Đơs tàm dơ̆ đơng lam pơrjum, Tổng Ƀí thư ồng Tô Lâm dờp ală jơnau đơs pơgồp bal jơh nùs, di mờ mùl màl bơh ală cau ala măt dê, neh đơs niam ală cồng nha neh lơh geh mờ dan geh uă gùng dà broă lơh kwơ màng nàng broă rơcang tam dră mờ sa kuề sa koà hoàc huơr ờ niam bơh Đảng, Dà lơgar dê ngai sơlơ lơh gơs.

Tơnơ̆ mờ tŭ ai tơngŏ loh làng ờ uă broă gam ờ pràn, Tổng Ƀí thư sồr, tơngai tus ờ gơtùi sền ờ sơ̆p, di nùs nhơm ală cồng nha neh lơh geh mờ pal lơh pràn, lơh ngan, lơh sùm, ờ geh tiah kơrian ờ geh broă lơh bơdìh mờ 3 jơnau sồr bal mờ 5 bơta tờm. Hơ̆ là pal ai bơta kwơ dà lơgar, jơi bơtiàn, bơta kwơ bơh làng bol rơlao jơh, pơgồp bal tàm broă bơ̆t bơtàu Đảng mờ mpồl lơh broă cíñ trị kloh niam, pràn kơl dang, geh cồng nha, geh pràn mùl màl niam bơnĕ, drơng broă làng bol mờ lơh pràn broă bơtàu tơnguh dà lơgar. Dơ̆ bàr là pal lơh ngan, lơh pràn, lơh sùm, lơh glài nền nòn, di cau, ờ geh tiah kơrian, ờ geh broă bơdìh. Jơnau sồr dơ̆ pe là pal tam gơl pràn tus broă rơcang lài, bơta tờm là ngui gơnoar, bơta pràn tam dră ală mpồl Đảng, bơh broă jăt sền làng bol dê, ờ lời tiah dềt, tơrgùm gơs tìs dờng, ờ gơtùi gơtìp tai ală tìs lài.