Dăk Lăk là tiah kong hoàc huơr kơn jơ̆ kơn jŭt ngan rlau jơh tàm dơ̆ dà tih dà lìu pa do, mờ tơrgùm kờp bơh sơn rờp pà gŏ, jơh gùt càr geh 55 nă cau chơ̆t, 10 nă cau roh thĭt, rlau 150 rơbô nơm hìu bơtìp ngơr jrô tàm dà, kờp jơh hoàc huơr kờp dŭ lào rlau 5 rơbô 500 tơmàn đong. Tŭ do dà neh hoài soăt jơh tàm ală sàh, sơnah ƀòn tiah đah mat tơngai lik càr dê, lơh geh ală bơta nàng ală mpồl cau in mhar dong kờl làng bol.

Ƀí thư Tỉñ ủy càr ồng Lương Nguyễn Minh Triết sồr bơto pơlam ală mpồl dong kờl is pà phan sa phan ngui di tiah, di cau; dơ̆ lĕ bal ai cau lòt pơs wàs tiah ơm kis, ngan là tàm hìu bơsram, hìu sơnơm nàng gờñ bè ờs wơl broă lơh drong làng bol. Sờh Broă lơh sa suơn sre mờ tiah ơm kis càr, Kwang bàng càr mờ Gah đơng lam mpồl ling càr neh hòi jà mpồl cau dong kờl làng bol khòm tơrgùm bŏ ù, sồ siă, lơh niam wơl phan bơna bơt bơtàu, lơh ngan gờñ ai rài kis rê wơl mờ bơta bè ờs.

Củ tịc Anih duh broă Làng bol càr Dăk Lăk ồng Tạ Anh Tuấn pa tus tơn tàm ală tiah gơtìp gơrềng uă nàng sền broă dong kờl mờ bơsong hoàc huơr bơh mìu dà tih dà cò geh Mpồl đơng lam Ling klàng càr lơh. Tŭ do git nđờ rơhiang nă kwang bàng, cau ling bơh Trung đoàn 584 mờ Trung đoàn 888 gam dong kờl làng bol toah wàs ù mbè, rơndăp wơl phan, lơh niam wơl hìu bơsram, hìu sơnơm, lơh jăt broă lơh “Hìu trŭ sa ling klàng mờ làng bol” nàng gàr niam dơ̆ sào sa, rài kis niam ai làng bol tàm tiah gơtìp dà tih in.

Củ tịc Anih duh broă Làng bol càr sồr ală mpồl ling pơn jăt tai jăt sền ƀòn lơgar, bañ lời làng bol ờ tơl sa, mờ sồr ală sờh, gah lơh broă pơgồp bal nền nòn mờ mpồl ling tàm broă bơsong niam tiah kis, kloh niam dà hùc, kờp sền hoàc huơr mờ dong kờl lơh wơl lơh sa, nàng mhar kơl jăp rài kis, gàr niam bơta pràn kơl dang să jan mờ rài kis jŏ jòng ai Làng bol in tơnơ̆ mờ rềs àr bơh trồ tiah.

Tàm Gia Lai mờ Khánh Hoà, broă lơh rcang lài kơryan kòp tơnơ̆ dơ̆ dà tih dà lìu geh lam lơh mhar ngan nàng kờñ sền gàr pràn kơl dang să jan mpồl bơtiàn dê. Hìu sơnơm tơl càr neh ai gĭt nđờ jơ̆t nă kwang bàng, cau lơh broă tus tàm ală sàh gơtìp ngơr jrô tàm dà nàng lơh kloh khuẩn tiah ơm kis, bơsong dà ngui sa pah ngai, bơto pơlam làng bol gàr sàng goh să jan, khòm tơrgùm sồ siă, tơrmù ƀà bơta pơhìn bơtờp kòp uă.

Lài hơ̆, Ƀộ lơh sơnơm neh hòi jà mờr 10 tấn dà sơnơm lơh kloh khuẩn dà mờ gĭt nđờ rơbô kơldung sơnơm hìu bơnhă kwơ màng dong kờl ai Khánh Hoà, Gia Lai, Dăk Lăk in rcang lài drơng tơnơ̆ tŭ dà kŏ dà cò. Gah lơh sơnơm tơngkah làng bol ờ gŏ di ngui dà ờ hềt geh jồr, tơnguh pơs wàs sàng goh hìu đam, wàng ròng, mơkung pơgồp bal mờ anih lơh broă geh gơnoar tàm broă jat sền mờ gĭt gŏ gờñ tềl tơngŏ nisơna.