Pal sền gròi, càr sồr ală sàh, sơnah ƀòn lơh gơs broă lơh niam wơl hìu gơbàn ờ niam lài mờ ngai 30/11; rơndap anih ơm ing niam ờdo ờdă mờ lơh pa, rơndap tiah ơm kis pa ai ală hìu bơnhă geh hìu gơtìp tơrlah tơrlơm, dà cò pơrdô hìu lài mờ ngai 31/01/2026. Jat sră nggal sồr lơh, mìu neh ờ huan gam tai, dà tih neh gơ hòi soat; ală sàh, sơnah ƀòn pal sền gròi tus ƀòn lơgar, ngan là tiah neh geh tŭ gơtìp ngơr bam jrô, gơ wềl, nàng git bơta geh ngan mờ lam lơh ală kơnòl broă bơsong wơl mờ nùs nhơm jal mhar, geh cồng nha. Broă lam lơh lài ngan là tus mờ jơh ală hìu bơnhă gơtìp dà wềl, dong kờl jal mhar phan sa, dà hùc, phan ngui sa pal geh; ờ gŏ di lời làng bol gơtìp jơgloh, noat mrềt. Càr Dăk Lăk sồr mpồl ling, kwang àng, đoàn viên ơruh pơnu mờ làng bol pơs wàs hìu đam, hìu bơsram, hìu sơnơm, gùng lòt; gờñ lơh niam wơl gùng che đèng, pờ wơl dà, lơh niam wơl viễn thông. Ală tiah pal kờp sền, tơrgùm kờp di hoàc huơr; dờp mờ tam pà phan dong kờl loh làng, ndrờm bal, di cau kờñ geh dong kờl.