Mho ngai 3/12, tàm Hìu lơh broă Đảng Dà lơgar, Tổng Ƀí thư ồng Tô Lâm đơng lam lơh broă mờ ală Ƀộ, gah broă nàng kờñ cribơyai broă lơh sền gàr, dong kờl cau kuĕt kơlte. Lơgar he dê tŭ do geh pơgăp 7,2% khà kờp làng bol là cau kuĕt kơlte, ndrờm mờ 8 tơlak nă cau, tàm hơ̆ rlau 1 tơlak nă cau kuĕt kơlte kơn jơ̆ mờ kơn jơ̆ ngan, bal mờ pơgăp 600 rơbô nă kơnòm dềt gơwèt uă khà kuĕt kơlte krơi is.

Đơs pơndŭt dơ̆ pơrjum, Tổng Ƀí thư ồng Tô Lâm đơs sùm broă sền gàr ai cau kuĕt kơlte in ờ mìng cèng bơta kwơ niam nùs nhơm dong kờl kòn bơnus dê lơm mờ gam là đo was bơta niam jak, là jơnau sồr bơh bơtàu tơnguh kơnhăp jŏ mờ mŭt gơ rờm bal ală lơgar. Ală nam do, uă gùng dà broă lơh, broă lơh dong kờl, lơh pràn wơl să jan, bơto bơtê mut gơ rờm bal, lơh geh broă lơh sa neh lơh jat geh cồng nha. Tổng Ƀí thư sồr ală Ƀộ, gah broă mờ ală tiah pơn jat tai lơh sir broă lơh nàng kờñ tơnguh uă bơta tus bal mờ drơng broă lơh sơnơm, lơh pràn wơl să jan mờ ală broă lơh gàr tơl niam rài kis mpồl bơtiàn nàng kờñ gàr niam gơnoar kwơ di pal ai cau kuĕt kơlte in.