Tus tơngai do, càr Kon Tum neh lơh sir broă lơh rơcăng ai dơ̆ pơrlòng jơh bơsram kâp pe geh bơyai lơh bơh ngai 25 tus 27 nhai 06 do. Dơ̆ pơrlòng jơh bơsram kâp pe nam do càr Kon Tum dê geh rlau 5 rbô 300 nă cau pơrlòng tus bal pơrlòng. Jơh gùt càr rơndăp lơh 14 anih pơrlòng mờ 244 cơldŭ pơrlòng mờ 28 cơldŭ ơm kơ̆p. Bơdìh hơ̆ tai, gah bơto bơtê mờ bơsram mờ gơnoar ătbồ ală ƀòn lơgar kung neh rơndăp tai 9 anih pơrlòng rơcăng lài nàng bơyai lơh pơrlòng tàm tŭ dilah gơlik jơnau trồ tiah lơh aniai. Nàng kờñ dơ̆ pơrlòng jơh bơsram kâp pe geh lơh lơngăp lơngai, niam, di jơnau pal jăt, càr Kon Tum hòi tơrgùm rlau 1 rbô 200 nă kwang bàng, kông cưk, viên cưk lơh broă lơh pơrlòng, tàm hơ̆ kwang bàng să tờm tơn sền pơrlòng mờr 630 nă.

Mò Y Ngọc, Phó Củ tịc Duh broă sùm Anih duh broă Làng bol càr, Lam bồ Mpồl Sồr lơh Dơ̆ pơrlòng jơh bơsram kâp pe nam 2025 càr Kon Tum pà gĭt, Mpồl sồr lơh rơ̆p jàu mờ sồr kong kơnòl loh làng ai tơl nă kwang bàng in dilah lời gơlik geh tìs hŭi tàm ală tŭ lơh jăt kơnòl broă tàm dơ̆ pơrlòng.