Tổng Ƀí thư jờng rơ uă ngan broă lơh rcang lài niam ngan, jơnau yal cíñ trị tơngŏ bồ tơngoh kơlôi sơnơng tam gơl pa, jơnau kờñ tơngai lơh broă tus tơl làm. Ồng sồr sàh pơn jat tai gàr kơ̆ bơta kơ̆ kơl jăp cíñ trị, gàr niam lơngăp lơngai, rơndăp tăp sèng, lơh jat gơnoar lam lài bơh đảng viên dê, pơn jờng làng bol tus bal bơt bơtàu mpồl bơtiàn lơngăp lơngai, niam ngan.

Sàh pal lơh pràn tam gơl pa bơceh lơh, tơnguh uă bơta niam rài kis, sền gròi gah lơh sơnơm, bơto bơtê, tơrmù rƀah kơ̆ kơl jăp jŏ jòng, ờ gŏ di lời gơbàn rƀah wơl tai. Tổng Ƀí thư kung đơs sùm jơnau sồr pal tam gơl niam sră pơ àr gơnoar atbồ, bơt bơtàu Đảng ƀộ sàng goh kơ̆ kơl jăp pràn kơl dang tơl làm, tơnguh uă cồng nha pơrjum Ci ƀộ, tơmŭt uă đảng viên pa, lơh geh jơnau sồr bơtàu tơnguh tàm tơngai pa.