Tus bal Anih cribơyai gam geh rlau 500 nă cau ala mat tus bơh ală mpồl lơh sa kă bro khà dùl 2 lơgar. Anih cribơyai ờ mìng là ù tiah tàm tơrbŏ bal đah ală mpồl lơh sa kă bro mờ gam geh gơnoar broă kuơmàng ngan tàm broă chồl tơnguh lơh broă bal lơh sa, kă bro phan mờ bơcri priă đah 2 lơgar. 

Đơs tàm Anih cribơyai, Tổng Ƀí thư ồng Tô Lâm yal bè broă lơh sa – mpồl bơtiàn lơgar Việt Nam dê nam 2024 mờ 6 nhai bồ nam 2025 lơh geh uă cồng nha niam; đơs sùm nam 2025 ờ mìng là nam “gơguh mhar, tam gơl pràn” nàng lơh gơs ală jơnau kờñ bơtàu tơnguh bơh tŭ tơngai bơh nam 2021 tus nam 2025 dê mờ gam geh gơnoar broă là nam sơn rờp, lơh gơlik bơnàng jă kuơmàng mờ gơn kơnờm pràn kơldang nàng lam lơh gơtùi 2 jơnau kờñ 100 nam, lam dà lơgar mut tàm rài pa – rài brồ să, bơtàu tơnguh pràn kơldang, pas sơm, gơguh jak, bơtàu tơnguh jơi bơtiàn dê. Bè lơh broă bal, gơ hòi gơ jà bơcri priă bơh lơgar ndai, Việt Nam tam gơl bơh bồ tơngoh kơlôi sơnơng “gơ hòi gơ jà jat khà” gơ gơs “gơ hòi gơ jà jat cồng nha, bơta niam” geh bơta sac rơ wah, ai lài ală rơndap broă lơh geh măi mok pa, măi mok niam, măi mok sàng goh, đơng pơlam pa, geh cồng nha lơh geh gơguh uă, geh bơta gơ rềng làm uă, tàm tơrbŏ bal ală mpồl lơh gơlik mờ tac phan gùt plai ù.