, pơn jăt tai bơtàu tơngguh kơ̆ kơl jăp. Tàm dơ̆ bơyai lơh, ală mpồl cau, mpồl lơh sa kă bro neh tă pơgồp 540 tơmàn đong dong kờl làng bol gơtìp gơrềng tài bơh mìu dà lìu.

Mho òr (24/11), tàm Hìu lơh broă Cíñ phủ, Thủ tướng ồng Phạm Minh Chính bal mờ đơng lam Cíñ phủ mờ Mpồl cau Cơldŭ lơh broă Cíñ phủ neh tus bal dong kờl làng bol tiah tàm gùl lơgar gơtìp hoàc huơr tài càl rbut dờng dà tih dà lìu lơh gơbàn mờ nùs nhơm “tàm kờñ gơboh, dong kờl bal kòn bơnus”, tơl nă kwang bàng, cau lơh broă sa priă nhai dà lơgar tă pơgồp bơh 1 ngai priă nhai. Thủ tướng sồr ală anih lơh broă geh gơ rềng mhar lơh sir jơnau rơcang cih jơnau lơh nền tàm pơrjum bè kơnòl broă mờ broă lơh tờm nàng bơsong jơnau gơ lời wơl bơh trồ tiah lơh aniai, mhar gàr niam bè ờs wơl rài kis làng bol mờ bơt bơtàu wơl lơh sa, kă bro. Bal mờ hơ̆, Thủ tướng sồr lơh pràn ală broă lơh chồl tơnguh gơguh lơh sa gơ jat bal mờ gròi sền roh giă priă tàm ală nhai gam wơl nam dê, gàr niam ờdo ờdă rài kis mpồl bơtiàn mờ gàr kơ̆ broă lơh sa dờng.