Tềng bơnàng hìu yau gam sơrlồng sơrlàng tơnơ̆ tŭ gơtìp dà tih cò tơrlah, bi Nguyễn Thế Kiên (ơm tàm thôn Chánh Hữu, sàh Ngô Mây, càr Gia Lai) ờ ru ngan bal mờ kwang bàng, cau ling Hìu bơsram Ling klàng (Ling mpồl 34) mut lơh bơnah jrong lòs, rcang tuh bê tông ai hìu pa in.

Mìu càl rơbŭt dờng sồ 13 lơh hìu bi kiên dê gơ pồ rơkàng hìu. Ờ hềt thàn lơh niam wơl, mìu dờng dà tih dà lìu tus tai cò pơr dô jơh tơn hìu bi dê. Geh Dà lơgar dong kờl 60 tơlak đong, geh mpồl ling dong kờl ngai lơh hìu, bi lơh nền càn tai 40 tơlak đong tai nàng tơl 100 tơlak đong lơh hìu ơm kơ̆ kơnhăp. Bi Nguyễn Thế Kiên pà gĭt, hìu ơm pa rơ̆p geh 30 thơk vuông bê tông kơnhăp ngan:“Cau ling jơh nùs ngan. Cau ling dong ùr bơklau añ lơh hìu ơm kơnhăp kơ̆, niam rlau mờ hìu ơm lài do. Tŭ do lơh hìu tuh jrong bê tông, tuh bê tông den pal kơ̆ kơnhăp rlau mờ lài do hìu kấp 4 dê. Tŭ do, añ blơi lòs lơh, dà kŏ dà liu den guh cờn hơđang, ờ pal tui àñ phan lòt tiah ndai tai”.

Kung tàm thôn Chánh Hữu, cau ling Hìu bơsram Ling klàng Ling mpồl 34 gam dong kờl hìu bơnhă bi Ngô Đình Vị lơh hìu. Hìu ơm tàm sơnah gùng dềt, ù lơyah den mpồl ling neh pơndiang ù tơnguh jơnhoa bơnàng hìu, tơnguh bơta pràn sơrlèt gan mờ dà tih dà lìu. Do rơ̆p là hìu ơm dờng niam, tài bơh bơdìh mờ bơnah priă 60 tơlak đong Dà lơgar dong kờl, bi gam ai jơh 120 tơlak đong priă tềm pềr nàng blơi phan bơt bơtàu, ai cau ling den dong uă ngan ngai lơh hìu. Là cau lơh hìu den tàng bi Vị pơgồp niam ngan tàm broă lơh hìu. Bi ngoh rngăc đơs:“Ală wa lơh broă tàm trồ mìu, trồ tơngai sền sơnđàc ngan. Trồ mìu, añ đơs là ală wa ơm rlô ih, mơya kung soh ào mìu lơh gam sơl. Phan sa dà hùc, ală wa ờ ngui bơta lơi ờ. Ală wa rê dong kờl hìu bơnhă, añ chờ hờp ngan. Hìu bơnhă añ kơnờm bơta lơi, cau ling lơh bơta hơ̆. Kờp dŭ, hìu bơnhă añ rơ̆p lơh jơh tàm 45 ngai".

Tàm “Broă lơh Quang Trung” dơ̆ do, Ling mpồl 34 geh jàu lơh 70 nơm hìu tàm tiah dà tih dà lìu bơh càr Gia Lai dê mờ 30 nơm hìu ơm tàm tiah dà tih dà lìu càr Dăk Lăk. Tơnơ̆ tŭ dờp jơnau sồr, Ling mpồl 34 neh hòi jà rlau 600 nă kwang bàng, cau ling bal mờ phan bơna măi mok mhar ngan lòt gùng tus ală tiah, jàu tơl mpồl ling in drơng broă ală tiah geh ngan, dùl nùs bal pơgồp niam mờ gơnoar atbồ ală tiah mờ cau tờm hìu nàng mhar geh broă rơndăp lơh mờ mut lơh mơ tơn.

Đại tá ồng Phạm Hồng Sơn, Phó Cíñ ủy Hìu bơsram Ling klàng Ling mpồl 34, dờp lơh kơnòl broă tàm sàh Ngô Mây, càr Gia Lai pà gĭt: jơh ală mpồl ling ndrờm geh hòi jà tơrgùm bal nàng gàr niam cồng nha mờ tŭ tơngai mut lơh. Mpồl ling ai jơnau kờñ lơh sir ală hìu ơm lài mờ ngai 20/1/2026, nàng làng bol in di tŭ wă rò sa tềp tàm hìu ơm pa ram mhŭ:“Broă mòn lơh ală tiah mờ hìu bơnhă kong kơnòl broă jơh lơm ai mpồl ling rơ̆p dong kờl lơh hìu mờ mpồl ling tui jun pơndiang phan bơna bơt bơtàu. Sa sào den mpồl ling rơ̆p gàr tơl di mờ jơnau kờñ bơh mpồl ling dê. Bol añ bơyai lơh gàr niam broă dong kờl tơrgùm bal dùl tiah mờ lam lòt tus ală tiah bơh ală mpồl tàm ală hìu làng bol nàng oh mi in sào piang, gàr niam pràn kơl dang să jan nàng lơh niam ngan broă lơh bơh he dê”.

Mờ ală hìu bơnhă pa lòt gan mìu càl rbŭt dờng dà tih dà lìu, ală hìu ơm kơnhăp kơ̆ gam rơ hời geh lơh ờ mìng là tiah ơm lơngăp lơngai pa lơm mờ gam tiah kơldìng nùs nhơm dong tơrmù bơnah lơi ƀà ală bơta roh rui tài bơh trồ tiah lơh aniai dê lời wơl. Tàm tơl kơlik hìu, tơl rơkàng hìu ndrờm geh ală dà kơl hề mờ nùs nhơm bơh ală Cau ling Wa Hồ dê lơm, dùl dơ̆ tai đơs nền nùs nhơm ling klàng làng bol kơ̆ wền mờ tàm bơta kal ke, ờ geh dồ nă cau lơi gơtìp lời wơl bơh ngkời.