Là cau kòn bơh kòn cau Rơđê dê, bi H Pha Ayun, đảng viên kơnòm să, Ƀí thư Đoàn sàh Cuôr Đăng, kơnhoàl Cư Mgar, càr Dăk Lăk kah tơl săp ntas dròng cing tàm tơl kàl lơh yàng lơh chờ. Pơñiờ să mờ niam chài ờs mờng bơh yau, kơlôi sơnơng sùm tŭ cing mồng gơtìp lời hŭi rơhời, bi jơh nùs lơh ngan “hòi wơl săp ntas cing” bơh broă lơh ngan ngồn.

Mờ gơnoar broă là Ƀí thư Đoàn sàh, bi sồr pờ ơdŭ bơto wơl cing mồng ai đoàn viên, ơruh pơnu ƀòn lơgar in; bal mờ ală bơyô tàm ci đoàn, tus tơn tàm tơl hìu jà ală cau chài dờng sơnam bơto wơl ală bol kơnòm in. Bơh ơdŭ bơsram dềt bơh chờm, tus tŭ do, sàh Cuôr Đăng neh lơh geh bàr mpồl cing mồng mờ dùl mpồl jơnau đơs pơnđik.

Bi H Pha Ayun yal, tàm ală ơdŭ bơsram cing, ờ mìng geh broă bơto wơl bơta chài, broă dròng lơm mờ gam lời wơl nùs nhơm cing mồng ai cau kơnòm in. Nùs nhơm hơ̆ là bơta tàm tơkuĕ bal mpồl bơtiàn, nùs gĭt ưn ngài mò pàng mờ gĭt wă prăp gàr bơhiàn niam chài krơi is jơi bơtiàn dê: “Ală bơyô jơh nùs ngan tus bal. Ală bơyô tơnggŏ geh bơta jak he dê, bơh hơ̆ geh bơta gĭt wă geh kơnòl mờ nùs nhơm pơniờ să, bơta yờ tơngguh is jơi bơtiàn. Bơh ală mpồl cing mồng mờ jơnau đơs pơnđik sàh dê, ală bơyô geh lòt tìp măt lơh kwèng, tus bal ală dơ̆ pơrlòng kâp sàh, kơnhoàl, càr. Bơh ală srơh hơ̆, ală bơyô neh sền gàr mờ lơh gơrề uă bơhiàn niam chài ờs mờng bơh yau jơi bơtiàn he dê”.

Ai tàm Hìu bơsram Kâp pe Buôn Hồ, ƀòn drà dờng Buôn Hồ, rùp să ùr pơgru Phạm Thị Thu Thảo, Ƀí thư Đoàn hìu bơsram, đảng viên kơnòm să pơnrơ ngan bơh gah bơto bơtê càr dê, neh gơlơh mờng kwèng ngan mờ kơnòm bơsram bal mờ cau lơh broă bal. Mờ gơnoar broă cau lam bồ tàm ală broă lơh Đoàn- Mpồl bơh hìu bơsram dê, ùr pơgru neh dan ală dơ̆ pơrlòng video tơngkah kir sơnrai ală ngai chờ dờng; lam lơh ală dơ̆ rê hờ tiah pôs đồng kăc màng, còp tiah tềl lời wơl kah yau, tiah lòt nhơl tiơng pơnrơ ƀòn lơgar; lơh fanpage Đoàn hìu bơsram sùm pơnđàng krơh cau niam, broă niam lơh gơrề uă nùs nhơm jơh nùs tus jơh gùt hìu bơsram. Bơh ală broă lơh do, uă kơnòm bơsram ờ mìng bơsram jak lơm mờ gam gĭt bơta niam kis dipal nàng gơgơs cau làng bol lơh krơh niam. Ùr pơgru Phạm Thị Thu Thảo, pà gĭt: “Bơh ală dơ̆ gờm chờ bồng bi, tàp lơh mờ bơsram tàp, hìu bơsram ai tơl bơta ai ală oh in tus bal tàm mpồl, ală mpồl bơh hơ̆ bơtàu tơngguh pràn jak lơh broă, bơtơl tai bơta niam gơboh lơgar. Nam bơsram 2024- 2025, neh geh 2 nă kơnòm bơsram geh lòt bơsram ơdŭ wă wờng bè Đảng”.

Là đảng viên kơnòm să gơ wèt Ci đoàn Sờh Sền gàr adăt boh lam càr Dăk Lăk, bi Hoàng Thị Diễm Xuân, Ƀí thư Ci đoàn ờ mìng là kwang bàng jơh nùs jơh tồr tàm broă lơh broă mờng lơh lơm mờ gam là cau lơh gơlik jơnau gơdan jơnau gơkờñ bơh ală dơ̆ lòt “rơsìh gar sơntìl kơrnoăt boh lam” tus tiah sar tiah ngài.

Ờ ngòt gùng ngài, bi mờ cau dồ mpồl bal cèng jăt bal sră kơrnoăt boh lam, sră pang, pơgồp bal mờ mpồl cau ƀòn lơgar bơyai lơh boh bơr, bơto pơlam lơh sră pơ àr gơnoar ătbồ dùl bă rềp mềl, ƀươn wă. Bi kung là cau bơh sơnrờp lam lơh broă lơh tơrlòng lài “Ơruh pơnu lơh broă dong kờl is dong kờl làng bol lơh jăt drơng broă dà lơgar pờ tơn tàm internet” tàm Anih tờm Drơng broă lơh sră pơ àr gơnoar ătbồ dà lơgar càr dê. Broă lơh tơrlòng lài neh dong mờr 15 rbô dơ̆ làng bol lơh sir sră pơ àr rài kis sền gàr adăt boh lam tàm nam do òr, pơgồp bơnah uă ngan tàm lơh mờ măy mŏk jơh sră pơ àr gơnoar ătbồ, bơ̆t bơtàu gơnoar ătbồ rềp làng bol, tài làng bol.

Mờ ală tă pơgồp pơnrơ ngan, bi Hoàng Thị Diễm Xuân geh Tỉñ đoàn càr Dăk Lăk jờng rơ là đảng viên kơnòm să pơnrơ ngan nam 2025. Mơya gơ wèt mờ bi, bơta chờ hờp dờng ngan rlau jơh hơ̆ ngan là sùm ơn pơdơng să jan tài mpồl bơtiàn, tài jơnau kờñ bơ̆t bơtàu Dà lơgar gơnoar ătbồ adăt boh lam bơh ală bơta dềt rơhền ƀươn soh nganr lau jơh tiah ƀòn lơgar: “Bơh broă lơh broă mờng lơh mờ broă lơh mpồl cau, bol hi ai kơrnoăt boh lam tus rềp mờ làng bol, dong tơngguh uă bơta gĭt wă, wă wờng lơh jăt kơrnoăt boh lam, gơgơs bơta mờng kwèng kis mờ lơh broă jăt sơnoa boh lam, kơrnoăt boh lam”.

Gơtùi gŏ, bulah lơh broă tàm ală gơnoar broă krơi is mơya bơh bơta pràn kơnòm să, nùs nhơm jơh nùs jơh tồr mờ nùs nhơm lơh lài, ală đảng viên kơnòm să tàm Dăk Lăk gam ngai pah ngai pơgồp bơnah lơh gơrề uă bơta pin dờn, lơh geh wơl bơta kơ̆p kờñ ngan tă pơgồp dà kơlhề mờb cih tai gùng lòt bè rơnàng kơnòm să bơ̆t bơtàu ƀòn tờm pas niam, jak chài.