Tơnơ̆ mờ nggùl nhai bơh Tuy Hoà guh tus Buôn Ma Thuột dờp broă lơh tàm Tỉñ đoàn càr Dăk Lăk, lŏ Nguyễn Thị Như neh mhar geh hìu ơm, rơwah geh hìu bơsram ai kòn in mờ drơng tơl ală bơta phan ngui tàm rài kis. Bŭ lah ờ ru mờ broă lơh tàm tiah lơh broă pa, mơya geh ală bơyô, cau lơh broă bal dong kờl den tàng lŏ Như ờ tìp uă kal ke. Lŏ Nguyễn Thị Như, đơs: “Tềng đăp măt rơ̆p geh uă broă nàng lơh, mpồl broă lơh uă rơlao, tơnguh tai dùl khà broă lơh tai. Broă lơh bơdìh tŭ jơ lơh broă, lơh broă ngai lồi poh den đơs bal mờr tus di gơlan rơ̆p kal ke uă ngan. Tàm anih lơh broă lài do den geh mò ồng dong kờl, tŭ do neh guh lơh broă tàm mpồl lơh broă pa den bàr nă ùr bơklao pal lơh ngan rơndăp tŭ jơ nàng iang nùs lơh broă”.

Kung tàm bơta guh tàm ù tiah pa nàng dờp kơnòl lơh broă sơl, lŏ Nguyễn Thị Thanh Huyền, lơh broă tàm Mpồl Mblàng yal bơto bơtê mờ Hòi jà làng bol Tỉñ ủy càr Dăk Lăk yal, lŏ mờ 25 nă kwang bàng, cau lơh broă pa guh tus neh dờp geh broă dong kờl jơh nùs bơh ală cau lơh broă tàm mpồl bal. Lŏ Nguyễn Thị Thanh Huyền, pà gĭt: “Bơh kwang đơng lam mpồl, kwang đơng lam cơl dŭ lơh broă bal mờ ală oh mi ndrờm dong kờl jòi hìu ơm, jòi hìu bơsram kòn in, bơh ală broă dềt ngan bè sơn-io drà ha là hìu tăc piang sào, dà hùc, lòt lơh broă ndrờm neh geh dong kờl jơh lơm. Añ gŏ nùs nhơm tam klăc bal, đềt mềr bal mùl màl, bè cau tàm hìu nhă bal, nàng kwang bàng, kông cứk Phú Yên lài do guh Dăk Lăk pa iang nùs lơh broă mờ lơh ngan nàng càr Dăk Lăk pa mùl màl bơtàu tơnguh”.

Tơnơ̆ mờ tŭ tơmŭt bal, mờr 700 nă kwang bàng, kông cứk, viên cứk bơh Phú Yên neh tus lơh broă tàm Anih tờm lơh broă sră pơ-àr gơnoar atbồ càr Dăk Lăk pa. Bŭ lah tam gơl ù tiah ơm kis, broă lơh ha là tiah kis, mơya ală kwang bàng do ndrờm ai loh làng bơta pràn nùs nhơm, rơcang lài gơdờp bal, tŭ lơi kung rơcang lài tơrgùm bal mờ lơh broă. Lŏ H’ Như, lơh broă tàm Hìu đơs crih tamya Sao Biển đơs là, geh nùs nhơm kờñ gơboh broă lơh bal mờ nùs nhơm niam bơh ală cau lơh broă tàm mpồl bal, den broă lơh tàm tiah lơi kung ƀuơn rơlao. Lŏ H’ Như, đơs: “Gơwèt mờ añ den tàm tiah lơi kung gơtùi kis lơm, mìng là he kis bè lơi, gơgoh bal bè lơi mờ dong kờl bal tàm rài kis”.

Gam lŏ Đỗ Anh Thư, kwang bàng lơh broă tàm Hìu prăp gàr phan kwơ yau Phú Yên den chờ hờp pà git: “Tŭ do rê bal mờ càr Dăk Lăk den añ rơ̆p tơrgùm bal mờ bơtơl jơnau git wă, lơh bơta hơ̆ gơs dùl bơta niam chài krơi is, gơs cau tờm ù tiah càr Dăk Lăk dê. Jòi sền nàng git jơnau git wă tàm ù tiah nàng drơng broă làng bol in, ală bơta niam chài ờ gam gơtùi tam cah is ù tiah tai”.

Broă gơdờp bal mờ ù tiah lơh broă pa sùm pal geh tus mờ broă lơh ngan bơh tơl nă kwang bàng, kông cứk dê. Ală jơnau tam pà bal, broă dong kờl bal di tŭ đah ală cau lơh broă bal mờ mpồl lơh broă neh lơh gơs dùl bơta đềt mềr bal bè cau dùl hìu Dăk Lăk dê. Bŭ lah bơh tiah lơi tus, bŭ lah neh geh tŭ bơh ƀòn lơgar lơi, jơh ală ndrờm gam wèt tus dùl jơnau kờñ bal” bơtàu tơnguh ƀòn lơgar lơngăp lơngai, kơ̆ kơl jăp.