Tàm pơrjum, cau lơh broă sa, mpồl lơh sa kă bro mờ lơh broă bal pơyoa mờr 400 jơnau lùp, đơs tơn 25 jơnau dan bè sră pơ àr gơnoar atbồ, lơh tiah tam phan, ngui jak chài- măi mok, jòi gĭt tiah tờm lơh gơlik, lơh gơlik jrô, sền gàr broă lơh sa suơn sre, tiah ơm kis ƀòn lơgar mờ gàr tơl niam rài kis mpồl bơtiàn.

Ală cau ala mat cribơyai uă mpồl broă lơh tờm bè tơrmù ƀà hoàc huơr tài bơh trồ tiah lơh anaia, bơtàu tơnguh broă lơh sa suơn sre ngăc ngar, rề ơnàng drà kă bro- tơnguh uă bơta niam bơkah- mờ bơta pràn tàm pơrlòng broă lơh sa suơn sre, sơlơ tơnguh tai lơh broă bal- ală anih lơh bal, tam gơl niam broă càn priă, ù tiah mờ jơnau yal tơngĭt drà kă bro dê.

Uă jơnau đơs ờ suk ơm tềng đăp bơta blăc pơrlồm kă bro phan, lơh pơrlồm phan lơh geh bơh broă lơh sa suơn sre Dà Làc lơh hoàc huơr ai cau lơh broă sa in. Mò Lương Thị Yến Vân, cau lam bồ Mpồl lơh broă bal Vườn Nhà Dà Làc, pà gĭt: “Dùl kĭ plai zơu tơi añ tam is den giă tăc ờ kas ngan rlau jơh kung là 100 rơbô đông, tŭ pơr ro 10 kĭ hơ̆ sồng geh 1 kĭ. Kờp tai priă ồs đèng, cau lơh broă den kờp jơh priă tă lơh là 1 tơlak 200 rơbô đông dùl kĭ plai zờu tơi pơr ro. Mơya phan bơna tăc tàm drà kă bro bơdìh bè tàm drà Dà Làc cau tăc mìng 250 rơbô đông dùl kĭ, tàm tŭ ờ geh khat dùl sră pơ àr lơi yal tơngĭt nền tiah tờm lơh gơlik, mơya kung geh ơn tàm hộp mờ lĭp măt kă bro phan plai zơu tơi Dà Làc sơl. Den bè plai hồng ris, blơi jơh dùl rơndeh container rê tăc mờ lĭp mat kă bro phan tam tàm Dà Làc. Añ gŏ ờ geh anih lơh broă lơi ñă ntào nàng sền gàr gơnoar kwơ bơh cau lơh broă sa dê ờ, bol añ kung ờ suk ơm ngan broă bè hơ̆”.

Đơng lam bồ ală sờh, gah broă neh hơ tơn uă tơngume; ală broă ờ hềt gơtùi hơ tơl làm rơ̆p geh tơrgùm wơl mờ hơ mờ sră nggal ai làng bol in.

 Đơs tàm pơrjum, Củ tịc Anih duh broă Làng bol càr Lâm Đồng, ồng Hồ Văn Mười đơs sùm nùs nhơm “hơ song dơ pă, bơsong mhar”. Càr hơ bơsong di tŭ ală jơnau đơs jơnau dan di pal bơh cau lơh broă sa dê; ală tơngume sơr lèt mờ gơnăp gơnoar rơ̆p geh yal mờ Dà lơgar. Bè bơta phan bơna tiah ndai blơi den hơ̆ sồng lơh pơrlồm phan lơh geh bơh broă lơh sa suơn sre tiah do dê, ồng Hồ Văn Mười đơs nền rơ̆p bơsong kràñ:“Tơnơ̆ pơrjum do, bol añ rơ̆p đơng lam tơn ală mpồl lơh broă geh gơrềng, tàm hơ̆ gơnoar kwơ màng ngan bơh mpồl kwang àng, Sờh Lơh sa mờ măi mok mờ Kă bro phan, atbồ drà kă bro mờ ală mpồl lơh broă ndai. Broă do ờ kal ke ir dilah bol he lơh kràñ cê jơh nùs”.

Pơrjum geh kơ̆p gơn lơh geh tai bơta gơn kơnờm nàng broă lơh sa suơn sre Lâm Đồng bơtàu tơnguh kơnhăp jŏ, tơnguh uă priă lơh geh mờ rài kis cau lơh broă dê tàm tơngai tam gơl nhơm trồ tiah ngai sơlơ ờ niam ngan.