Jun kòn lòt bơsram ngai sơnrờp tàm Hìu bơsram mầm non Sao Mai - do là broă lơh geh Ƀiñ đoàn 15 gơwèt Ƀộ Ling klàng pa jào pà oh kòn tàm sàh Ia Krêl in, ồng Rah Lan Vọng tàm ƀòn Ngol Le ai tơngŏ nùs nhơm chờ hờp ngan. Hìu bơsram pa lơh gơs niam, 5 jơdŭ bơsram geh jơh kơnhăp; bal mờ hìu trŭ sa, jơdŭ tàp pràn să jan, ƀlàng nhơl, hìu ơn rơndeh… tơl nàng ai 300 nă kơnòm dềt in nhơl chờ, bơsram sră. Bal mờ phan bơna geh lơh, hìu bơsram gam geh rơcang tơl ală bơta phan bơsram, phan nhơl, là nùs nhơm kơ̆p kờñ ngan bơh kơnòm dềt tàm ală ƀòn tiah nhàr lơgar dê.

Ồng Rah Lan Vọng pà git, do ờ mìng là nùs nhơm kơ̆p kờñ bơh ală kơnòm dềt dê mờ geh bal cau dờng, tài gơtùi iang nùs ngan pơyoa kòn nàng lòt lơh broă, pơgồp bal tàm broă gàr kơl jăp tiah nhàr lơgar: “Hìu bơsram geh lơh niam bơnĕ ngan, kloh, niam, oh kòn bol añ geh lòt bơsram niam, tus gùng tus dà, tơnơ̆ do dờng drơng broă dà lơgar in. Bol añ chờ hờp ngan mờ pin dờn Đảng mờ Dà lơgar, tài neh drơng gàr, sền gròi ală oh kòn in, niam ngan ai rơnàng ală oh kòn tơnơ̆ do in”.

Ờ mìng tàm sàh Ia Krêl, tàm 7 sàh Ia Mơ, Ia Púch, Ia Pnôn, Ia Nan, Ia Dom, Ia Chia mờ Ia O, càr Gia Lai neh mŭt lơh Rơndăp broă lơh Hìu bơsram ơm sa bic tơn kấp dùl mờ kấp bàr mờ 212 ơdŭ, kờp jơh priă tă lơh 1 rơbô 516 tơmàn đong. Jăt broă lơh, ală hìu bơsram geh lơh ndrờm bal mờ tơl ală mpồl gơnoar bal mờ phan bơna, ai geh geh anih bơsram sră niam rơlao 7 rơbô nă kơnòm bơsram in, tàm hơ̆ uă ngan là oh kòn làng bol jơi bơtiàn ờ gal cau. Oh Rơ Châm Lan Thúy, bơsram ơdŭ 8D hìu bơsram kấp bàr Phan Bội Châu (sàh Ia Nan) tơlik nùs nhơm chờ hờp pà git: “Oh gŏ chờ hờp ngan tài tơnơ̆ do oh geh bơsram bàr ƀùi. Hìu bơsram geh tơl ală jơdŭ bơsram tàp, oh gơtùi nhơl chờ mờ tus bal tơrlòng lơh hoă họk, vật lý, gam geh sào ngai, ƀuơn rơlao ai mè bèp in ờ pal jun rò tai”.

Tŭ do, càr Gia Lai geh mờr 200 rơbô nă kơnòm bơsram jơi bơtiàn ờ gal cau gam bơsram tàm ală kấp bơsram, mìng là oh kòn làng bol kòn cau Jrai, Bơnhàr, Hrê… Ồng Phạm Văn Nam, Kwang lam bồ Sờh Bơto bơtê mờ Bơsram pà git, nàng tơnguh bơta niam broă bơto mờ bơsram tàm tiah làng bol jơi bơtiàn ờ gal cau mờ tiah nhàr lơgar, càr gam lơh bal broă lơh gơs phan bơna bơto bơtê mờ bơ̆t bơtàu gùng dà broă lơh di pal ai mpồl cau pơgru in, gàr niam di pal mờ bơta krơi is tàm tiah do dê. Bal mờ hơ̆, tus do, Sờh rơ̆p yal Mpồl duh broă Làng bol càr in ai geh gùng dà broă lơh nàng dong kờl kơnòm bơsram tàm tiah kal ke; mờ tơnguh broă đong kờl nàng cau pơgru iang nùs jŏ jòng bơto tàm tiah ngài in. Bal mờ ală gùng dà broă lơh, càr kung gam lơh Rơndăp broă tơnguh uă bơta niam hìu bơsram jơi bơtiàn ơm sa bic tơn mờ ơm ngai tơngai bơh nam 2025 tus 2030, nàng geh sùm khà kơnòm bơsram mờ ai geh uă bơta niam nàng bơsram sră gơwèt mờ kơnòm bơsram geh rài kis rơƀah, mờ pa lik klàs rơƀah in. “Do là gùng dà broă lơh kwơ màng ngan bơh Đảng mờ Dà lơgar dê tàm broă tơnguh uă bơta ngăc ngar làng bol, bơto, bơtơl cau lơh broă tàm tiah do in, tàm hơ̆ uă ngan là cau lơh broă ai tiah làng bol jơi bơtiàn ờ gal cau, tiah nhàr lơgar in. Bơh broă lơh do tơnguh bơta niam mpồl lơh broă cíñ trị tàm ƀòn lơgar, tơnguh broă dong kờl jơi bơtiàn, tơnguh mpồl tam klăc, gàr kơl jăp mờ lơngăp lơngai tiah nhàr lơgar”.

Ală hìu bơsram geh lơh niam tàm tiah làng bol jơi bơtiàn ờ gal cau mờ tiah nhàr lơgar pà gŏ broă drơng gàr bơto bơtê tiah kal ke bơh đảng mờ dà lơgar dê. Do là tiah kơl dìng kơl jăp nàng dong kờl kơnòm dềt jơi bơtiàn ờ gal cau in geh bơsram sră tơl, pơgồp bal tàm broă bơ̆t bơtàu tiah nhàr lơgar ngai sơlơ kơnhăp, bơtàu tơnguh kơ̆ kơl jăp tàm càr Gia Lai dê.