Drim bồ poh, ồng Bùi Đức Thanh, làng bol thôn Tân Sao, sàh Ia Hrung geh mat tàm Anih tờm drơng broă sră pơ àr gơnoar atbồ Dà lơgar sàh nàng lơh sră pơ àr pà wơl sră dờp gơnoar ngui ù. Bă ù bơh hìu bơnhă ồng dê neh geh pà sră pơrhê, mơya tài bơh lơh tìs bơh uă nam lài do, gơnoar ngui ù gơtìp pà ai cau ndai in wơl.

Dơ̆ tus tàm sàh pa nàng tam gơl wơl nhàr ù tiah, ồng Thanh geh bơto pơlam lơh sră pơ àr jơh nùs ngan:“Kwang bàng, kông cứk, viên cứk sàh pa lơh broă geh cồng nha ngan, drơng broă làng bol jơh nùs. Ală ùr kông cứk nggui tàm tiah lơh broă kung lilk tàm kƀàng nàng bơto pơlam ai gơ in loh làng, den ală cau dong kờl is kung bơto pơlam mờ cih mơ sră pơ àr ai añ in sơl. Ngai do, sră pơ àr añ dê kung neh mờr lơh sir rao”.

Là dùl sàh geh uă ngan làng bol jơi bơtiàn dồ ết nă cau, mơya sàh Hrung ơm tàm mpồl 8 tàm 135 sàh, sơnah ƀòn tàm jơh càr Gia Lai dê bè khà sră pơ àr dờp tàm poh sơn rờp mut lơh broă anih tờm sră pơ àr gơnoar atbồ. Rlau 200 sră pơ àr dờp ndrờm neh geh lơh tam gơl sồ. Khà sră pơ àr pơyoa tàm internet tus 3 bơnah 4, pà gŏ làng bol neh tam gơl mờng kwèng mờ lơh is tàm mpồng drơng broă tàm internet Dà lơgar. Mò Huỳnh Ngô Tùng Điệp – Phó Củ tịc Anih duh broă Làng bol sàh, mơkung là Kwang atbồ Anih tờm drơng broă sră pơ àr gơnoar atbồ Dà lơgar sàh Ia Hrung, pà gĭt: “Sền gĭt, gơnoar atbồ ƀòn lơgar 2 kấp là drơng broă làng bol mờ ală mpồl cau, mpồl lơh sa kă bro tàm ù tiah càr dê. Den tàng bơta do sùm geh Anih duh broă Làng bol sàh sồr kông cứk pal lơh sir kơnòl broă tàm ngai, den tàng ờ lơh lơyài tŭ tơngai. Pơn yơu bè scan (lơh tam gơl sồ ngan ngồn) den ală kwang bàng gơtùi ngui điện thoại ngăc ngar nàng lơh, bơta lơi mhar ngan rlau jơh den he ngui”.

Bal mờ sàh Ia Hrung, uă tiah ndai bè sơnah ƀòn Pleiku, sơnah ƀòn Quy Nhơn, sàh Phú Túc… kung cih dờp khà sră pơ àr dờp mờ bơsong tàm khà uă. Sơnah ƀòn Thống Nhất pơn rơ ngan tŭ ơm tàm kha dơ̆ 5 jơh gùt càr dê bè khà sră pơ àr geh bơsong, mờ dờp wơl sră pơ àr bơh broă lơh điện tử. Mò  Lê Thị Ánh Tuyết –  lơh broă tàm Anih tờm drơng broă sră pơ àr gơnoar atbồ Dà lơgar sơnah ƀòn Thống Nhất, pà gĭt: khà lơh tam gơl sồ mờ trơ wơl sră pơ àr điện tử ờ mìng tơn lơyah tŭ tơngai bơsong ai làng bol in lơm, mờ gam dờp tơrgùm ală jơnau yal tơngĭt tàm măi mok bal bơh càr dê. Kơnờm bơh hơ̆, tàm ală dơ̆ lơh broă pơn jat tai, làng bol rơ̆p ờ duh pal tong wơl uă sră pơ àr, tài bơh jơnau yal tơngĭt neh geh lài tàm măi mok sồ. Mò Lê Thị Ánh Tuyết pà gĭt:“Anih tờm ring bal mờ kông cứk là pal lơh jat di broă lơh tong sră pơ àr bơh sơn rờp, lơh tam gơl sồ bơnah sră pơ àr, mờ dờp wơl sră pơ àr bơh sơn rờp, den hơ̆ sồng tơnguh khà dờp wơl sră pơ àr điện tử. Mờ Anih tờm kung pơgồp bal mờ cơldŭ lơh broă, mpồl lơh broă ờs mờng geh bơsong sră pơ àr nàng lơh broă niam, di tŭ tă bơsong ală bơta kal ke, kòl yan tàm tŭ bơsong”.

Tŭ do, mpồl sàh, sơnah ƀòn tàm jơh gùt càr Gia Lai lơh 424 sră pơ àr gơnoar atbồ, uă mờr rlau 3 dơ̆ pơndrờm mờ lài do. Tàm tơngai tus, càr kờp dŭ pơn jat tai jàu kơnòl broă, tơnguh gơnoar broă ai gơnoar atbồ ƀòn lơgar in. Mpồl broă lơh ngai sơlơ uă ai tơlik jơnau kờñ uă rlau gơwèt mpồl kwang bàng kấp sàh, sơnah ƀòn: pal gĭt loh broă lơh, lơh broă mờng ngan tàm ală măi mok sồ mờ lơh tờm măi mok tàm broă bơsong sră pơ àr drơng broă làng bol.

Jat ồng Phạm Anh Tuấn – Phó Ƀí thư Tỉñ ủy càr, Củ tịc Anih duh broă Làng bol càr Gia Lai, càr rơ̆p tơnguh tai bơto bơtê kwang bàng, bơcri priă dồ ròt bal bơt bơtàu phan bơna, mờ is ồn là ngui pràn ngan măi mok yal tơngĭt jơnau nàng dong kờl geh cồng nha rlau ai mpồl kông cứk in, lơh geh jơnau sồr kơnòl broă tàm tơngai pa. Gơ wèt mờ mpồl kwang bàng tàm ƀòn lơgar, Củ tịc Anih duh broă Làng bol càr Gia Lai ai jơnau sồr uă ngan bè nùs nhơm drơng broă:“Nùs nhơm lơh broă là bơsong broă jat ngai. Nùs nhơm ai làng bol mờ mpồl lơh sa kă bro lơh tờm, lơh cau drơng broă. Làng bol mờ mpồl lơh sa kă bro là năc bơh gơnoar atbồ dê, den tàng bol he pal drơng broă bè lơi? Do là dơ̆ tam gơl dờng bơh jơh gùt Dà lơgar dê, jòi tơl broă nàng lơh broă niam ngan rlau jơh. Nùs nhơm là ờ bơyai rŭc wơl, mìng bơyai lơh lơm”.

Broă lơh kấp sàh, sơnah ƀòn tàm Gia Lai bơh sơn rờp pà gŏ gơnoar atbồ gam ngai sơlơ rềp làng bol rlau mờ bơsong broă lơh mhar rlau tai. Mơya, nàng wèt tus rài sră pơ àr gơnoar atbồ pa ngan, ƀuơn ngan ai làng bol mờ mpồl lơh sa kă bro in, kung gam pơn jat tai lơh sir phan bơna măi mok mờ tơnguh uă rlau tai bơta pràn jak, nùs nhơm drơng  broă bơh mpồl kwang bàng ƀòn lơgar tàm tơngai tus.