Tàm dơ̆ tìp mat cribơyai broă, Tổng Ƀí thư ồng Tô Lâm pin dờn Hàn Quôk rơp pơn jat tai bơtàu tơnguh pràn kơldang, lơh geh uă cồng nha dờng màng rlau, ngai sơlơ tơnguh gơnoar broă tàm tiah do mờ tàm ală lơgar, tàm hơ̆ Quôk hội Hàn Quôk ngui niam gơnoar broă kuơmàng bơh anih lơh broă lơh adat boh lam dờng ngan rlau jơh dê. Tổng Ƀí thư ồng Tô Lâm sồr 2 gah lơh broă bal jơh nùs, lơh jat geh cồng nha ală gùng dà lơh broă bal 2 lơgar mờ uă lơgar bè pơn jat tai pờ mpồng rlau tai ai phan bơna tac hờ lơgar ndai geh bơta pràn bơh lơgar Việt Nam dê mut tàm drà kă bro Hàn Quôk.

Bàr gah kung cribơyai bè ală broă tàm tiah do mờ ală lơgar mờ jơh bal 2 gah sền gròi mờ tàm dong kờl gơp tàm ală mpồl lơh broă, anih cribơyai uă lơgar, tàm hơ̆ geh Mpồl tam klac nghị viện dunia (IPU), Mpồl tam klac Nghị viện ală lơgar câu Á tài ring lơngai (AAPP), ring bal sơlơ tơnguh tai lơh broă bal đah ală đảng cíñ trị tàm câu Á.