Jờng rơ uă ngan nùs nhơm rcang lài bơh làng bol mờ bơta lơh ngan bơh ală mpồl lam lài dê, Phó Thủ tướng cih dờp càr Khánh Hoà neh hòi jà uă ngan rlau jơh mpồl, tàm hơ̆ geh Ƀộ Tư lệñ Tiah 4 Ling dà lềng ngui kanô tàm trồ mang lam gĭt nđờ rơhiang nă làng bol lik bơh tiah sơbơng roh. Mpồl ling klàng, kwang àng mờ cau ling re dà pơn jat tai lòt tus ală sàh gam gơtìp dà wềl. Bulah dà tih tàm bàr pe tiah rơhời hoài soăt, mơya dà kŏ dà tih kung gam gơlik geh kal ke, trồ gam mìu, uă gơl gùng gơtìp ngơr bam dà halà tơrlah ù. Phó Thủ tướng sồr làng bol pơn jat tai ơm wơl tàm tiah ơm pleh lơngăp lơngai, ờ gŏ di rê is tàm hìu tŭ ờ hềt geh jơnau yal bơh gơnoar atbồ dê.

Tus mho mang ngai 20/11 mìu tàm tiah đah măt tơngai Lik – đah jum tàm gùl lơgar mờ Tây Nguyên neh ờ huan đau dờng ir. Tiah mìu uă ngan rlau jơh ơm tàm khà rlau 350 mili mét, gơmù nggùl pơndrờm mờ khà mìu dờng ngan rlau jơh bơh lài tus tŭ do tàm ngai 19/11. Hìu măy lơh đèng dà Dà dờng Ba Hạ kung neh tơrmù khà yuh mờ dà tih dà lìu tàm ală dà dờng tàm Gia Lai, Dăk Lăk ndrờm gơmù. Gùng dà lơgar 29 tàm tơrbŏ tiah đah măt tơngai Mŭt mờ Lik càr Dăk Lăk neh gơtùi lòt rê mờ uă mpồl cèng jăt bal rơndeh rơndồ dong kờl cau, phan sa, sơnơm, phan ngui…tus tiah đah măt tơngai Lik dong kờl ai làng bol tiah dà tih dà lìu in. Khà yal tơngkah lài trồ tiah lơh aniai bơh kâp 3 ngai do dê, neh geh tơrmù tus khà 1 tàm 2 ngai tus.

Tàm càr Lâm Đồng, tiah mìu dờng ngan geh tàm bă ù ờ ơnàng rlau, mìng là tàm ală sàh Dran, Đơn Dương…đah đơm Hìu măy lơh đèng dà Dà Nhim kung neh rlau jơnau jal mhar. 1 rbô 500 nă làng bol neh geh ntrờn tus tiah lơngăp lơngai. Tơnơ̆ tŭ dà tih dà lìu gơhoài gơ hŭc, làng bol mờ gơnoar ătbồ ƀòn lơgar gam tơrgùm bơsong jơnau gơlời wơl. Broă lơh dong kờl tiah dà tih dà lìu tàm đah măt tơngai Lik mờ đah jum tàm gùl lơgar mờ Tây Nguyên kung gam jal mhar ngan mờ uă bơta sơbơng roh.

Tàm càr Lâm Đồng, tài bơh dà yuh tàm pà dà bơh Kông ty Hìu măi đèng dà Dà Nhim – Hàm Thuận – Dà Mi hòr tus bơtơ̆t lìu dà Đơn Dương gơguh sùm tàm mang ngai 19/11, geh tŭ gơguh tus 2 rơbô 580 khối dùl zơi, ală sàh tàm tiah đah đơm dà dờng Dà Nhim- tàm hơ̆ geh sàh D’ran- neh ngơr jrô tàm dà. Càr neh hòi jà tơrgùm jơh mpồl cau, rơndeh rơndồ măi mok ntrờn rlau 1 rơbô 500 nă cau tàm sàh D’ran tus tiah ơm lơngăp lơngai.

Jat tơrgùm kờp bơh sơn rờp, geh mờr 750 nơm hìu gơtìp dà wềl jơh, ờ diơng kơn jơ̆; 5 nơm hìu gơtìp tơrlah; pơgăp 1 rơbô 320 lồ phan tam gơtìp hoàc huơr. Mìu dờng gam lơh gơlik geh uă tiah ñchùn ù, gơ hoài ù tàm ală gơl gùng lòt rê càr dê. Bơdìh mờ tiah tơrlah tàm koèl kơh Mimosa – gơwèt Gùng dờng Dà lơgar 20- lơh gùng lòt rê gơ kòl, uă gơl gùng ƀòn lơgar kung gơtìp ờ diơng kơn jơ̆ ngan sơl. Gơl gùng bơh sàh Đan Phượng lòt tus sàh Tân Thanh (tŭ do là ù tiah sàh Tân Hà- Lâm Hà) gơtìp tơrah, gùng lòt rê gơ kòl. Đơng lam bồ Anih duh broă Làng bol càr Lâm Đồng sồr gơnoar atbồ ală sàh mờ mpồl lơh broă geh gơnoar pơn jat tai ntrờn làng bol lik bơh tiah ngòt rơngơ̆t, ai tiah ơm ing lơngăp lơngai, gàr niam tơl làm phan sa, dà hùc, ồi tơ̆, kơmung mờ phan ngui sa kờñ pal geh.