Bơh ngai 16/11 tus tŭ do, Gùng Dà lơgar 27C cih dờp geh 52 tiah tơrlah, 35 tiah gơ kòl gùng lòt jơh lơm. Càr Khánh Hoà neh sồr pal til mpồng koèl kơh nàng gàr niam bơta lơngăp lơngai mờ lam lơh sơrbac mhar. Ờ mìng Gùng Dà lơgar 27C lơm, mìu dờng dà tih dà lìu lơh ờ gơtùi lòt rê ală gùng lòt tàm uă tiah bơh càr Khánh Hoà dê, is ồn là gùng ù gờl mờ gùng rơndeh ồs. Kờp jơh khà hoàc huơr bè phan bơna bơt bơtàu gùng lòt rê pơgăp 1 rơbô 970 tơmàn đong.

Tơnơ̆ tŭ dà hoài soăt, ală tiah neh hòi jà tơrgùm bal uă ngan rlau jơh rơndeh rơndồ măi mok, mpồl cau nàng bơsong, tơrgùm bơsong ală tiah tơrlah ù tàm gùng càr, gùng lòt tàm ală sàh. Tus tŭ do 28 tàm 29 gơl gùng gơtìp tơrlah neh geh ai rơndeh lòt rê. Mìng is Gùng Dà lơgar 27C pal bơsong bơta kal ke tài bơh ù tiah kal ke mờ mat gùng sùm gơlik geh bơta tơrlah, gơ hoài ù.