Jat broă rơndap lơh, drim ngai 19/8, càr Gia Lai sơn đờm lơh Rơndap broă lơh bơcri priă lơh gùng par mờ mù sồ 2 mờ ală broă lơh ndrờm bal tàm tiah par Ƀlàng rơndeh par Phù Cát. Broă lơh geh kờp jơh priă tă lơh rlau 3 rbô 200 tơmàn đong, geh lơh bơh nam 2025 tus nam 2028 nàng kờñ tơnguh pràn jak ngui, lơh jat jơnau sồr drơng rơndeh par rài pa, lơh gơlik bơta gơn kơnờm bơtàu tơnguh lơh sa – mpồl bơtiàn tàm tiah do.

Dùl ngai bal, càr Gia Lai rơp ai ngui Gùng pleh tiah đah jum ƀòn drà dềt Phú Phong (tŭ do là sàh Tây Sơn) jòng mờr 18 kơi sồ, priă tă lơh mờr 800 tơmàn đong, sơn đờm lơh bơh nhai 8 nam 2022; ai ngui Gơl gùng tơrbŏ bal gùng càr 638 tus gùng kềng gah dà lềng (ĐT 639) jòngr lau 19 kơi sồ, kờp jơh priă tă lơh rlau 800 tơmàn đong. Bàr rơndap broă lơh gùng lòt do dong tơrmù ƀà bơta kơn jơ̆ ai gùng dà lơgar 19 in, tơrmù lơyah tŭ jơ jun pơndiang phan bơna, lơh geh bơta tàm tơrbŏ bal ală tiah, bơtàu tơnguh lòt nhơl, mờ kung pơgồp bơnah sền gàr hìu đam, phan bơna làng bol dê tàm kàl mìu càl rbut dờng.