Wèt tus 2 sàh kong gơrềng kơn jơ̆ kơn jŭt ngan tàm dơ̆ dà tih dà lìu pa do tàm tiah đah mat tơngai lik càr Dăk Lăk (càr Phú Yên yau dê), mpồl kwang bàng, cau lơh broă sùm tiah Tây Nguyên (VOV Tây Nguyên) bal mờ bàr pe nă cau geh nùs nhơm niam neh tă pơgồp, jàu pà phe ai làng bol in. 200 bơnah phan pà, tơl bơnah phan 10 kĭ phe, geh pơyua tus 200 hìu bơnhă tàm 2 sàh Hoà Thịnh mờ Đông Hoà- ală hìu bơnhă kong hoàc huơr kơn jơ̆ kơn jŭt ngan.

Ồng Lê Hải Sơn, Kwang Lam bồ VOV Tây Nguyên pà gĭt, tơnơ̆ uă ngai ơm bal tàm ù tiah do nàng yal tơngĭt jơnau dà kŏ dà lìu, sền gŏ bơta hoàc huơr dờng ngan bơh làng bol dê, kwang bàng- viên cứk tàm anih lơh broă neh tă pơgồp bal, hòi jà phe nàng dong kờl. Ală ngai do, kơnờm bơta pràn dong kờl bơh làng bol gùt lơgar dê, rài kis làng bol tàm tiah dà kŏ dà lìu neh bè ờs rlau, ờ gam geh bơta ờ tơl jơgloh tai. Bulah bè hơ̆, tơnơ̆ uă ngai lơh ngan sa mờ ƀung mi, dà hùc tàm khàr, cau lơi kung kơ̆p kờñ geh tai dơ̆ sa piang ram ndul. Broă jàu pà phe dơ̆ do là nùs nhơm tam pà bal, tàm pơrdờn bơhiàn niam bơnĕ “Nha ngan glòm nha sèt” bơh jơi bơtiàn Việt Nam dê.