Tàm hơ̆, Adat bơcri priă (tam gơl) mờ uă bơta tam gơl kuơmàng, tơrmù ƀà sră nggal; tơrmù git nđờ jơt gah broă kă bro geh bơta pal jat; ai lài pràn ngan măi mok pa in, tam gơl pa bơceh lơh, lơh sa tơlir; lơh gơlik bơta ƀuơn ai cau bơcri priă lơgar ndai in. Quôk hội kung ring bal Jơnau lơh nền tàm pơrjum lam lơh tơrlòng lài bàr pe gùng dà, broă lơh krơi is nàng lam lơh ală rơndap broă lơh dờng, kuơmàng tàm ù tiah càr lơgar Hà Nội; Jơnau lơh nền tàm pơrjum tam gơl, bơtơl bàr pe gùng dà broă lơh krơi is bơtàu tơnguh ƀòn dờng Hồ Chí Minh; bàr pe gùng dà broă lơh krơi is bơtàu tơnguh ƀòn dờng Đà Nẵng. Bè bàr pe gùng dà, broă lơh tă bơsong kal ke, bơta gơ kòl tàm broă lam lơh jat Adat Ù tiah, Quôk hội ring bal Jơnau lơh nền tàm pơrjum bơ tơl ală bơta mờ dà lơgar ai wơl ù tài jơnau kờñ drơng sền gàr dà lơgar, lơngap lơngai mờ bơtàu tơnguh lơh sa mpồl bơtiàn, pơgồp bal mờ ring bal broă rơndap lơh tơm wơl, dong kờl, rơndap ƀòn ơm kis pa, ờ kờp bàr pe broă jal mhar.

Tàm gah lơh sơnơm, jat Jơnau lơh nền tàm pơrjum bơh Quôk hội dê, bơh ngai 01/01/2026, cau ndrờm bè cau rƀah mờ cau bơh 75 sơnam rlau hơđang geh tơm 100% priă tă kham sơm kòp; mpồl cau ờ sô, cau geh priă jền lơh geh dồ êt geh tơnguh khà geh dong kờl kham sơm kòp ờ sa priă. Bơh nam 2030 rơp lam lơh broă rơndap lơh ờ sa priă piam sơm kòp tàm hìu sơnơm. Quôk hội kung neh ring bal Jơnau lơh nền tàm pơrjum ring bal gùng dà bơcri priă Broă lơh jơnau kờñ dà lơgar bè ƀòn lơgar pa, tơrmù rƀah kơ̆ kơljap mờ bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ tiah kơh bơnơm tơngai bơh nam 2026 tus nam 2035, bal mờ bàr pe adat boh lam, jơnau lơh nền tàm pơrjum kuơmàng ndai.