Tàm Dà Làc, tiah ơn Anih tờm sră pơ àr gơnoar atbồ bơh càr Lâm Đồng dê tŭ do geh rlau 1 rbô 300 nă cau lơh broă sa priă nhai dà lơgar bơh Dăk Nông mờ Bình Thuận ntrờn rê. Rlau 8 rbô nă cau gam wơl kung gam geh rơndap ơm wơl tàm ù tiah yau nàng dờp ală sră nggal gơnoar atbồ, lơh gơlik bơta ƀuơn tàm broă bơsong di tŭ broă làng bol in.

Gơ wèt mờ 124 sàh, sơnah ƀòn, tiah is ồn tơnơ̆ rơndap tap sèng, broă bơsong sră pơ àr gơnoar atbồ rơhời geh lơh niam. Khà sră nggal bơsong lài mờ tơngai hơ pơrgon mờ di tŭ tơngai hơ pơrgon geh rlau 97% tàm khà kờp jơh rlau 18 rbô 500 sră nggal. Phó Thủ tướng cih dờp mờ jờng rơ ală cồng nha bơh sơn rờp mờ càr Lâm Đồng neh lơh geh tàm broă ai lơh broă gơnoar atbồ ƀòn lơgar 2 kâp, gàr sùm khà bơtàu tơnguh lơh sa mpồl bơtiàn bơh càr dê. Mìng is broă rơcang lài Pơrjum dờng, càr mờ sàh ndrờm lơh niam ngan, di mờ broă rơndap lơh mờ kơnòl broă neh ai tơlik. Phó Thủ tướng ồng Nguyễn Hòa Bình đơs là, gơguh lơh sa bơh càr Lâm Đồng dê tŭ do ờ hềt dipal mờ bơta pràn, mìng rơp pa geh 5%. Bơdìh hơ̆ tai, tơngai lam lơh bàr pe rơndap broă, broă lơh kuơmàng gam lơyài, kal ke tàm broă ai ù lơh rơndap broă; ai priă bơcri dà lơgar ờ hềt lơh geh jat jơnau sồr; broă atbồ phan kuơ geh is, phan kuơ tàm ù gam ờ niam, ờ uă làng bol tiah jơi bơtiàn dồ êt nă cau gam kal ke… Ală bơta do càr kờñ pal sơlơ tơnguh tai bơta đơng lam bồ, sồr lơh, ngan là sền gròi tus broă bơsong mờ tă bơsong tàm tơngai tus.