Ùr lơh ƀău mờ ală jơnau tàm nùs tàm sap ntas cing mồng
Thứ bảy, 06:00, 21/06/2025 Cau mblàng K’Duẩn/ Cau cih H’Xíu (VOV Tây Nguyên) Cau mblàng K’Duẩn/ Cau cih H’Xíu (VOV Tây Nguyên)
VOV4.K'Ho - Mờ bơta jơh nùs bal mờ bơta kờñ gơboh mờ broă lơh, uă cau lơh ƀău kơnòm să tàm càr Dăk Lăk gam mblàng wơl ală jơnau pơyua niam chài niam ngan, lơh gơlik bơta kờñ gơboh mờ bơta pơn yờ să bè niam chài kòn cau, mờ kung yal tơnggit ală bơta niam chài bơh yau bơh mpồl bơtiàn ală kòn cau Tây Nguyên dê tus mờ làng bol.

Ai geh 2 khà jờng sră ƀău càr Dăk Lăk mờ dùl khà jờng sră ƀău Tây Nguyên tàm nhai 6, lài hơ̆ là 4 khà jờng bè bơt bơtàu Đảng mờ bơsram, lơh jat Wa Hồ geh jàu tàm bồ nam, bi H’Kim Phúc Êban, ùr cih ƀău kơnòm să kòn cau Rơđê gam lơh broă tàm Ƀău Dăk Lăk pơn jat tai lời wơl tềl niam ngan tàm gah lơh ƀău mờ ală jơnau cih bè niam chài.

H Kim Phúc yal, tơngume bè niam chài, mpồl bơtiàn mờ bơhiàn bơh yau làng bol tiah jơi bơtiàn dồ êt nă cau sùm lơh bi kờñ ngan bơh ală ngai sơn đờm mut tàm broă lơh ƀău. Rlau 12 nam lơh ƀău, bơta ƀuơn bè dà đơs neh dong bi cih ală tơngume ƀuơn rlau, bơh hơ̆ geh ală jơnau cih mờ bơta sền sơ wì pa ngan, dong làng bol đơs bơta kơlôi sơnơng he dê tàm broă sền gàr mờ prap gàr niam chài: “Là dùl nă cau cih ƀău jơi bơtiàn dồ êt nă cau den añ kung sùm lòt tus ală ƀòn. Git bè bơhiàn niam chài khi dê den añ kung ƀuơn lùp, ƀuơn tơm boh bơr rlau, bơh hơ̆ làng bol kung ờ bàl sìl tŭ đơs bè bơta kơp kờñ kung bè niam chài khi dê. Bơh ală jơnau cih den añ kung kờñ tơnguh jơnau git wă rlau tai ai làng bol in tàm broă prap gàr niam chài, bơta niam krơi is kòn cau he dê, đòm krơh ală cau geh pơn rơ jak tàm broă lơh sa, lơh broă niam tàm mpồl bơtiàn, pơgồp bal bơta pràn bơt bơtàu rài kis ƀòn lơgar ngai sơlơ bơtàu tơnguh rlau”.

Bal mờ H Kim Phúc, tàm ƀău Dăk Lăk, bi Nguyễn Hương Quỳnh kung là dùl nă cau cih ƀău mờng kwèng ngan mờ ală tơngume bè niam chài. Rlau 8 nam do, bi neh sền sơ wì, lơh uă jơnau đơs niam chài ală kòn cau mờ ai geh uă khà jờng sră ƀău. Tŭ do, bi gam drơng lơh 2 jơnau đơs bè niam chài là Rùp să rài kis mờ Tàm pơn jat tai rài kis Tây Nguyên, pờ tơlik 1 nhai 1 sồ. Bơta ƀuơn tài gơtùi sền sơ wì is, sền jơnau cih he dê tềng đap măi quay, ală jơnau cih bi dê sùm geh bơta tam gơl pa, lơh pa wơl. Jat bi Quỳnh đơs, bơh bơta li la tàm niam chài 49 jơi bơtiàn ơm kis tàm Dăk Lăk dê neh lơh gơlik bơta gơ kờñ pràn ngan, sơlơ jòi git den bi sơlơ gŏ geh ală tơngume niam ngan: “Tŭ rê cih tàm ƀòn, mut tàm rài kis mùl màl làng bol ală kòn cau dê, añ geh uă ngan bơta sền git niam, mờ ưn ngài he neh rơ wah di broă. Tŭ cih bè ală tơngume bè hơ̆ den neh gơ sồr he uă rlau mờ gŏ niam chài niam ngan, pal pơn jat tai yal tơnggit, pal mblàng yal nàng ală rơnàng lòt lài rơp pơn jat tai mblàng ai, bơto bơtê ai rơnàng tơnơ̆ in sền gàr mờ đòm jat. Gam niam chài là gam dà lơgar, gam tơngu rơyas”.

Sền gŏ bơh mùl màl kung là broă mờ bi Nguyễn Thảo, cau cih ƀău Ƀău Tiền Phong, Cơldŭ lơh broă ala mat tàm Tây Nguyên, gàr bơta kơlôi sơnơng ai tơl jơnau cih bè niam chài in. Bi yal, mờr 10 nam lơh ƀău, bi ờ gơtùi kờp jơh ală dơ̆ đì rơndeh măi, lòt git nđờ jơt, nđờ rhiang kơi sồ rê tus ală thôn, ƀòn tiah sar lơgar ngài bơh càr Dăk Lăk mờ Dăk Nông dê nàng tìp mat làng bol, cau chài. Tơl dơ̆ lòt dong bi geh dùl bơta kơlôi sơnơng tềng đap ù tiah brê bơnơm mờ bơta jơh nùs bơh ală cau lơbơn niam dê. Khi gam prap gàr wơl ală bơta kuơ bơh yau tàm rài kis pa, nàng lơh gơs dùl mpồl bơtiàn mờ uă bơta niam chài krơi is: “Tơngume lơi den he kung pal rê tus ƀòn lơgar den hơ̆ sồng geh jơnau yal tơnggit bè nhơm tă rài kis. Mơya gơ wèt mờ niam chài – hòi là bơta is ồn, mìng geh ală cau kờñ ngan ngồn den hơ̆ sồng gơtùi kơ̆ dơn lòt jòi, git gŏ bơh jơnau yal, mat sền halà bơh tàm nùs bơh tơl nă cau geh lùp dê, tơl jơnau yal dê. Pal ngan ngồn kờñ gơboh den tŭ hơ̆ hơ̆ sồng gơtùi git ală cau mờ khi gam prap gàr wơl niam chài, hơ̆ sồng bơh hơ̆ gơtùi mblàng wơl tus ală cau ndai in”.

Ờ mìng yal jơnau tơnggit, ală cau cih ƀău cih bè niam chài gam pơgồp bơnah bơt bơtàu mờ bơtàu tơnguh niam chài tàm mpồl bơtiàn. Tàm Dăk Lăk, tiah bơ tòm tơrgùm niam chài bơh 49 jơi bơtiàn oh mi dê, ală cau cih ƀău kơnòm să gam sơlơ lơh niam rlau tai pang rùp niam chài Tây Nguyên dê. Mờ bơta kờñ gơboh bal mờ bồ tơngoh lơh broă he dê, ală ùr cih bău gam lơh gơ rề uă bơta kuơ niam ngan, pơgồp bơnah lơh gơs jơnau git wă prap gàr niam chài kòn cau, sền gàr ală bơta kuơ kơ̆ kơljap mpồl bơtiàn dê.

Cau mblàng K’Duẩn/ Cau cih H’Xíu (VOV Tây Nguyên)

Viết bình luận

TIN CÙNG CHUYÊN MỤC