Ngai 30/07, Mpồl Lơh kơnòl broă sùm Tỉñ ủy càr Gia lai bơyai lơh Pơrjum yal cồng nha Pơrjum dơ̆ 12 Mpồl Duh broă Đảng Dà lơgar khoă 13 tus mpồl Kwang bàng tờm ngan gùt càr dê.

Tàm pơrjum, ồng Hồ Quốc Dũng, Ƀí thư Tỉñ ủy càr Gia Lai pà gĭt, tơnơ̆ tŭ lơh jat broă rơndăp tăp sèng wơl mpồl lơh broă sră pơ àr gơnoar atbồ mờ tam gơl broă lơh gơnoar atbồ 2 kấp, tus tŭ do, mpồl lơh broă gơnoar atbồ tàm càr Gia Lai neh lơh broă bè ờs. Càr neh jàu ai kấp sàh in 1 rơbô 065 broă sơn rờp. Làng bol tŭ geh jơnau kờñ bơsong sră pơ àr gơnoar atbồ mìng tus tàm sàh lơm, uă ngan lơh tàm internet, lơh geh bơta ƀuơn ngan mờ tềm pềr tŭ tơngai. Tàm tơngai tus, càr rơ̆p pơn jat tai tam pà kấp tam pà gơnoar pràn rlau tai ai kấp sàh in. Mơya, tŭ do kung gam bàr pe bơta ờ niam kờñ pal mhar ngan bơsong, ngan là bơta gĭt wă, bơta pràn jak bơh dùl mpồl kwang bàng sàh dê. Tŭ do, mpồl kwang bàng kấp sàh tàm Gia Lai uă ngan geh 3 mpồl: Kwang bàng bơh càr ntrờn rê; kwang bàng bơh kấp kơnhoàl mù mờ kwang bàng tàm dồ bă tiah dê. Bàr pe nă kwang bàng ờ hềt geh bơta mờng chài rơ̆ ru geh ngan. Càr gam bơyai lơh pơlam tàp dong kwang bàng sàh in mhar ngan gơ dờp mờ broă lơh pa.