Anih duh broă Mặt trận dà lơgar Việt Nam ƀòn dờng Hồ Chí Minh pà gĭt, broă lơh hòi jà mờ dờp dong kờl phan ai làng bol ală càr tiah tàm gùl lơgar gơtìp gơrềng tài bơh mìu dà lìu neh lơh geh cồng nha dờng ngan. Mpồl Hòi jà Dong kờl phan ƀòn dờng Hồ Chí Minh neh dờp rlau 32 rbô 400 dơ̆ tă pơgồp mờ kờp jơh priă pơgăp 245 tơmàn đong. Bal mờ hơ̆ là pơgăp 30 rbô kơldung sơnơm hìu bơnhă, 70 tấn phe mờ mờr 1 rbô 400 tấn phan jơnau kờñ pal geh kờp priă rlau 140 tơmàn đong.

Ƀòn dờng Hồ Chí Minh kung hòi tơrgùm jơh bơta pràn rơndeh rơndồ măy mŏk phan ngui, mpồl cau nàng dong kờl càr Khánh Hoà bơsong jơnau gơlời wơl kơn jơ̆ kơn jŭt ngan bơh trồ tiah dê lơh aniai, tàm hơ̆ geh broă jàu 50 tơmàn đong dong kờl jal mhar, dong kờl lơh niam wơl 23 nơm hìu klờng gơtìp tơrlah tơrlơm mờ sồr 650 nă cau dong kờl is să tờm tus bal lơh sàng goh tiah ơm kis tàm ală anih hoàc hươr kơn jơ̆.

Ngai òr (24/11), Gah đơng lam tiah 4 ling dà lềng pơn jat tai sồr ntrờn mờr 1 rbô nă kwang bàng, cau ling bal mờ uă phan bơna, măi mok tis ală tiah gơtìp gơ rềng kơn jơ̆ tài bơh mìu dà tih dà lìu tàm càr Khánh Hòa mờ càr Dăk Lăk. Mpồl ling dà lềng geh tam pà gơs uă gùng mut dong kờl, lam lơh pơs wàs git nđờ jơt jơi sồ gùng lòt drơng rài kis làng bol; dong kờl lơh sàng goh, khòm tơrgùm bŏ, ù tàm 12 hìu bơsram, 3 hìu lơh broă Anih duh broă Làng bol, 1 anih tờm lơh sơnơm mờ mờr 100 hìu làng bol gơ wèt ală sàh Đông Hòa, Tuy Hòa, Bình Kiến, Bắc Nha Trang mờ sàh Diên Điền. Bal mờ hơ̆, ală mpồl tàm jơh gùt tiah do neh jun tus làng bol in mờr 100 khối dà sàng, 5 rbô thùng ƀung mi mờ uă phan ngui sa pal geh bè phe, dà toh, àu mpha, ồi tơ̆, kơmùng bic. Gah đơng lam tiah 4 pà git, khà broă kung gam uă ngan mờ mpồl ling dà lềng rơp pơn jat tai dong kờl ală tiah tàm ală ngai tus.

Tàm càr Lâm Đồng, mìu dà lìu ală ngai do lơh gơhùc ñchùn ù, tơrlah kơn jơ̆ ngan, lơh gơkòl uă gơl gùng tờm kwơmàng. Ƀộ Bơ̆t bơtàu pơgồp bal mờ càr hòi tơrgùm mpồl cau, măy mŏk rơndeh rơndồ phan ngui nàng cò pơnring ntrờn ù lŭ, lơh kơnhăp wơl bàr gah gùng, lơh geh wơl gùng dà hòr mờ jăt sền nền bơta gơbàn bơh nhơm trồ tiah dê nàng kờñ sền gàr lơngăp lơngai làng bol in. Thứ trưởng Ƀộ Bơ̆t bơtàu ồng Lê Anh Tuấn pà gĭt, mpồl gam sơrbăc mhar bơsong rơndăp tăp sèng phan bơna gùng lòt nàng gờñ lơh geh wơl gùng lòt rê jun pơndiang phan kă bro mờ kơ̆ kơl jăp lơh sa. Mìng is tàm Gùng dà lơgar 20 kuèl Mimosa, ală mpồl geh jơnau kờñ tàm 10 ngai rơ̆p gơtùi lòt rê ing jơh gùt gơl gùng mờ lơh sir jơh ală rơndăp broă lơh tàm pơgăp dùl nhai. Lâm Đồng kung sồr ală ƀòn lơgar rơcăng lài gùng dà broă lơh drơng wơl, kờp sền nền wơl kơnhoàl ù tiah pơhìn uă nàng ntrờn làng bol tŭ kờñ.