Ngai òr (07/08), Ƀộ Bơto bơtê mờ Bơsram bơyai lơh pơrjum pờ tơlik tàm internet lơh broă Broă pơrlòng “Gùt lơgar pơrlòng tam gơl pa bơceh lơh mờ tam gơl sồ” mờ Broă “Bơto sồ”. Pơrjum geh tơrbŏ bal tus di pơgăp 600 anih pờ bơh ală Sờh Bơto bơtê mờ Bơsram; ală hìu bơdsram đại họk mờ Hìu bơto broă lơh tàm gùt lơgar.

Đơs tàm dơ̆ pơlam pơrlòng, Thứ trưởng Ƀộ Bơto bơtê mờ Bơsram ồng Nguyễn Văn Phúc đơs nền, tam gơl sồ tàm gah bơto bơtê mờ bơsram pờ geh ală dơ̆ niam ờ hềt tŭ lơi geh nàng tơnguh uă bơta niam broă bơto mờ bơsram, tam gơl gùng dà broă bơto bơtê, lơh geh să tờm is jơh broă bơsram, pờ ơnàng dơ̆ niam geh tìp bơta ngăc ngar ai ală làng bol in. Nàng broă lơh geh cồng nha uă ngan, gùt gah do rơ̆p tơrgùm lơh niam 8 kơnòl broă tờm, tàm hơ̆ tơnguh broă bơto nàng git sồ mờ ală broă lơh kơlôi sơnơng bơta chài ai kơnòm bơsram, cau bơsram dờng in. Tàm pơrjum, ala măt ală mpồl hìu bơsram, Sờh Bơto bơtê mờ Bơsram kung tam pà bal bè ală broă lơh mờng chài lơh jăt ală tơngu me, broă lơh bè tam gơl sồ mờ “Bơto sồ” mờ ai geh gùng dà broă lơh nàng lơh jăt bàr broă pơrlòng ngai sơolơ mùl màl mờ broă bơto bơtê tàm ală hìu bơsram dê.