Dơ̆ dà tih dà lìu dờng ngan bơh lài tus tŭ do pa do neh lơh gơbam 34 sàh, sơnah ƀòn tàm càr Dăk Lăk, tàm hơ̆ gơtìp hoàc huơr uă ngan là ală sàh Đông Hoà, Hoà Xuân, Hoà Thịnh, Hoà Mỹ… Tŭ dà gơmù soăt, làng bol bal mờ mpồl ling klàng, kwang àng, mpồl lơh broă tàm ală sàh mhar toah ù mbè, ƀồm sơnơm lơh kloh vi khẩn, tơrgùm siồ siă, lơh wơl broă lơh, nàng gờñ kơl jăp rài kis.

Jăt khà kờp pa ngan bơh Anih duh broă Làng bol càr Dăk Lăk dê pà git, gùt càr geh 55 nă cau gơtìp chơ̆t, 10 nă cau jòi ờ gŏ ƀồc, rơlao 150 rơbô nơm hìu gơtìp gơbam jrô tàm dà, 120 nơm hìu gơtìp tơrlah ha là tơrlah jơh tơn; kờp jơh hoàc huơr kờp dŭ rơlao 5 rơbô 500 tơmàn đong. Ƀí thư Tỉñ ủy ồng Lương Nguyễn Minh Triết đơs tờm, dà neh soăt jơh tàm tiah đah măt tơngai lik càr, Tỉñ ủy sồr ală mpồl lơh broă jal mhar dong kờl làng bol, pơgồp bal tam pà broă lơh nùs nhơm dong kờl is, mờ pơs wàs kloh niam tiah kis, tàm hơ̆ uă ngan tàm hìu bơsram, hìu sơnơm nàng gờñ drơng làng bol in tus wơl.

Mho òr (23/11), tàm Anih ơhò ơm Quy Nhơn, gĭt nđờ jơ̆t nă kwang bàng, cau ling Mpồl ling dà lềng sền gàr tiah nhàr lơgar 2 mờ Pôs đồng ling sền gàr tiah nhàr lơgar Mpồng tiah nhàr lơgar anih ơhò ơm Quy Nhơn mhar tui 120 tấn phe bơh Kụk Ơn prap phan Dà lơgar dê dong kờl làng bol Gia Lai gơtìp gơrềng tài bơh dà kŏ dà cò.

Kung dùl tŭ bal, tàm sàh Ngô Mây mờ Cát Khánh, 20 nă kwang bàng, cau ling Pôs đồng ling sền gàr tiah nhàr lơgar Cát Khánh pơgồp bal mờ gơnoar atbồ ală tiah jun pơndiang, tàm pà 15 nơm rơndeh pơndiang phan ngui sa tus tàm ală thôn Chánh Hữu, Chánh Định, Chánh Hội mờ Vân Trim, gàr niam di tŭ, di cau. Tàm dơ̆ dà kŏ dà cò pa do, gĭt nđờ jơ̆t rơbô nă kwang bàng, cau ling gơwèt Ling tiah 5, Ling mpồl 34 mờ Gah đơng lam Ling klàng càr Gia Lai neh hòi jà tơrgùm uă ngan rlau jơh mpồl, rơndeh rơndồ măi mok pơgồp bal mờ kwang àng, gơnoar atbồ ƀòn lơgar bơyai lơh dong kờl rềs àr, ntrờn gĭt nđờ rơhiang rơbô nă cau lik bơh tiah ngòt rơngơ̆t, dong kờl gĭt nđờ rbô dơ̆ cau tàm tơngai mìu dờng dà lìu gơlik geh kal ke.

Mang òr (23/11), mpồl ling sàh D’ran, càr Lâm Đồng pơn jăt tai dong kờl làng bol ntrờn tus tàm tiah niam, mờ pơn diang phan bơna lik bơdìh tiah di gơlan gơtìp tơrlah ù uă. Lài mờ hơ̆, tàm 3 jơ mho òr, gơnoar atbồ sàh D’ran gŏ hờ đang dòr Ba Lá Xanh, thôn Lạc Thiện 1 geh rơdàng ù jòng rơlao 300 thơ̆k, ơnàng bơh 20 tus 50 phơng, geh tiah gơmù ù mờr 1 thơ̆k jăt dòr bơnơm, di gơlan gơtìp tơrlah ù uă ngan.

Bal mờ tŭ hơ̆, đah chàr bơnơm bơh 2 nơm hìu làng bol pơn jăt tai gơtìp tơrlah, lơh git nđờ jơ̆t khối ù lŭ gơmù tus tàm ƀòn ơm kis. Tơnơ̆ mờ tŭ dờp geh jơnau yal, gơnoar atbồ sàh lam git nđờ jơ̆t hìu làng bol tàm tiah đơm chàr bơnơm ntrờn mhar, ai ù tiah lơh ƀòn ơm kis niam. Mpồl ling, kwang bàng, mpồl lơh broă tàm sàh D'ran geh hòi jà tus dong kờl pơn diang phan, rơndeh nàng tơrmù ờ uă ngan hoàc huơr mờ gàr niam màng kis làng bol in.