3 rùp hìu geh Cíñ phủ ring bal bơt lơh ai làng bol tiah dà tih dà lìu in ndrờm lơh jat jơnau sồr “3 kră”: bơnàng hìu kră- kơlik hìu kră- rơkàng hìu kră, dong kong jai mờ càl, mìu càl rơbŭt dờng mờ hiòng dà tih dà lìu pràn. Broă lơh tờm là tơnguh jơnhoa bơnàng hìu halà ai lơh tơnguh cờn hơđang halà cờn 2 hìu dê kơ̆ kơnhăp nàng lơh geh “bơta tờm lơngăp lơngai” sơr lèt gan khà dà gơguh tih kah yau dê.

Tàm ală hìu do, geh 2 rùp hìu 2 cờn: cờn 1 digơlan lời gời halà lơh nggùl kơ̆ kơnhăp nàng dà tih in lòt gan, cờn hơđang là tiah ơm crŭ mờ prap gàr jơtài phan bơna. Hìu 1 cờn geh cờn hơđang geh priă tă lơh ờ uă rlau mơya kung gam gàr tơl tiah pleh dà tih dà lìu kơ̆ kơnhăp.

Ồng Cao Đình Huy, Kwang lam bồ Sờh Bơt bơtàu càr Dăk Lăk pà gĭt, mòn lơh ală rùp hìu do ờ mìng kờp tus bơta kơnhăp kơ̆ lơm mờ gam gàr tơl bơta lơngăp lơngai tàm dơ̆ dà tih dà lìu gơguh tih kah yau dê: “Broă lơh lơh bơnàng hìu jơnhoa pleh dà tih dà lìu, bol añ kờp jơhoa rlau mờ khà dà kah yau bơh 0,2 tus 0,5 thơk jat Jơnau lơh nền sồ 48 bơh Thủ tướng dê. Tơl broă lơh ndrờm geh bơta ơnàng uă ngan rlau jơh 44 thơk, tàm hơ̆ bơnàng hìu pleh dà tih dà lìu là 12 thơk".

Ală rùp hìu ndrờm pơgồp bal đah bơta chài măi mok pa tŭ do dê mờ bơta mòn lơh mờng kwèng bơh tiah ƀòn lơgar tiah đah Jum tàm gùl lơgar dê, gàr niam bơta niam mờ rài kis pah ngai ƀuơn ngan in. Bă ù mut lơh tam gơl bơh 36 tus 54 thơk vuông, dong ală hìu bơnhă làng bol in sac rơwah jat ală bơta ù tiah, jơnau kờñ hìu bơnhă dê. Ồng Trần Văn Khánh, ơm tàm thôn Phú Hữu, sàh Hoà Thịnh, càr Dăk Lăk, geh hìu gơtìp tơrlah jơh lơm tàm dơ̆ mìu dờng dà tih dà lìu pa do, geh Mpồl ling tiah 5 dong kờl mòn lơh wơl, ồng rơwah rùp hìu 1, mờ cờn hìu lơh tàm tiah pleh dà tih dà lìu.

Ồng Khánh pà gĭt: “Bơh dơ̆ mìu dờng dà tih dà lìu do, añ ai geh bơta mờng chài, rơwah lơh hìu 1 mê geh bơnàng hìu kong jai mờ dà tih dà lìu, kong jai mờ mìu càl rơbŭt dờng. Lài do, dà tih dà lìu tus ờ gĭt ơm crŭ tềng lơi, tŭ do geh mpồl ling dong kờl lơh hìu ơm pa, añ iang nùs uă rlau”.

Thiếu tướng ồng Trần Thanh Hải, Phó Tư lệñ Ling tiah 5, pà gĭt mpồl ling geh Cíñ phủ mờ Ƀộ Ling klàng jàu kơnòl broă pơgồp bal mờ ală ling ƀiñ củng, ală tiah 3 càr Dăk Lăk- Gia Lai- Khánh Hoà lơh rlau 400 nơm hìu ơm ai làng bol tiah dà tih dà lìu in: “Do là kơnòl broă tam lơh tàm rài bình. Ală mpồl ling rơ̆p hòi jà tơrgùm jơh rơndeh rơndồ măi mok, bơyai lơh lam lơh jak chài, gàr niam tŭ tơngai mut lơh mờ lơngăp lơngai ngan. Tơl nơm hìu là dùl tiah kơl dìng dong làng bol in bè ờs wơl rài kis”.

Tàm Dăk Lăk, tiah kong hoàc huơr kơn jơ̆ kơn jŭt ngan rlau jơh mờ mờr 700 nơm hìu tơrlah, 1 rơbô 400 nơm hìu ơtìp ờ diơng kơn jơ̆ mờ rlau 106 rơbô nơm hìu gơtìp ngơr bam tàm dà. Ồng Tạ Anh Tuấn, Củ tịc Anih duh broă Làng bol càr Dăk Lăk pà gĭt, càr hòi jà tă pơgồp bal uă priă, jơh nùs lơh ngan lơh sir broă lơh bơt hìu pa lài mờ ngai 31/12/2025: "Bol añ kung rơ̆p hòi jà tă pơgồp bal priă jền bơh Dà lơgar, ală tiah, priă jền bơh ală cau geh nùs nhơm niam mờ bơh làng bol dê nàng lơh jat broă lơh. Bơdìh mờ broă lơh hìu ai làng bol in bol añ kung lơh pơgăp 300 nơm hìu pơrjum mpồl bơtiàn nàng pleh dà tih dà lìu nàng gơtùi dong làng bol pleh mờ mìu dờng dà tih dà lìu”.

Lài hơ̆, Thủ tướng Cíñ phủ ồng Phạm Minh Chính neh tus tơn tàm tiah dà tih dà lìu đah mat tơngai lik càr Dăk Lăk dê, lơh broă mờ đơng lam bồ ală càr Tây Nguyên mờ tiah đah Jum tàm gùl lơgar mờ sồr pờ broă lơh “Quang Trung sơr băc mhar” nàng lơh wơl hìu ai ală hìu bơnhă roh hìu in, gàr niam làng bol in geh tiah ơm pa lài mờ tơngai sa tềp bơhiàn Dà lơgar Bính Ngọ nam 2026.

Thủ tướng đơs sùm jơnau sồr rơndăp tăp sèng wơl hìu ơm tàm tiah dà tih dà lìu in jat jơnau sồr “3 kră”, mơkung mòn lơh rcang lài tơl dờng tềng đăp ală jơnau digơlan gơlik geh bơh trồ tiah lơh aniai ờ niam rlau dê. Ƀộ Bơt bơtàu geh jàu ring bal rùp mòn lơh hìu, ngui ală jrong bơta bê tông halà lòs lơh gơlik dồ ròt nàng tơrmù tŭ tơngai mut lơh. Nàng chồl mhar tŭ tơngai mut lơh, dong làng bol di tŭ geh hìu ơm lài mờ tơngai sa tềp bơhiàn dà lơgar dê, Thủ tướng sồr Ƀộ Broă lơh sa suơn sre mờ Tiah ơm kis bơto pơlam ală tiah in bơsong broă ù tiah gơwèt mờ ală hìu bơnhă ờ gam geh tiah ơm. Ală Ƀộ Ling klàng, Kwang àng, mpồl ơruh pơnu mờ jơh bal ală anih lơh broă cíñ trị pal mut lơh bal.

Thủ tướng kung sồr hòi jà tă pơgồp bal uă ngan rlau jơh priă jền ai broă lơh hìu pa, lơh niam wơl hìu ơm nàng lơh geh tŭ tơngai mhar ngan rlau dilah gơtùi:“Hòi jà tă pơgồp bơta pràn bơh ală tiah, Dà lơgar, ală cau geh nùs nhơm niam mờ bơh să tờm ală hìu bơnhă dê. Cau lơi geh bơta lơi dong kờl bơta hơ̆, cau lơi dong ngai lơh broă den tă pơgồp bal ngai lơh broă, cau lơi geh phan bơna den dong kờl mờ phan bơna, cau lơi geh dồ ết dong kờl dồ ết, cau lơh geh uă den dong kờl uă, ƀuơn tiah lơi den dong kờl tềng hơ̆, nùs nhơm tam klăc dờng jơi bơtiàn dê tàm broă hòi jà tă pơgồp bal là pal lơh jat niam”.

Bơh ală sră wăc sềr rùp mờ đơng lam kràñ cê jơh nùs, tus tŭ do ală bơnàng hìu sơn rờp neh geh mut lơh. Rlau 1 rơbô 500 nơm hìu ơm, kờp jơh priă tă lơh pơgăp 255 tơmàn đong, rơ̆p geh lơh tàm càr Dăk Lăk, Khánh Hoà, Gia Lai... gơ gơs tiah kơldìng kơnhăp kơ̆ nàng làng bol tiah đah jum tàm gùl lơgar in sơr lèt gan trồ tiah lơh aniai, lơngăp lơngai tiah ơm kis iang nùs lơh broă sa mờ bơtàu tơnguh kơnhăp kơ̆ rlau tàm rài tơnơ̆ do.